Iumi Nao Diskaen wea Garem Faith
Givim Wanfala Message Bilong Comfort Long Italy
JEHOVAH nao “God bilong evri comfort.” Taem olketa lane for followim hem, olketa servant bilong hem “fit for comfortim olketa wea kasem enikaen test.” (2 Corinthians 1:3, 4; Ephesians 5:1) Diswan nao wanfala long olketa main goal bilong preaching waka wea Olketa Witness Bilong Jehovah duim.
Helpem Wanfala Woman wea Garem Need
Insaed olketa year wea go pas, poor living, war, and wei for wantem gudfala living muvim planti pipol for go stap long olketa kantri wea moa rich. Bat hem no isi for change fitim niu ples. Manjola hem stap long Borgomanero witim samfala nara pipol from Albania. From stap bilong hem long Italy no followim law, hem hol bak for story witim Wanda, wanfala Witness Bilong Jehovah. Nomata olsem, Wanda markem taem witim Manjola, wea kwiktaem showimaot bigfala interest for studyim Word bilong God, nomata languis hem wanfala problem. Bat, bihaen samfala visit, Wanda no lukim eniwan long haos. Wanem nao happen? Wanda hem faendaot hao evriwan long datfala haos olketa ranawe bikos wanfala long olketa—boyfren bilong Manjola—police aftarem hem from hem killim man dae!
Fofala month bihaen, Wanda meetim moa Manjola. Wanda sei: “Manjola hem sik and thin, luk olsem samwan wea garem barava hard taem.” Manjola talem hao boyfren bilong hem bifor stap long prison and olketa fren wea hem go long olketa for help nating helpem hem. From hem no garem eni hope moa, Manjola prea long God for help. Then hem tingim Wanda, wea storyim Bible. Manjola barava hapi for lukim Wanda moa!
Tufala startim Bible study moa, and no longtaem Manjola start for attendim olketa Christian meeting. Gavman letem Manjola for stap long Italy. Bihaen wan year, Manjola kamap wanfala baptaes Witness. From hem kasem comfort long olketa promis bilong God, Manjola go bak long Albania for sharem message bilong comfort from Bible long pipol long kantri bilong hem.
Witness Long Camp Bilong Olketa wea Ranawe
Planti kongregeson long Italy mekem arrangement for witness long olketa wea ranawe olsem Manjola. Olsem example, wanfala kongregeson long Florence mekem arrangement for visitim evritaem wanfala camp bilong pipol wea ranawe. Olketa pipol wea stap long camp—wea planti kam from Eastern Europe, Macedonia, and Kosovo—kasem olketa difren problem. Samfala garem problem long saed bilong drug or alcohol. Planti mas steal for kasem samting olketa needim.
Hem wanfala challenge for preach long disfala community. Bat, wanfala wea preach full-taem wea nem bilong hem Paola meetim Jaklina, wanfala woman from Macedonia. Bihaen tufala hia story for samfala taem, Jaklina encouragem fren bilong hem Susanna for lukluk long Bible. Then, Susanna story long olketa relative bilong hem. No longtaem faevfala insaed datfala famili go ahed for studyim Bible evritaem, attendim olketa Christian meeting, and followim samting wea olketa lanem. Nomata olketa feisim difren problem, olketa kasem comfort from Jehovah and Word bilong hem.
Wanfala Nun Acceptim Comfort From Jehovah
Long taon bilong Formia, wanfala wea preach full-taem wea nem bilong hem Assunta story long wanfala woman wea no savve wakabaot gud. Disfala woman hem wanfala nun long wanfala church wea savve go and helpem pipol wea sik insaed hospital and long olketa haos.
Assunta sei long disfala nun: “Iu safa tu, hem tru? Sorre tumas, iumi evriwan garem olketa problem wea iumi mas feisim.” Nun hia krae and sei hem garem serious problem long health. Assunta encouragem hem hao God bilong Bible savve comfortim hem. Nun hia acceptim olketa Bible magasin wea Assunta showim long hem.
Long narataem tufala story, nun hia, wea nem bilong hem Palmira, sei hem barava safa tumas. Hem stap for longfala taem insaed wanfala ples bilong olketa nun. Taem hem mas lusim ples hia for lelebet taem bikos long health bilong hem, olketa long datfala ples no letem Palmira kam bak. Nomata olsem, Palmira feel hem mas duim waka for God from olketa promis hem duim olsem wanfala nun. Hem go long olketa wea sei olketa savve healim hem for kasem treatment bat hem safa go moa from datwan. Palmira agree for studyim Bible, and hem attendim olketa Christian meeting for wan year. Then hem muv go long difren ples, and disfala Witness no savve ples wea hem go. Tufala year go pas bifor Assunta faendem hem moa. Famili bilong Palmira againstim hem and olketa bigman bilong church tu. Nomata olsem, hem startim moa Bible study bilong hem, kamap gud long spiritual wei, and baptaes olsem wanfala Witness Bilong Jehovah.
Tru nao, planti kasem encouragement from message bilong ‘God wea givim comfort.’ (Romans 15:4, 5) Dastawe, Olketa Witness Bilong Jehovah long Italy disaed strong for go ahed followim God long wei for sharem nambawan message bilong comfort long olketa narawan.