Iumi Datkaen Pipol wea Garem Faith
Sharem Christian Hope Long Senegal
FISH hem wanfala main kaikai from taem bifor kam. For planti thousand year, pipol kasem fish from sea, lake, and river bilong earth. Samfala aposol bilong Jesus Christ olketa fisherman long Sea Bilong Galilee bifor. Bat, Jesus introducem narakaen wei for fishing long olketa. Diswan hem spiritual fishing wea helpem no olketa fisherman nomoa bat olketa fish tu.
Long diswan, Jesus talem Peter, datfala fisherman: “Start long distaem iu bae kasem olketa man wea laef.” (Luke 5:10) Diskaen fishing go ahed insaed winim 230 kantri tuday, Senegal tu insaed diswan. (Matthew 24:14) Distaem olketa “fisherman for kasem man” no fraet for sharem Christian hope bilong olketa witim nara pipol.—Matthew 4:19.
Senegal hem stap long barava end long west saed bilong Africa. North part bilong hem start from desert area long spialaen bilong Sahara and south part bilong hem kasem olketa forest bilong Casamance area. Senegal hem wanfala land wea savve kasem drae wind from desert, witim cold fresh wind from Atlantic. Winim naen million pipol stap long there. Pipol savve long olketa bilong Senegal from fasin bilong olketa for welkamim man. Planti sei olketa no Christian. Planti long olketa shepherd and samfala moa lukaftarem olketa buluka, camel, and olketa goat. Olketa farmer tu stap wea plantim olketa peanut, cotton, and rice. Tru nao, and olketa fisherman tu stap, wea tekem kam olketa net wea fulap long fish from Atlantic Ocean and from samfala bigfala river wea kam insaed long kantri. Fishing hem kamap important bisnis long saed long economy bilong Senegal. For tok stret, main kaikai long Senegal hem ceebu jën, wea hem rice, fish, and vegetable wea teist naes tumas.
“Fisherman for Kasem Man”
Eit handred and sixti thri strongfala man for preachim Kingdom bilong God nao stap long Senegal. Fishing long spiritual wei start long hia long start bilong olketa year bilong 1950. Wanfala branch office bilong Watch Tower Society hem open long Dakar, kapitol taon, long 1965. Olketa missionary “fisherman” start for arrive from planti farawe kantri. “Fishing” waka hem start, and wei for sharem Christian hope long Senegal isisi muv ahed. Gogo, olketa buildim niufala branch office long Almadies, long spialaen bilong Dakar, and olketa dedicatem long Jehovah long June 1999. Hem wanfala taem for hapi!
Challenge Bilong Wei for Acceptim Truth
Evritaem olketa meetim pipol from difren kaen living, and samfala acceptim message bilong hope wea stap insaed Word bilong God. Nomata planti no garem savve bilong Bible, olketa hapi for lanem hao olketa promis wea Jehovah God talem long olketa faithful profet bilong bifor klosap fulfill nao.
Planti taem man need for stand strong long saed bilong olketa Christian principle, main wan nao taem olketa wei bilong kastom affectim famili. Example, wei for garem winim wan waef hem big tumas long Senegal. Tingim example bilong wanfala man wea garem tufala waef taem hem start for studyim Bible. Waswe, bae hem strong for acceptim Christian truth and followim wanem Scripture talem hao hasband mas garem wan waef nomoa? (1 Timothy 3:2) Waswe, bae hem keepim waef wea hem tekem taem hem young, woman wea hem maritim firstaem? Hem nao wanem hem duim, and distaem hem serve olsem strongfala elder long wanfala long olketa bigfala kongregeson long Dakar. First waef bilong hem acceptim truth witim 12-fala pikinini bilong hem, 10-fala from first waef bilong hem and 2-fala from mek-tu waef bilong hem bifor.
Narafala samting wea mekem hard for acceptim Christian hope maet hem wei wea pipol no savve read. Waswe, diswan minim pipol wea no savve read no savve acceptim and followim truth? Nomoa nao. Tingim example bilong Marie, wanfala woman for waka hard wea garem eitfala pikinini. Hem kwiktaem luksavve long wei wea hem important for storyim Bible text witim olketa pikinini bilong hem evriday bifor olketa go long skul and hem go long waka. Bat hao nao hem savve duim diswan, from hem no savve read? Long evri morning, hem tekem buk LukLuk Long Olketa Scripture Evriday and standap long road front long haos bilong hem. Taem pipol go pas, hem askem olketa sapos olketa savve read. Taem hem lukim samwan wea savve read, hem givim disfala buklet long hem and sei: “Mi no savve read, so plis readim disfala sekson long mi distaem?” Hem barava lisin gud taem man hem read. Then hem sei thankiu long man wea read and kwiktaem go insaed haos bilong hem and storyim datfala text witim olketa pikinini bifor olketa go for skul!
Pipol Bilong Evri Difren Kaen Living Acceptim
Long Senegal, iu savve lukim pipol sidaon long street and sellim fish, olketa vegetable, or frut long market or sidaon andanit long bigfala baobab tree and drinkim ataya, wankaen green tea wea saoa. From olketa disaed for sharem gud nius witim evriwan wea olketa meetim, tufala brata story witim wanfala cripple man wea askem selen long street. Bihaen tufala sei hello long hem, tufala sei: “Planti pipol givim selen long iu bat nating stop for story witim iu. Mitufala kam for story witim iu abaotem barava important samting wea affectim future bilong iu.” Man hia hem sapraes. “Mitufala laek for askem iu wanfala kwestin,” tufala brata go ahed. “Why nao iu ting wei for safa hem big tumas long world?” “Hem will bilong God,” datfala man hem ansa.
Tufala brata hia story witim hem from Bible and explainim Revelation 21:4. Disfala message bilong hope barava kasem heart bilong man hia taem hem savve hao samwan interest for storyim Bible witim hem. Eye bilong hem fulap long wata. Hem no askem selen moa, bat hem askem tufala brata hia for tekem evri selen wea hem garem long tin bilong hem! Hem barava laek for givim datfala selen gogo evriwan wea go pas lukluk strong long olketa. Tufala brata hia trae hard for mekem hem keepim selen bilong hem. Bihaen hem agree for keepim bat talem strong hao hem laekem tufala for visitim hem moa.
Bigfala university long Dakar hem part tu bilong fish wea insaed long spiritual fishing net. Long there wanfala medical student wea nem bilong hem Jean-Louis start for studyim Bible. Hem kwiktaem acceptim truth, dedicatem laef bilong hem long Jehovah, and baptaes. Hem want for servem God long full-taem pioneer service, bat hem hapi tu long medical study bilong hem. Bikos long wanfala agreement witim hom kantri bilong hem, hem mas finisim study bilong hem. Nomata olsem, hem go ahed for duim auxiliary pioneer long semtaem. Just bihaen hem kasem diploma olsem wanfala doctor, hem kasem invitation for serve long bigfala Bethel hom long Africa olsem doctor bilong Bethel famili. Narafala young man wea olketa meetim long Dakar University hem waka witim Bethel famili long hom kantri bilong hem distaem.
Spiritual fishing long Senegal barava kasem reward. Pipol barava tinghae long Bible literature bilong Olketa Witness Bilong Jehovah and distaem olketa printim long Wolof languis, wanfala lokol languis. Planti wea garem honest heart hapi for acceptim truth taem olketa herem gud nius long languis bilong olketa. Witim blessing bilong Jehovah, iumi sure planti moa tokpiksa fish bae kam insaed, taem olketa “fisherman for kasem man” long Senegal go ahed for sharem Christian hope witim faith and strong.
[Map/Piksa long page 31]
SENEGAL
[Piksa]
Sharem Christian hope long Senegal
[Credit Line]
Mountain High Maps® Copyright © 1997 Digital Wisdom, Inc.