Olketa Minim Buk Bilong Daniel!
OLKETA wea attendim convention barava want for kasem copy bilong datfala 320-page buk wea just release, Tingting Strong Long Profesi Bilong Daniel! Hao nao feeling bilong olketa abaotem datfala buk? Lukim wanem samfala talem.
“Olsem planti young wan, mi faendem hem hard for laekem history. So taem mi kasem own copy bilong disfala niu buk, Tingting Strong Long Profesi Bilong Daniel! mi no mas luk forward for readim, bat mi traem nomoa. Man, mi barava garem rong tingting! Diswan hem wanfala long olketa best buk wea mi readim. Hem barava hard for putim daon! Mi nating feel olsem mi readim story bilong thousand year bifor. For firstaem long laef bilong mi, mi savve putim miseleva long ples bilong Daniel. Mi barava savve minim hao nao feeling bilong man taem pipol tekem hem awe from famili bilong hem, sendem hem long difren kantri, and wea faithful fasin bilong hem kasem test planti taem. Thankiu tumas for disfala buk.”—Anya.
“Samting wea barava helpem mi hem kliafala message hao Jehovah kontrolem evribit olketa samting wea affectim pipol bilong hem. Thru long olketa vision and dream bilong Daniel and olketa narawan wea talemaot mining, hem klia hao God bae nating letem eni samting for stopem purpose bilong hem. Diswan strongim hope bilong iumi long olketa naesfala profesi insaed Bible abaotem niu world wea God bae bringim.”—Chester.
“Mi barava laekem wei wea iufala mekem Daniel hem laef. Mi feel mi savve gud long hem thru long wei wea iufala talem klia olketa samting wea hem wari and tinghae long hem. Mi fit for minim why nao Jehovah ting long hem olsem best samting. Insaed olketa test and persecution wea hem kasem, hem no wari abaotem hemseleva. Main wari bilong hem nao for Jehovah and nambawan nem bilong Hem. Thankiu for wei wea iu mekem klia olketa point hia.”—Joy.
“Diswan nao samting mifala weitim! No enitaem bifor hem showaot hao planti samting long buk bilong Daniel hem fitim iumi wanwan. Mi readim big haf bilong disfala buk long evening bihaen mi kasem, then mi mas stop and talem thankiu long Jehovah long prea.”—Mark.
“Wanem mifala no expectim hem bigfala wei wea hem bae affectim pikinini bilong mifala. Wanfala faev year and narawan thri year. . . . Nomata story bilong Daniel, Hananiah, Mishael, and Azariah hem favorite bilong tufala insaed buk Bible Story Buk bilong Mi, bat disfala story bilong buk Profesi Bilong Daniel hem affectim tufala long wei wea mekem mitufala sapraes. Nomata tufala young olsem, tufala fit for minim olketa raeteous man hia. Olketa nambawan example for olketa pikinini bilong mifala! Iufala givim mifala wanfala nambawan tul! Thankiu, thankiu tumas!”—Bethel.
“Mi feel mi barava stap witim olketa young Hebrew boy hia taem faith bilong olketa kasem test; and datwan encouragem mi for chekim gud faith bilong miseleva. Review box wea garem theme “Wanem Nao Iu Lanem?” hem strongim toktok bilong olketa chapter insaed long heart. Thankiu moa for nara nambawan buk.”—Lydia.