Wanfala Spesol Hipap​—Waswe, Bae Iu Stap Long There?

LONG wanfala important day for rememberim winim 3,500 year go finis, Jehovah God mekem evri famili bilong olketa Israelite wea slave long Egypt for killim wanfala lamb or goat and splasem blood bilong hem long olketa doorpost bilong haos bilong olketa. Long datfala naet, angel bilong God hem pas ovarem olketa haos wea garem mark hia bat hem killim dae olketa firstborn son long evri haos bilong olketa Egyptian. So olketa Israelite kamap free. Long anniversary bilong datwan, olketa Jew celebratem Passover.

Stretawe bihaen Jesus Christ celebratem finis lastfala Passover witim olketa aposol bilong hem, hem startim wanfala kaikai for mekem olketa tingim olowe dae bilong hem olsem sakrifaes. Hem givim long olketa aposol bilong hem bred wea no garem yeast and sei: “Tekem, kaikaim. Diswan minim body bilong mi.” Then hem givim olketa wanfala kap wine and sei: “Drink long hem, iufala evriwan; from diswan minim ‘blood bilong covenant’ bilong mi, wea mi bae kapsaetem for planti pipol for forgivim sin.” Jesus sei tu: “Go ahed for duim olsem for tingim mi.” (Matthew 26:26-28; Luke 22:19, 20) So Jesus komandim olketa follower bilong hem for celebratem dae bilong hem.

Disfala year olketa bae celebratem diswan long Wednesday, April 19, bihaen sun go daon. Olketa Jehovah’s Witness raonem world bae hipap long disfala spesol naet for keepim disfala Memorial followim wei wea Jesus komandim. Mifala invaetem iu for kam join witim mifala. Plis askem Olketa Jehovah’s Witness for barava taem and ples wea olketa garem disfala meeting.