Iumi Datkaen wea Garem Faith
Buildim Faith Long Wei for Bible Study Long India
FROM olketa hae Himalaya Maunten wea snow kavarem wea stap long north go kasem Indian Ocean long south wea hot tumas, India hem wanfala ples wea garem planti samting wea difren, long saed bilong lukluk and religion. Long winim wan billion pipol bilong India, samting olsem 83 percent nao Hindu, 11 percent olketa Muslim, and nara haf olketa Christian, Sikh, Buddhist, and Jain. Evriwan hia hapi long freedom for worship. The World Book Encyclopedia sei: “Religion garem important waka long laef bilong pipol long India.”
Olketa Jehovah’s Witness stap followim Christian faith, and long India namba bilong olketa hem winim 21,200. Olsem olketa nara Witness long nara part long world, olketa Witness long India tingim olsem wanfala privilege for helpem olketa neiba bilong olketa for buildim strongfala faith long Word bilong God, Holy Bible. (2 Timothy 3:16, 17) Tingim hao wanfala famili long Chennai long south India kasem savve bilong Bible truth.
Bifor Olketa Jehovah’s Witness meetim wanfala famili, disfala famili barava join insaed olketa Catholic charismatic muvment, olketa sei olketa lukim vision, speak in tongue, and healim olketa wea sik. Disfala famili garem important position long church and community, pipol savve kolem olketa “swami,” wea minim “lord.” Wanfala day wanfala Witness visitim disfala famili and showim olketa from Bible hao Jesus hem Son bilong God, hem no Almighty God, olsem staka bilivim. Disfala Witness showim olketa tu hao nem bilong God hem Jehovah and purpose bilong Jehovah hem for mekem earth for kamap wanfala naesfala paradaes.—Psalm 83:18; Luke 23:43; John 3:16.
From olketa respectim Word bilong God and laekem samting wea olketa herem, olketa member bilong disfala famili agree for garem Bible study evritaem witim Olketa Jehovah’s Witness. Diswan mekem olketa fren bilong olketa from church for mekfani long olketa. Nomata olsem, famili hia disaed strong for go ahed witim Bible study bilong olketa. Taem savve bilong olketa grow and faith bilong olketa kamap strong, olketa stop for followim fasin bilong religion bilong olketa. Distaem, thrifala member bilong disfala famili kamap baptaes Witness, and mami savve auxiliary pioneer long taem wea fitim.
Faith for Winim Problem Long Body
Sunder Lal, wanfala young man wea stap long wanfala vilij long Punjab, needim bigfala faith and fasin for no fraet for sharem gud nius bilong Kingdom bilong God witim nara pipol. (Matthew 24:14) Wanfala reason nao hem from hem lusim planti biliv bilong famili and vilij bilong hem, wea olketa worshipim olketa difren god, for worshipim tru God Jehovah. Nara reason, Sunder Lal no garem leg.
Go kasem 1992, laef bilong Sunder Lal hem olraet. Hem garem waka for helpem wanfala doctor and hem joinim famili bilong hem for worshipim olketa difren god followim teaching bilong bigman wea olketa chusim. Long wanfala naet, Sunder foldaon taem hem akrosim road bilong train. Wanfala train go antap long hem and katem aot tufala leg bilong hem. Nomata hem laef, living bilong hem change evribit. Iumi savve minim hao Sunder Lal barava sorre tumas and hem ting raonem tu wei for killim hemseleva dae. Famili bilong hem saportim hem, bat future bilong hem no garem eni hope.
Then wanfala Witness Bilong Jehovah meetim Sunder Lal and showim hem from Bible hao God promis for mekem earth for kamap wanfala paradaes and for givim nambawan health long evriwan wea lovem and fraet long God. Sunder Lal agree for studyim Bible, and for wan year hem waka hard for study. Hem kasem invitation for attendim meeting and gogo, hem sidaon bihaen long bicycle bilong wanfala fren and go long meeting. Nomata disfala gogo hem givim hem pain, samting wea hem kasem bihaen hem nambawan. Taem hem meetim nara pipol wea barava bilivim olketa promis long Word bilong God and stap followim olketa Bible teaching, diswan helpem hem for barava minim samting wea hem lanem long Bible study.
Sunder Lal start for sharem disfala gud nius witim olketa neiba bilong hem, and long 1995 hem baptaes. Long firstaem, hem tekpart long ministry taem hem krol from door tu door long vilij bilong hem, wea hem nao wei wea hem savve muv raon. Bat distaem hem garem wanfala present from olketa spiritual brata bilong hem—wanfala bicycle wea garem thrifala wheel wea hem savve iusim hand bilong hem for muvim. From disfala bicycle, hem no evritaem needim help and hem fit for gogo seleva long kongregeson meeting wea hem savve travel for 12 kilometer. Samfala taem hem savve gogo thru long taem bilong bigfala rain; long olketa nara taem hot bilong ples kasem 43 degrees celsius.
For join witim wei for attendim olketa meeting, Sunder Lal conductim staka Bible study witim pipol wea laek for buildim strong faith long tru God, Jehovah. Sevenfala man wea hem studyim Bible witim bifor distaem olketa baptaes, and olsem tu long thrifala man wea hem meetim bat wea olketa nara Witness studyim Bible witim olketa.
“Faith,” olsem Bible talem, “hem no samting wea evriwan garem.” (2 Thessalonians 3:2) Bat wei for studyim Word bilong God evritaem savve buildim strong faith long olketa wea “fitim laef olowe.” (Acts 13:48) Study olsem mekem eye bilong man for shaen witim hope bilong nambawan future—samting wea moa and moa pipol long India go ahed for putim faith long hem.
[Map long page 30]
(lukim palikeson)
AFGHANISTAN
PAKISTAN
NEPAL
BHUTAN
CHINA
BANGLADESH
MYANMAR
LAOS
THAILAND
VIETNAM
CAMBODIA
SRI LANKA
INDIA
[Credit Line]
Mountain High Maps® Copyright © 1997 Digital Wisdom, Inc.