Chapter Wan
Buk Bilong Daniel and Iu
1, 2. (a) Wanem nao samfala difren samting wea Bible buk bilong Daniel story abaotem? (b) Long taem bilong iumi, wanem nao olketa kwestin wea kamap abaotem buk bilong Daniel?
WANFALA strongfala king sei bae hem killim dae olketa wise man bilong hem bikos olketa no savve talem and minim dream bilong hem. Thrifala young man wea no willing for worshipim wanfala maeti image, olketa torowem insaed fire wea hot tumas, bat thrifala stap laef. Midolwan long bigfala feast, planti handred pipol lukim wanfala hand wea raetem secret toktok long wall long haos bilong king. Olketa nogud man iusim trik for torowem wanfala olo man insaed hol bilong olketa lion, bat hem kamaot and no garekil. Wanfala profet bilong God lukim fofala animal insaed wanfala vision, wea mining bilong olketa point go long samfala thousand year long future.
2 Olketa hia samfala story wea stap insaed Bible buk bilong Daniel. Waswe, fitim man for barava ting strong long olketa? Hao nao disfala old buk savve fitim taem bilong iumi? Why nao iumi mas interest long olketa samting wea happen klosap 2,600 year go finis?
DANIEL—WANFALA OLD BUK FOR DISTAEM
3, 4. Why nao planti pipol wari abaotem future bilong man?
3 Bigfala part long buk bilong Daniel hem point go long world rul, wanfala subject wea barava important distaem. Klosap evriwan bae agree iumi stap insaed hardfala taem. Evriday, olketa nius report talem iumi hao living bilong man hem go daon from staka hardfala problem—nomata olketa savve duim enikaen kleva samting long saed bilong science and technology.
4 Tingim diswan: Man wakabaot finis long moon, bat long planti ples long earth hem kanduit wakabaot long olketa road and no fraet. Hem savve garem enikaen stael samting insaed long haos, bat hem kanduit stopem bigfala wei wea famili brekdaon. And hem savve wakem enikaen technology for givim information, bat hem kanduit teachim pipol for stap tugeta long peace. Professor bilong history, Hugh Thomas, raet olsem: “Savve and education wea kasem evri ples hem nating teachim man for bossim seleva and hao for stap tugeta witim narafala man.”
5. Planti taem, wanem nao kamaot from rul bilong man?
5 Olketa man startim planti difren kaen gavman for trae mekem world garem order. Bat, no eniwan long olketa missim trufala samting wea King Solomon lukim: “Man hem bossim man and spoelem hem.” (Ecclesiastes 4:1; 8:9) Hem tru, samfala ruler garem olketa gudfala goal. Nomata olsem, no eni king, president, or bigman savve finisim sik and dae. No eni man savve mekem earth kamap Paradaes wea hem nao purpose bilong God.
6. Why nao Jehovah no needim help bilong olketa gavman bilong man for duim will bilong hem?
6 Bat, Creator hem willing and fit for duim olketa samting hia. Hem no need for askem olketa gavman bilong man for duim purpose bilong hem, bikos long hem “olketa nation olsem wanfala drop wata from wanfala baket; and olketa kamap olsem lelebet dust antap long scale.” (Isaiah 40:15) Yes, Jehovah hem Sovereign Ruler bilong universe. Olsem datwan, hem garem paoa winim olketa gavman bilong man. Hem Kingdom bilong God nao wea bae changem evri gavman bilong man, mekem olketa man bae kasem blessing for olowe. Diswan hem barava showaot klia long Bible buk bilong Daniel.
DANIEL—GOD BARAVA LOVEM HEM
7. Hu nao Daniel, and hao nao Jehovah ting long hem?
7 Jehovah God barava laekem Daniel, wea serve olsem profet bilong hem for planti year. Tru nao, angel bilong God storyim Daniel olsem “samwan wea barava spesol.” (Daniel 9:23) Hebrew toktok wea olketa transleitim “samwan wea barava spesol” savve minim man wea iu “barava lovem,” “barava tinghae long hem,” and “favorim” tu. Daniel hem barava spesol long eye bilong God.
8. Why nao Daniel stap long Babylon?
8 For lelebet taem letem iumi lukluk long interesting samting wea kasem disfala profet wea God lovem. Long 618 B.C.E., King Nebuchadnezzar bilong Babylon attakim Jerusalem. (Daniel 1:1) No longtaem bihaen, olketa tekem samfala young Jew wea garem gud education olsem prisoner long Babylon. Daniel nao hem wanfala. Long datfala taem, maet hem teenager.
9. Wanem training nao Daniel and olketa Hebrew fren bilong hem kasem?
9 Daniel and olketa fren bilong hem Hananiah, Mishael, and Azariah nao midolwan long olketa Hebrew wea olketa chusim for kasem training for thrifala year long “raeting and languis bilong Chaldea.” (Daniel 1:3, 4) Samfala savveman sei maet diswan hem winim wei for lanem languis nomoa. Olsem example, Professor C. F. Keil hem sei: “Daniel and olketa fren bilong hem mas kasem education long wisdom bilong olketa priest and savveman long Chaldea, wea olketa teachim long olketa skul bilong Babylon.” So Daniel and olketa fren bilong hem kasem spesol training for waka long gavman.
10, 11. Wanem nao olketa challenge wea Daniel and olketa fren bilong hem kasem, and hao nao Jehovah helpem olketa?
10 Diswan hem bigfala change long living for Daniel and olketa fren bilong hem! Long Judah, olketa stap midolwan long pipol wea worshipim Jehovah. Distaem pipol raonem olketa worshipim olketa kastom god and woman god. Nomata olsem, young Daniel, Hananiah, Mishael, and Azariah no fraet. Olketa disaed strong—nomata disfala problem challengem faith bilong olketa—for hol strong long trufala worship.
11 Diswan bae no isi. King Nebuchadnezzar hem strong for worshipim Marduk, main god bilong Babylon. Samfala taem samting wea king askem barava no fitim man wea worshipim Jehovah. (Olsem example, lukim Daniel 3:1-7.) Nomata olsem, Jehovah evritaem gaedem Daniel and olketa fren bilong hem. Long thrifala year wea olketa kasem training, God blessim olketa witim “savve and fasin for luksavve long evri raeting and wisdom.” And tu, Daniel kasem savve for minim olketa vision and dream. Bihaen, taem king lukluk gud long fofala young man hia, hem luksavve olketa nao “tenfala taem moabeta winim evri priest for duim magic and magic man wea stap anda long rul bilong hem.”—Daniel 1:17, 20.
TALEMAOT MESSAGE BILONG GOD
12. Daniel garem wanem barava important assignment?
12 Insaed planti year wea hem stap long Babylon, Daniel serve for talemaot message bilong God long olketa man olsem King Nebuchadnezzar and Belshazzar. Assignment wea Daniel garem hem barava important. Jehovah letem Nebuchadnezzar for finisim Jerusalem evribit, and iusim hem olsem tul bilong Hem. Gogo, Babylon tu bae finis evribit. Tru nao, buk bilong Daniel mekhae long Jehovah God olsem Most Hae and Ruler insaed “kingdom bilong olketa man.”—Daniel 4:17.
13, 14. Wanem nao happen long Daniel bihaen Babylon foldaon?
13 Daniel waka long gavman for klosap 70 year, go kasem taem Babylon foldaon. Hem laef yet for lukim planti Jew go bak long homland bilong olketa long 537 B.C.E., bat Bible no sei hem go witim olketa. Hem waka strong go kasem maet mek-thri year long rul bilong King Cyrus, man wea startim Rula Bilong Persia. Long datfala taem, maet Daniel klosap kasem 100 year!
14 Bihaen Babylon foldaon, Daniel raetem olketa main samting wea happen long laef bilong hem. Samting wea hem raetem hem wanfala spesol part bilong Holy Bible distaem, and hem nao buk bilong Daniel. Bat why nao iumi mas tingting strong long disfala old buk?
TUFALA SAED, WANFALA MESSAGE
15. (a) Wanem tufala saed nao stap insaed Bible buk bilong Daniel? (b) Hao nao saed bilong story long Daniel savve helpem iumi?
15 Disfala spesol buk bilong Daniel garem tufala barava difren saed—wanfala bilong story, narawan bilong profesi. Tufala saed bilong buk bilong Daniel savve buildimap faith bilong iumi. Hao? Saed bilong story—wea barava garem laef—hem showim iumi hao Jehovah God bae blessim and lukaftarem olketa wea faithful long hem. Daniel and thrifala fren bilong hem stand strong nomata olketa kasem test wea mekem laef stap long danger. Distaem, evriwan wea want for stap faithful long Jehovah bae kasem strong taem olketa barava ting raonem example bilong olketa hia.
16. Wanem leson nao iumi lanem from saed bilong profesi long Daniel?
16 Saed bilong profesi long Daniel hem buildimap faith long wei wea hem showimaot hao Jehovah savve long evri samting wea bae happen—nomata hem samfala thousand year—long future. Olsem example, Daniel story abaotem olketa world paoa wea kamap and foldaon from taem bilong Babylon bifor kam kasem “taem bilong end.” (Daniel 12:4) Daniel leadim tingting bilong iumi go long Kingdom bilong God long hand bilong King wea Hem appointim and “olketa holy wan” wea rul witim hem, and point go long datwan olsem gavman wea bae stap for olowe. Disfala gavman bae fulfillim evribit purpose bilong Jehovah for earth and bae givim olketa blessing for evriwan wea want for servem God.—Daniel 2:44; 7:13, 14, 22.
17, 18. (a) Hao nao faith bilong iumi bae kamap moa strong taem iumi luk deep insaed buk bilong Daniel? (b) Wanem nao iumi need for duim bifor iumi studyim disfala Bible buk bilong profesi?
17 Iumi thankiu from Jehovah no keepim savve abaotem future for hemseleva nomoa. Bat, hem “Man For Showimaot olketa secret.” (Daniel 2:28) Taem iumi ting raonem wei wea olketa profesi insaed buk bilong Daniel fulfill, faith bilong iumi long olketa promis bilong God bae kamap moa strong. Iumi bae biliv moa strong long wei wea God bae fulfillim purpose bilong hem long barava taem and barava wei wea hem chusim.
18 Evriwan wea studyim Bible buk bilong Daniel witim willing heart bae garem faith wea kamap moa big. Bat, bifor iumi luk deep insaed disfala buk, iumi need for pruvim sapos disfala buk hem really tru. Samfala man barava againstim buk bilong Daniel, and sei samwan raetem olketa profesi bihaen olketa fulfill. Waswe, pipol wea garem daot olsem talem tru samting? Nextfala chapter bae story abaotem diswan.
[Footnotes]
a Taem disfala buk iusim word “Rul,” hem minim evri territory and pipol wea wanfala
WANEM NAO IU LANEM?
• Why nao Daniel hem wanfala buk for distaem?
• Hao nao Daniel and olketa fren bilong hem kasem waka insaed gavman long Babylon?
• Daniel garem wanem barava important assignment long Babylon?
• Why nao iumi mas tingting strong long profesi bilong Daniel?
antri hem rulim.
[Full-page piksa long page 4]
[Full-page piksa long page 11]