Wanfala Spesol Year for Givimaot Bible

PLANTI pipol winim enitaem bifor garem wanfala Bible. Hem nao wanem wanfala report from United Bible Societies talem, bikos long 1998 olketa givimaot winim haf million Bible winim olketa year bifor. So, winim 585,000,000 Bible—full Bible or samfala part bilong Bible—olketa givimaot raonem world. “Diswan encouragem iumi,” report hem talem. “Planti pipol moa kasem word bilong God distaem.”

Bat, for garem Bible and for readim Bible hem tufala difren samting. Example, wanfala survey showimaot winim 90 percent long pipol bilong America garem Bible, and sem namba long pipol biliv hao Bible givim gudfala teaching long saed bilong fasin. Bat 59 percent nomoa sei olketa tan long Bible for advaes. And 29 percent talemaot hao olketa “savve lelebet” or “barava no savve” long Bible.

Olketa Witness Bilong Jehovah no printim and givimaot olketa Bible nomoa bat conductim olketa free hom Bible study witim pipol long winim 230 kantri. Planti million evriwea long world kasem gudfala samting from disfala Bible education program. Olketa kasem help for deal witim olketa problem wea olketa kasem distaem, and olketa lanem wanem Bible sei abaotem wanfala nambawan future anda long Kingdom bilong God.—Isaiah 48:17, 18; Matthew 6:9, 10.

[Piksa long page 32]

Olketa hom Bible study long (start from top left) Bolivia, Ghana, Sri Lanka, and England