Report Bilong Olketa wea Talemaot Kingdom
Kamap for Savve Long Loving Creator
TAEM hem 16 year, wanfala boy from Brazil wea nem bilong hem Antônio hem givap long laef. Wei for feel iusles leadim hem for iusim drug and alcohol long rongfala wei. Evritaem hem tingim suisaed. Long olketa taem olsem nao hem rememberim samting wea mami bilong hem talem long hem: “God hem love.” (1 John 4:8) Bat wea nao disfala loving God?
Taem hem trae for winim olketa samting wea hem iusim long rongfala wei, Antônio lukaotem help from priest bilong datfala ples. Nomata Antônio hem strong long Catholic Church, hem still garem planti kwestin. Wanfala wea mekem hem konfius nao hem disfala toktok bilong Jesus, “Iufala bae savve long truth, and truth bae mekem iufala free.” (John 8:32) Wanem kaen wei for kamap free nao Jesus promisim? Church no savve ansarem eni kwestin hia long wei wea mekem hem satisfae. Gogo, Antônio lusim church and go ahed moa long olketa fasin bilong hem bifor. Wei bilong hem for iusim drug kamap moa worse.
Taem hia nao waef bilong Antônio, Maria, hem start for studyim Bible witim Olketa Jehovah’s Witness. Hem no againstim waef bilong hem for study, bat Antônio ting long olketa Witness olsem “wanfala religion bilong America wea duim samting for saed bilong olketa seleva.”
From Maria no lus hope, hem savve putim olabaot long haos samfala copy bilong Wastaoa and Wekap! magasin wea garem olketa article wea Antônio maet interest long hem. From Antônio enjoyim wei for read, samfala taem hem savve lukluk long olketa magasin hia taem waef bilong hem no stap. For firstaem long laef bilong hem, hem faendem ansa bilong olketa kwestin bilong hem long Bible. Hem sei: “Mi start for lukim tu love and kaenfala fasin wea waef bilong mi and olketa Witness showim long mi.”
Midol long 1992, Antônio disaed for hem tu studyim Bible witim Olketa Jehovah’s Witness. Nomata olsem, hem go ahed for iusim drug and drink tumas. Wanfala naet taem hem and fren bilong hem kakam bak hom from wanfala smol taon, police stopem tufala. Taem olketa faendem samfala cocaine witim Antônio, olketa start for hitim hem. Wanfala policeman torowem hem long graon and putim shotgun klosap long feis bilong hem. “Killim hem dae!” olketa nara policeman singaot go.
Taem Antônio leidaon long graon, hem start for tingting bak abaot living bilong hem. Only gudfala samting wea hem savve rememberim hem famili bilong hem and Jehovah. Hem talem short prea and askem Jehovah for help. Seknomoa, olketa policeman lusim hem. Hem go bak hom, witim strong biliv hao Jehovah nao protectim hem.
Antônio start for studyim Bible witim niufala strong. Isisi, hem mekem samfala change for mekem Jehovah hapi long hem. (Ephesians 4:22-24) Taem hem mekem grow fasin for kontrolem seleva, hem start for deal witim olketa problem bilong hem long drug. Nomata olsem, hem needim medical help. Tufala month wea hem stap long clinic givim hem chance for readim samfala Bible buk, wanfala nao hem Savvy Wea Lead Go long Laef Olawe. Antônio sharem samting wea hem lanem from olketa buk hia witim olketa nara sikman.
Bihaen Antônio lusim clinic, hem go ahed for studyim Bible witim olketa Witness. Distaem, Antônio, Maria, tufala dota bilong tufala, and mami bilong Antônio servem Jehovah tugeta olsem hapi famili. Antônio sei: “Distaem nao mi just minim trufala mining bilong toktok hia ‘God hem love.’”
[Piksa long page 8]
Preaching long Rio de Janeiro