Chapter Twelv

Kasem Strong From Man Bilong God for Talemaot Message

1. Hao nao Daniel kasem blessing from hem interest tumas long purpose bilong Jehovah?

INTEREST wea Daniel garem long purpose bilong Jehovah hem kasem planti reward. Hem kasem spesol profesi bilong 70 week abaotem taem wea Messiah bae kam. Daniel kasem blessing tu for lukim wanfala smol sekson bilong pipol bilong hem wea faithful go bak long homland bilong olketa. Datwan happen long 537 B.C.E., long end bilong “firstfala year bilong Cyrus king bilong Persia.”—Ezra 1:1-4.

2, 3. Why nao maet Daniel no go bak long land bilong Judah witim olketa Jew?

² Daniel hem no midolwan long olketa wea go bak long land bilong Judah. Maet hem hard for go bikos hem olo nao. Nomata olsem, God garem waka yet for hem long Babylon. Tufala year go pas. Then, story hem sei: “Long mek-thri year bilong Cyrus king bilong Persia wanfala samting showaot long Daniel, wea nem bilong hem Belteshazzar; and datfala samting hem tru, and army duim bigfala waka. And hem minim datfala samting, and hem luksavve long datfala samting wea hem lukim.”—Daniel 10:1.

³ “Mek-thri year bilong Cyrus” hem long 536/535 B.C.E. Winim 80 year go pas finis from taem wea olketa tekem Daniel go long Babylon witim olketa from laen bilong king and bilong olketa bigman from Judah. (Daniel 1:3) Sapos hem teenager taem hem firstaem kasem Babylon, distaem hem bae klosap 100 year nao. Hem garem nambawan record bilong faithful service!

4. Nomata Daniel hem olo, wanem important waka nao hem bae duim yet insaed service bilong Jehovah?

⁴ Bat, nomata hem olo, waka bilong Daniel insaed service bilong Jehovah hem no finis yet. Thru long hem, God bae talemaot wanfala message bilong profesi wea garem barava bigfala mining. Hem bae wanfala profesi wea kam kasem taem bilong iumi and go insaed long future. For redyim Daniel for disfala waka, Jehovah lukim need for helpem Daniel, for strongim hem for samting wea hem bae duim.

REASON FOR WARI

5. Wanem nao olketa nius wea mekem Daniel wari?

⁵ Nomata Daniel no go bak long land bilong Judah witim olketa Jew, hem interest tumas long samting wea go ahed for happen long homland wea hem lovem tumas. Daniel kasem olketa nius wea showimaot samfala nogud samting hem happen long there. Olketa buildim moa altar and putim faondeson bilong temple long Jerusalem. (Ezra, chapter 3) Bat olketa nation wea stap klosap againstim datfala building waka, and olketa planim nogud samting for againstim olketa Jew wea go bak. (Ezra 4:1-5) Tru nao, planti samting nao fit for mekem Daniel wari.

6. Why nao olketa samting insaed Jerusalem mekem Daniel wari?

⁶ Daniel hem savve gud long profesi bilong Jeremiah. (Daniel 9:2) Hem savve wei for buildim moa temple long Jerusalem and mekem trufala worship kamap moa hem join long barava klos wei witim purpose bilong Jehovah for pipol bilong Hem and evri samting hia mas happen bifor promis Messiah hem kam. Tru nao, Daniel kasem bigfala privilege for kasem profesi from Jehovah abaotem “seventi week.” Hem luksavve from datfala profesi hao Messiah bae kam long 69 “week” bihaen toktok go aot for buildim moa Jerusalem. (Daniel 9:24-27) Bat, from wei wea Jerusalem hem stap emti and olketa delay for buildim temple, hem isi for luksavve why nao Daniel hem feel wikdaon and sorre.

7. Wanem nao Daniel duim for thrifala week?

⁷ “Long datfala taem mi, Daniel, feel sorre for thrifala full week,” story hem sei. “Naesfala bred mi no kaikaim, and no eni meat or wine go insaed mouth bilong mi, and mi nating putim oil long miseleva go kasem taem thrifala full week hem finis.” (Daniel 10:2, 3) “Thrifala full week,” or 21 day bilong sorre and no kaikai hem barava longfala taem. Hem finis long “mek-twenti-foa day bilong first month.” (Daniel 10:4) So, taem wea Daniel no kaikai hem go kasem Passover tu, wea olketa keepim long mek-14 day bilong first month, Nisan, and festival bilong bred wea no garem yeast wea go ahed for sevenfala day bihaen.

8. Long wanem taem bifor nao Daniel lukaotem help bilong Jehovah, and wanem nao kamaot from datwan?

⁸ Daniel kasem semkaen samting tu long bifor. Long datfala taem, hem konfius long profesi bilong Jehovah abaotem 70 year wea Jerusalem bae stap emti. Wanem nao Daniel duim long datfala taem? “Mi tan go long trufala God Jehovah,” Daniel talem, “for askem hem long prea, witim wei for no kaikai and kaleko bilong sorre and asis.” Jehovah ansarem prea bilong Daniel taem hem sendem angel Gabriel witim wanfala message wea barava encouragem hem. (Daniel 9:3, 21, 22) Waswe, Jehovah bae duim semkaen samting and givim encouragement wea Daniel barava needim?

WANFALA BARAVA SPESOL VISION

9, 10. (a) Wea nao Daniel stap taem hem lukim wanfala vision? (b) Storyim samting wea Daniel lukim long datfala vision.

⁹ Daniel barava kasem help. Hem talem iumi nextfala samting wea happen: “Taem mi stap long saed bilong bigfala river, hem nao, Hiddekel, mi liftimap eye bilong mi and lukim, and wanfala man stap wea werem linen kaleko, and hem werem gold bilong Uphaz long hip bilong hem.” (Daniel 10:4, 5) Hiddekel nao hem wanfala long fofala river wea start kamaot from garden bilong Eden. (Genesis 2:10-14) Long Persia bifor, olketa kolem Hiddekel, Tigra, wea Greek nem Tigris hem kam from. Area midolwan long datfala river and Euphrates nao hem Mesopotamia, wea minim “Land Midolwan Long Olketa River.” Diswan showimaot hao taem Daniel kasem disfala vision, hem stap yet long land bilong Babylonia, bat maet hem no long taon bilong Babylon.

¹⁰ Daniel lukim spesol vision! Man wea hem lukim taem hem liftimap eye hem no man nating. Daniel talem klia lukluk bilong hem: “Body bilong hem olsem chrysolite, and feis bilong hem luk olsem laetning, and eye bilong hem olsem fire, and hand and leg bilong hem olsem copper wea shaen, and saond bilong toktok bilong hem olsem saond bilong wanfala bigfala sekson.”—Daniel 10:6.

11. Hao nao datfala vision affectim Daniel and olketa man wea stap witim hem?

¹¹ Nomata datfala vision hem braet for gud, ‘olketa man wea stap witim mi no lukim hem,’ Daniel hem sei. Hem no savve why nao olsem bat “bigfala fraet hem kasem olketa, so olketa ranawe and haedem olketa seleva.” So, Daniel seleva nomoa stap long saed bilong datfala river. “Disfala bigfala samting” hem spesol tumas dastawe hem sei: “No eni strong hem stap moa insaed long mi, and lukluk bilong mi change and kamap nogud nao, and mi nating garem eni strong moa.”—Daniel 10:7, 8.

12, 13. Wanem nao showaot abaotem datfala angel from (a) kaleko bilong hem? (b) lukluk bilong hem?

¹² Letem iumi lukluk gud long disfala spesol man for talemaot message wea mekem Daniel fraet tumas. Hem “werem linen kaleko, and hem werem gold bilong Uphaz long hip bilong hem.” Long Israel bifor, olketa wakem belt, ephod, and breastplate bilong hae priest, and tu kaleko bilong olketa priest long naesfala linen kaleko and gold. (Exodus 28:4-8; 39:27-29) So, kaleko bilong disfala man for talemaot message hem showimaot wei wea hem holy and garem important waka.

¹³ Daniel hem sapraes tumas tu long lukluk bilong datfala man for talemaot message—body bilong hem wea shaen olsem olketa spesol stone, feis bilong hem wea barava shaen for gud, eye bilong hem wea olsem fire, and strongfala hand and leg bilong hem wea shaen. Voice bilong hem tu mekem man fraet. Evri samting hia showimaot hem no man long earth. Disfala ‘man wea werem linen kaleko’ hem wanfala angel wea garem hae position, wea waka long holy ples bilong Jehovah, wea tekem kam wanfala message.a

STRONGIM “MAN WEA BARAVA SPESOL”

14. Wanem help nao Daniel needim bifor hem savve kasem message bilong angel?

¹⁴ Message wea angel bilong Jehovah tekem kam for Daniel hem important and garem staka part. Bifor Daniel savve kasem datwan, hem needim help for kamap strong long body and mind. From angel savve long diswan, long loving wei hem helpem and encouragem Daniel. Letem iumi lukim wanem nao Daniel sei hem happen.

15. Wanem nao datfala angel duim for helpem Daniel?

¹⁵ “Taem mi herem saond bilong toktok bilong hem, mi deep sleep, and feis bilong mi tan go daon long graon.” Maet from bigfala fraet Daniel hem deep sleep. Wanem nao datfala angel duim for helpem hem? “Lukim!” Daniel hem sei, “wanfala hand tasim mi, and hem isisi mekem mi getap long knee and hand bilong mi.” And tu, datfala angel encouragem profet witim disfala toktok: “O Daniel, iu man wea barava spesol, minim olketa toktok wea mi talem long iu, and standap long ples wea iu stap, from olketa sendem mi kam long iu.” Datfala hand wea helpem hem and toktok wea encouragem hem strongim Daniel. Nomata hem “seksek,” Daniel “standap” nao.—Daniel 10:9-11.

16. (a) Wanem nao showimaot Jehovah kwiktaem duim samting for ansarem prea bilong olketa servant bilong hem? (b) Why nao angel hem delay for helpem Daniel? (Storyim box tu.) (c) Wanem message nao angel hem tekem kam for Daniel?

¹⁶ Datfala angel hem sei olketa sendem hem kam for strongim Daniel. “Iu no fraet, O Daniel,” angel hem sei, “bikos start long firstfala day wea iu givim heart bilong iu for minim samting and mekem iuseleva hambol front long God bilong iu, hem herem toktok bilong iu, and mi nao kam from iu tok olsem.” Then angel talemaot why nao hem delay. Hem sei: “Bat prince bilong kingdom bilong Persia hem againstim mi for twenti-wan day, and, lukim! Michael, main wan long olketa prince, kam and helpem mi; and mi, for saed bilong mi, stap long there klosap long olketa king bilong Persia.” Witim help bilong Michael, datfala angel fit for duim waka bilong hem, for tekem kam long Daniel disfala barava important message: “Mi kam for mekem iu savve long samting wea bae kasem pipol bilong iu long lastfala part bilong olketa day, bikos hem wanfala vision bilong olketa day wea bae kam.”—Daniel 10:12-14.

17, 18. Hao nao Daniel kasem help long mek-tu taem, and datwan mekem hem fit for duim wanem?

¹⁷ Luk olsem Daniel no luk forward for kasem spesol message from olketa samting wea hem herem mekem hem fraet tumas. Story hem sei: “Taem hem talem olketa toktok olsem long mi, mi tanem feis bilong mi go daon long graon and no savve toktok nao.” Bat datfala angel for talemaot message hem redy for givim loving help—for mek-tu taem. Daniel hem sei: “Lukim! wanfala wea klosap semsem olsem olketa son bilong man hem tasim lip bilong mi, and mi openem mouth bilong mi and toktok.”b—Daniel 10:15, 16a.

¹⁸ Daniel kasem strong taem datfala angel tasim lip bilong hem. (Markem Isaiah 6:7.) From hem kasem bak paoa bilong hem for toktok, Daniel savve minim long datfala angel olketa hardfala samting wea hem feisim. Daniel hem sei: “O lord bilong mi, datfala samting wea mi lukim hem mekem insaed bilong mi barava seksek, and mi no garem eni strong nao. So hao nao servant bilong iu O lord bilong mi fit for toktok witim iu O lord bilong mi? And mi, kam kasem distaem mi no garem eni strong, and no eni wind stap moa insaed long mi.”—Daniel 10:16b, 17.

19. Hao nao Daniel kasem help long mek-thri taem, and wanem nao kamaot from datwan?

¹⁹ Daniel no komplen long hia or talem excuse. Hem talem nomoa problem wea hem kasem, and datfala angel acceptim datwan. So, for mek-thri taem, datfala angel helpem Daniel. “Dat wan wea lukluk bilong hem olsem man long earth hem tasim mi moa and strongim mi,” profet hem talem. Bihaen angel hia tasim and strongim hem, hem talem disfala toktok for comfortim Daniel: “Iu no fraet, O man wea barava spesol. Letem iu garem peace. Kamap strong, yes, kamap strong.” Luk olsem datfala loving wei for tasim and toktok nao samting wea Daniel barava needim. Wanem nao kamaot from datwan? Daniel hem sei: “Taem hem toktok witim mi, mi kamap strong moa and gogo mi sei: ‘Letem lord bilong mi toktok, bikos iu strongim mi nao.’” Daniel hem redy nao for narafala assignment.—Daniel 10:18, 19.

20. Why nao datfala angel mas waka hard for duim assignment bilong hem?

²⁰ Bihaen hem strongim Daniel and helpem hem long mind and body, datfala angel talem moa purpose bilong assignment bilong hem. Hem sei: “Waswe, iu really savve why nao mi kam long iu? And distaem mi bae go bak for faet witim prince bilong Persia. Taem mi go, lukim! prince bilong Greece tu hem kam. Bat, mi bae talem iu olketa samting wea olketa raetem long raeting bilong truth, and no eniwan strong for saportim mi long olketa samting hia bat Michael nomoa, prince bilong iufala pipol.”—Daniel 10:20, 21.

21, 22. (a) From samting wea kasem Daniel, wanem nao iumi lanem abaotem wei bilong Jehovah for deal witim olketa servant bilong hem? (b) From Daniel kasem strong hem redy for wanem?

²¹ Jehovah hem loving and kaen tumas! Hem evritaem deal witim olketa servant bilong hem fitim samting wea olketa savve duim or no savve duim. Long wansaed, hem givim olketa assignment followim wanem hem savve olketa fit for duim, nomata olketa seleva maet daotem. Long narasaed, hem willing for lisin long olketa and provaedem wanem olketa needim for helpem olketa duim assignment bilong olketa. Letem iumi evritaem followim Dadi bilong iumi long heven, Jehovah, taem iumi encouragem and strongim olketa brata bilong iumi long loving wei.—Hebrews 10:24.

²² Message bilong angel for comfortim Daniel hem barava encouragem hem. Nomata hem olo, Daniel hem strong moa and redy for kasem and raetem moa spesol profesi wea minim gudfala samting for iumi.

[Olketa Footnote]

WANEM NAO IU LANEM?

• Why nao angel bilong Jehovah hem delay for helpem Daniel long 536/535 B.C.E.?

• Wanem nao kaleko and lukluk bilong angel bilong God for talemaot message hem showimaot abaotem hem?

• Wanem help nao Daniel needim, and hao nao datfala angel givim datwan thrifala taem?

• Wanem message nao angel tekem kam for Daniel?

[Box long page 204, 205]

Angel for Lukaftarem Man or Demon Ruler?

IUMI savve lanem planti samting from wanem buk bilong Daniel talem abaotem olketa angel. Hem talem iumi abaotem waka bilong olketa for duim samting wea Jehovah talem and hard waka bilong olketa for fulfillim assignment bilong olketa.

Angel bilong God sei taem hem kam for tok long Daniel, “prince bilong kingdom bilong Persia” stopem hem. Bihaen hem faet againstim hem for 21 day, datfala angel for talemaot message savve kam only bikos long help bilong “Michael, main wan long olketa prince.” Angel talem tu hao hem mas faetem moa datfala enemy and maet “prince bilong Greece tu.” (Daniel 10:13, 20) Datwan hem no isi samting, nomata for wanfala angel! Bat, hu nao olketa prince hia bilong Persia and Greece?

Firstaem, Michael nao datwan wea olketa kolem “main wan long olketa prince” and “prince bilong iufala pipol.” Bihaen, olketa kolem Michael “nambawan prince wea standap distaem for saed bilong olketa son bilong pipol bilong [Daniel].” (Daniel 10:21; 12:1) Diswan point go long Michael olsem angel wea Jehovah givim assignment for leadim olketa Israelite thru long wilderness.—Exodus 23:20-23; 32:34; 33:2.

Samting wea saportim diswan hem toktok bilong disaepol Jude hao “Michael disfala archangel hem no agree witim Devil and raoa abaotem body bilong Moses.” (Jude 9) Position, paoa, and strong bilong Michael showimaot hem nao datfala “archangel,” wea minim “chief angel,” or “main angel.” Disfala hae position hem barava fitim Jesus Christ, Son bilong God, bifor and bihaen laef bilong hem long earth.—1 Thessalonians 4:16; Revelation 12:7-9.

Waswe, diswan minim Jehovah appointim tu olketa angel ovarem olketa nation olsem Persia and Greece for gaedem olketa? Jesus Christ, Son bilong God, tok stret olsem: “Ruler bilong disfala world . . . no garem eni paoa ovarem mi.” Jesus hem sei tu: “Kingdom bilong mi hem no part bilong disfala world . . . kingdom bilong mi no kamaot from diswan.” (John 14:30; 18:36) Aposol John hem sei “full world hem stap long paoa bilong wicked wan.” (1 John 5:19) Hem klia hao olketa nation bilong world nating stap anda long lead or rul bilong God or Christ. Nomata Jehovah letem “olketa hae paoa” for stap and bossim olketa gavman long earth, hem no appointim olketa angel bilong hem ovarem olketa. (Romans 13:1-7) Eni “prince” or “ruler” wea stap ovarem olketa hem kam from “ruler bilong disfala world,” Satan datfala Devil. Olketa hia mas demon ruler and no angel for lukaftarem man. So, olketa demon, or “prince,” nao bihaenem olketa ruler long earth, and hem no olketa man nomoa wea mekem olketa nation for raoa.

[Full-page piksa long page 199]

[Full-page piksa long page 207]