CHAPTER 9

Samting wea Kamaot From Preaching Waka—“Olketa Planteison . . . Redi Nao for Harvestim”

WANEM CHAPTER STORYIM

Jehovah mekem olketa seed blo truth abaotem Kingdom for grow

1, 2. (a) Wanem nao olketa disaepol no minim? (b) Wanem kaen harvest nao Jesus storyim?

OLKETA disaepol no minim taem Jesus sei: “Lukim go olketa planteison hia. Olketa redi nao for harvestim.” Olketa luk lo ples wea Jesus pointim, bat olketa lukim nomoa olketa planteison blo barley wea no redi yet. Maet olketa ting olsem, ‘Wat kaen harvest nao Jesus minim? Samfala month stap yet bifor harvest hem start.’—John 4:35.

² Jesus no story abaotem really wei for harvestim planteison. Bat hem iusim chance hia for teachim olketa disaepol blo hem tufala important leson abaotem wanfala spiritual harvest, for hipimap pipol for kam insaed Christian kongregeson. Wanem nao tufala leson hia? For savve lo ansa, bae iumi storyim diswan.

Encouragement for Duim Samting and Bae Olketa Hapi

3. (a) Wanem nao maet mekem Jesus for sei: “Olketa planteison . . . redi nao for harvestim”? (b) Wanem nao Jesus talem for helpem olketa disaepol for minim?

³ Jesus story witim olketa disaepol blo hem lo end blo 30 C.E., klosap lo Sychar, wanfala taon lo Samaria. Taem olketa disaepol go insaed datfala taon, Jesus no go, bat hem sidaon saed lo wanfala well and storyim olketa truth lo wanfala woman. And woman hia kwiktaem for minim olketa important samting wea Jesus teachim. Taem olketa disaepol blo Jesus kam bak, woman hia hariap go bak lo Sychar for talem lo pipol lo ples blo hem olketa nambawan samting wea hem herem. Samting wea hem talem mekem staka lo olketa barava interest, so olketa hariap go lo well for lukim Jesus. Maet lo datfala taem nao Jesus luk go narasaed lo olketa planteison and lukim wanfala grup blo olketa Samaritan wea kakam and hem sei: “Lukim go olketa planteison hia. Olketa redi nao for harvestim.” Then hem helpem olketa for minim, datfala harvest hem no for harvestim kaikai, bat hem wanfala spiritual harvest. Then Jesus sei moa: “Wakaman hem . . . hipimap olketa frut. Olketa frut hia hem olketa wea bae kasem laef olowe.”—John 4:5-30, 36.

4. (a) Wanem tufala leson abaotem spiritual harvest nao Jesus teachim? (b) Olketa wanem kwestin nao bae iumi storyim?

⁴ Wanem tufala important leson abaotem spiritual harvest nao Jesus teachim? First samting, mas hariap for duim waka. Taem hem sei: “Olketa planteison . . . redi nao for harvestim,” hem encouragem olketa follower blo hem for duim samting. For helpem olketa disaepol luksavve hao olketa mas hariap for duim waka, Jesus sei moa: “Distaem wakaman hem tekem pei.” Tru nao, harvest waka hem start finis, and hem no taem for delay! Mek-tu samting, olketa wakaman olketa hapi. Jesus sei man wea plantim and man wea harvestim, bae “tufala evriwan hapi.” (John 4:35, 36) Olsem Jesus hapi taem hem lukim “plande pipol bilong Samaria . . . biliv long hem,” olketa disaepol blo hem tu bae barava hapi taem olketa waka hard lo harvest waka. (John 4:39-42) Samting wea happen lo first century, hem barava important for iumi, bikos distaem iumi stap lo taem blo bigfala spiritual harvest wea winim enitaem bifor. Wanem taem nao harvest waka lo taem blo iumi hem start? Hu nao olketa wea waka lo datfala harvest? Wanem nao kamaot from diswan?

King blo Iumi Leadim Bigfala Harvest Waka wea Winim Enitaem

5. Hu nao leadim harvest waka evriwea lo world, and vision wea John lukim showimaot wanem abaotem datfala harvest waka?

⁵ Lo wanfala vision, aposol John lukim Jehovah hem markem Jesus for leadim harvest waka evriwea lo world. (Readim Revelation 14:14-16.) Lo vision hia, hem showim Jesus hem werem kraon and holem wanfala naef. ‘Gold kraon wea stap long hed bilong [Jesus]’ showimaot hem nao King wea rul. And ‘sharp naef wea hem holem’ showimaot hem nao man for harvest. From Jehovah iusim wanfala angel for talem “planteison bilong earth . . . hem raep finis,” Jehovah mekhae lo wei for mas hariap for duim waka. Tru nao, ‘hem taem nao for harvest.’ Hem no taem for delay! For followim komand blo God for ‘harvest . . . witim naef,’ Jesus iusim naef blo hem and harvestim planteison blo earth, wea minim hem hipimap pipol lo earth for kam insaed lo Christian Kongregeson. Disfala nambawan vision mekem iumi luksavve hao “olketa planteison . . . redi nao for harvestim.” Waswe, disfala vision helpem iumi for luksavve lo taem wea harvest waka evriwea lo world hem start? Ia!

6. (a) Wanem taem nao “taem for harvestim planteison” hem start? (b) Waka for “harvestim planteison long earth” hem start lo wanem taem? Explainim datwan.

⁶ Lo vision wea John lukim lo Revelation chapter 14, hem lukim Jesus, man for harvest hem werem kraon (verse 14), datwan showim Jesus kasem appointment for King finis lo 1914. (Dan. 7:13, 14, NW) Samfala taem bihaen, Jesus kasem komand for start harvest (verse 15). Diswan hem semsem tu witim wanem Jesus talem lo tokpiksa abaotem wheat wea olketa harvestim, hem sei: “Taem wea olketa harvestim planteison hem piksarem taem wea world hem gogo for finis.” So taem blo harvest and taem wea world hem gogo for finis, start lo semtaem wea hem lo 1914. Bat samfala taem bihaen, lo “taem for harvestim planteison” nao harvest waka hem just start. (Matt. 13:30, 39) Taem iumi lukluk go bak, iumi lukim harvest waka hem start samfala year bihaen Jesus hem start for rul olsem king. Firstaem, start lo 1914 go kasem start lo 1919, Jesus duim waka for klinim olketa anointed follower blo hem. (Malakae 3:1-3; 1 Pet. 4:17) Then lo 1919, waka for “harvestim planteison bilong earth” hem start. Stretawe, Jesus iusim wakaman wea faithful and wise wea hem appointim, for helpem olketa brata luksavve olketa mas hariap for duim preaching waka. Iumi bae storyim wanem happen.

7. (a) Wanem nao mekem olketa brata luksavve olketa mas hariap for duim preaching waka? (b) Olketa brata blo iumi kasem encouragement for duim wanem?

⁷ The Watch Tower lo July 1920, hem sei: “Taem iumi studyim gud Bible, hem barava klia church garem bigfala privilege for talemaot message abaotem Kingdom.” Olsem example, profesi blo Isaiah helpem olketa brata for luksavve olketa mas talemaot gud nius blo Kingdom evriwea lo world. (Aesaea 49:6; 52:7; 61:1-3) Olketa no savve hao nao bae olketa duim datfala waka, bat olketa trustim Jehovah bae mekem wei for olketa. (Readim Aesaea 59:1.) From olketa brata blo iumi luksavve olketa mas hariap for duim preaching waka, olketa kasem encouragement for waka hard moa. Wanem nao olketa brata duim?

8. Lo 1921, wanem tufala samting nao olketa brata blo iumi luksavve lo hem?

⁸ Lo December 1921, The Watch Tower sei: “Lo year 1921, staka pipol nao herem message abaotem Kingdom winim eni nara year wea go pas.” Magasin hia sei moa: “Staka waka stap yet for duim. . . . Iumi gohed waka and hapi for duim.” Olketa brata minim tufala important samting abaotem preaching waka wea Jesus encouragem olketa aposol blo hem for duim: Tufala leson hia nao for mas hariap for duim waka, and olketa wakaman mas hapi.

9. (a) Lo 1954, The Watchtower talem wanem abaotem harvest waka, and why nao olsem? b) Insaed 50 year wea go pas, wanem nao happen lo namba blo olketa pablisa raonem world? (Lukim chart “Increase lo Full World.”)

⁹ Lo olketa year lo 1930, bihaen olketa brata luksavve wanfala big crowd blo nara sheepsheep bae duim samting followim message abaotem Kingdom, preaching waka kamap big go moa. (Isa. 55:5, NW; John 10:16; Rev. 7:9) Wanem nao kamaot? Lo 1934 namba blo olketa wea preach abaotem Kingdom hem go ap from 41,000 for kasem 500,000 lo 1953! The Watchtower blo December 1, 1954 sei olsem: “Spirit blo Jehovah and toktok blo hem wea garem paoa nao mekem bigfala waka for harvest wea kamap evriwea lo world.”a—Sekaraea 4:6.

**INCREASE LO FULL WORLD**
Kantri	1962	1987	2013
Australia	15,927	46,170	66,023
Brazil	26,390	216,216	756,455
France	18,452	96,954	124,029
Italy	6,929	149,870	247,251
Japan	2,491	120,722	217,154
Mexico	27,054	222,168	772,628
Nigeria	33,956	133,899	344,342
Philippines	36,829	101,735	181,236
U.S. of America	289,135	780,676	1,203,642
Zambia	30,129	67,144	162,370

**NAMBA BLO OLKETA BIBLE STUDY GO AP**
1950	234,952
1960	646,108
1970	1,146,378
1980	1,371,584
1990	3,624,091
2000	4,766,631
2010	8,058,359

Samting wea Kamaot From Harvest Waka wea Tokpiksa Story Abaotem

10, 11. Lo tokpiksa abaotem seed blo mustard tree, olketa wanem samting nao Jesus mekhae lo hem?

¹⁰ Lo olketa tokpiksa blo Jesus abaotem Kingdom, hem storyim klia samting wea bae kamaot from harvest waka. Iumi bae storyim tokpiksa abaotem seed blo mustard tree and abaotem yeast. Bae iumi storyim hao olketa tokpiksa hia kamap tru lo taem blo end.

¹¹ Tokpiksa abaotem seed blo mustard tree. Wanfala man plantim seed blo mustard tree. Hem grow and kamap wanfala big tree wea olketa bird savve stap lo hem. (Readim Matthew 13:31, 32.) Olketa wanem samting abaotem datfala seed nao tokpiksa mekhae lo hem? (1) Seed hia bae hem grow big. Seed wea “smol winim evri nara seed” bae kamap wanfala tree wea garem “olketa barava bigfala branch.” (Mark 4:31, 32) (2) Seed hia mas grow. “Bihaen hem plantim [seed], seed hia grow” nao. Jesus no sei, “maet seed hia bae grow,” bat hem sei, “seed hia grow.” No eni samting bae stopem seed hia for grow. (3) Tree hia mekem olketa visitor for kam lo hem and stap lo hem. “Olketa bird savve flae kam” and “stap long shade bilong hem.” Hao nao thrifala samting hia fitim spiritual harvest wea gohed distaem?

12. Hao nao tokpiksa abaotem seed blo mustard tree hem semsem olsem harvest waka distaem? (Lukim chart “Namba blo Olketa Bible Study Go Ap.”)

¹² (1) Grow big: Tokpiksa hia mekhae lo hao Kingdom message and Christian kongregeson bae kamap big. Start lo 1919, olketa wakaman wea waka strong lo harvest hipap tugeta moa insaed Christian kongregeson. Lo datfala taem nomata no staka wakaman stap, namba blo olketa grow fast. Start lo olketa year blo 1900 kam kasem distaem, olketa barava staka tumas. (Isa. 60:22, NW) (2) Mas grow: No eni samting savve stopem Christian kongregeson for grow. Nomata olketa enemy blo God duim enikaen samting for stopem seed hia, hem gohed for grow. (Aesaea 54:17) (3) Kam stap: “Olketa bird” wea kam stap lo tree hia minim staka million pipol wea stap lo samting olsem 240 kantri, wea acceptim message abaotem Kingdom and olketa kam insaed Christian kongregeson. (Esikiel 17:23) Lo kongregeson olketa kasem spiritual kaikai, kasem strong, and kasem protection.—Aesaea 32:1, 2; 54:13.

Staka difren kaen bird stap lo mustard tree — Tokpiksa abaotem seed blo mustard tree, showim Christian kongregeson hem ples for stap sef and kasem protection (Lukim paragraf 11, 12)

13. Tokpiksa abaotem yeast, hem mekhae lo olketa wanem samting?

¹³ Tokpiksa abaotem yeast. Bihaen wanfala woman mixim lelebet yeast lo flour, datfala yeast mekem evri flour hia for rise. (Readim Matthew 13:33.) Olketa wanem samting nao tokpiksa hia mekhae lo hem? Bae iumi storyim tufala samting. (1) Wei for grow mekem olketa change kamap. Datfala yeast “mekem evri flour hia hem rise.” (2) Hem grow evriwea. Datfala yeast mekem full “ten kilo bag flour” for rise. Hao nao tufala samting hia fitim spiritual harvest wea gohed distaem?

14. Hao nao tokpiksa abaotem yeast hem semsem olsem harvest waka distaem?

¹⁴ (1) Change: Yeast hem minim message abaotem Kingdom, and flour hem nao pipol. Lo sem wei wea flour hem change taem hem mix witim yeast, pipol mekem change taem olketa herem message abaotem Kingdom, and hem kasem heart blo olketa. (Rome 12:2) (2) Evriwea: Taem yeast hem spred insaed flour hem minim message abaotem Kingdom hem spred evriwea. Isisi datfala yeast hem spred go insaed full flour. Lo sem wei, Kingdom message hem spred “long evri farawe ples long earth.” (Acts 1:8) Disfala tokpiksa showim tu nomata olketa banim waka blo iumi lo samfala kantri, Kingdom message bae hem spred, nomata staka pipol no lukim preaching waka iumi duim.

15. Lo wanem wei nao profesi lo Isaiah 60:5, 22 kamap tru? (Lukim tu box “Jehovah Nao Mekem Hem Isi,” and “‘Smol Sekson’ wea Kamap ‘Wanfala Maeti Nation.’”)

¹⁵ Samting olsem 800 year bifor Jesus talem olketa tokpiksa hia, Jehovah iusim Isaiah for profesi abaotem bigfala spiritual harvest wea gohed distaem, and bigfala hapi wea olketa wea share lo harvest bae kasem.b Lo profesi hia, Jehovah talem pipol “from farawe ples” bae kam lo organization blo hem. Hem storyim hemseleva olsem wanfala “woman” wea distaem, hem nao olketa anointed wan wea waka for hem lo earth. Hem sei: “Iu bae lukim and shaen witim hapi, and heart bilong iu bae seksek and fulap witim hapi, bikos olketa richfala samting bilong sea bae kam long iu; olketa gudfala samting bilong nation bae kam long iu.” (Isa. 60:1, 4, 5, 9, NW) Olketa toktok hia kamap tru! Distaem, olketa wea worshipim Jehovah for longtaem finis barava hapi taem olketa lukim smol namba blo pablisa lo kantri blo olketa kamap staka thousand.

Samting wea Mekem Olketa Servant blo Jehovah Hapi

16, 17. Wanem nao wanfala reason why man wea plantim planteison and man wea harvest, tufala evriwan hapi? (Lukim tu box “Tufala Tract Kasem Heart blo Tufala Man lo Amazon.”)

¹⁶ Tingim samting wea Jesus talem lo olketa aposol blo hem: “Wakaman hem . . . hipimap olketa frut. Olketa frut hia hem olketa wea bae kasem laef olowe. So man wea plantim datfala planteison and man wea harvestim datwan, tufala evriwan hapi.” (John 4:36) Hao nao iumi “evriwan hapi” lo disfala harvest waka evriwea lo world? Iumi garem staka samting for hapi abaotem, bat bae iumi storyim thrifala.

¹⁷ First samting, iumi hapi for lukim samting wea Jehovah duim lo disfala waka. Taem iumi preachim message abaotem Kingdom, iumi plantim seed. (Matt. 13:18, 19) Taem iumi helpem samwan for kamap disaepol blo Christ, iumi harvestim frut. And iumi evriwan barava hapi and sapraes from iumi lukim hao Jehovah mekem seed blo Kingdom “start for grow and kamap big.” (Mark 4:27, 28) Samfala seed wea iumi plantim, bihaen nao hem grow and olketa narawan nao harvestim. Maet iu garem sem experience olsem Joan, wanfala sista lo Britain wea baptaes 60 year go finis. Hem sei: “Samfala wea mi meetim olketa talem mi, staka year go finis mi plantim Kingdom seed lo heart blo olketa taem mi preach lo olketa. Mi no savve, bat bihaen, olketa nara Witness nao studyim Bible witim olketa, and helpem olketa for kamap servant blo Jehovah. Mi hapi hao seed wea mi plantim hem grow, and olketa narawan harvestim.”—Readim 1 Corinth 3:6, 7.

JEHOVAH NAO MEKEM HEM ISI

JESUS sei: “God savve duim eni samting.” (Luke 18:27) Staka lo iumi experiencem disfala toktok hem barava tru. Nomata staka trae for stopem preaching waka, Jehovah helpem iumi for gohed preach.

Zacharie Elegbe (66 years old, baptaes lo 1963) hem tingim bak hao taem wea olketa banim waka blo Olketa Jehovah’s Witness lo Benin, datwan hem helpem olketa brata. Hem sei: “Lo 1976, taem mifala garem 2,300 pablisa, gavman banim waka blo mifala and hem talem for olketa mas niusim lo radio station lo evri languis blo mifala. No enitaem kaen samting olsem happen. Nomata pipol lo Benin story lo winim 60 languis, olketa program wea savve kamaot lo radio hem lo faevfala languis nomoa. So taem olketa niusim ban lo evri languis, staka thousand pipol wea stap lo olketa farawe vilij herem, diswan hem firstaem for olketa savve abaotem mifala. Olketa ask olsem, ‘Hu nao Olketa Jehovah’s Witness and why nao gavman banim olketa?’ Bihaen, taem mifala kasem olketa ples hia, insaed short taem nomoa staka nao acceptim truth.” Distaem, winim 11,500 Witness nao lo Benin.

Mariya Zinich (74 years old, baptaes lo 1957) hem sei: “Taem mi 12 years old, olketa sendem mi and full famili blo mi from Ukraine for go prison lo Siberia lo Russia. Nomata gavman trae hard for finisim mifala lo taem blo Soviet Union, namba blo mifala hem gohed for grow. Taem mi lukim namba hia hem kamap big nomata mifala kasem nogud persecution, diswan mekem mi sure waka hia hem blo Jehovah. No eniwan savve stopem!” Nara sista wea nem blo hem Mariya (73 years old, baptaes lo 1960) hem sei: “Taem gavman sendem staka brata blo iumi go lo Siberia, datwan givim chance for staka pipol lo there for herem truth.”

Jesús Martín (77 years old, baptaes lo 1955) hem sei: “Taem mi lanem truth, 300 Witness nao lo Spain. Lo 1960, olketa duim staka nogud samting lo mifala. Gavman givim order lo police for finisim evri Jehovah’s Witness. Lo datfala taem, mifala no savve hao preaching waka bae kasem full kantri. Mifala no wei nao. Bat distaem, klosap 111,000 Witness nao lo Spain. Taem mi lukim namba hia grow nomata pipol againstim iumi, datwan mekem mi sure taem Jehovah saedem iumi, no eni samting savve stopem disfala waka!”

18. Wanem reason for hapi nao 1 Corinth 3:8 storyim?

¹⁸ Mek-tu samting, iumi gohed waka and hapi taem iumi tingim wanem aposol Paul talem: “God bae blessim waka bilong man wanwan.” (1 Cor. 3:8) Jehovah blessim waka wea man duim, no samting wea kamaot from waka wea hem duim. Diswan barava strongim olketa wea stap lo olketa ples wea pipol no interest lo gud nius. Lo tingting blo God, evri Witness wea waka hard for plantim seed olketa “garem staka frut” and olketa garem reason for hapi.—John 15:8; Matt. 13:23.

19. (a) Hao nao profesi blo Jesus lo Matthew 24:14, mekem iumi hapi? (b) Wanem nao iumi shud tingim nomata iumi no helpem samwan for kamap disaepol?

¹⁹ Mek-thri samting, iumi hapi bikos waka blo iumi hem mekem profesi kamap tru. Tingim wanem Jesus talem lo olketa disaepol blo hem taem olketa askem hem: “Wanem nao saen wea bae showimaot iu stap and world hem gogo for finis?” Hem talem olketa, wanfala part blo saen hia hem nao preaching waka bae kamap evriwea lo world. Waswe, hem story abaotem waka for mek disaepol? Nomoa. Hem sei: “Olketa disaepol bilong mi bae talemaot disfala gud nius abaotem Kingdom long evri ples long world.” (Matt. 24:3, 14) So waka for preach abaotem Kingdom, hem olsem iumi plantim seed, wea hem part lo datfala saen. Taem iumi preachim gud nius abaotem Kingdom, hem gud for tingim, nomata iumi no helpem samwan kamap disaepol, iumi duim waka for “talemaot disfala gud nius.”c Hem tru, nomata pipol interest or nomoa, iumi mekem profesi blo Jesus kamap tru and iumi garem privilege for “waka tugeta witim God.” (1 Cor. 3:9) Diswan hem nambawan reason for iumi hapi!

“From Ples wea Sun Kamap, Go Kasem Ples wea Sun Go Daon”

20, 21. (a) Lo wanem wei nao Malachi 1:11 kamap tru? (b) Wanem nao iu disaed strong for duim lo harvest waka, and why nao olsem?

²⁰ Lo first century, Jesus helpem olketa aposol blo hem for luksavve olketa mas hariap for duim harvest waka. From 1919, Jesus gohed helpem olketa disaepol blo hem distaem for garem sem tingting abaotem harvest waka. From diswan, pipol blo God duim staka samting moa lo waka blo olketa for preach. Tru nao, no eniwan savve stopem disfala harvest waka. Olsem profet Malachi talem, olketa bae duim preaching waka start “from ples wea sun kamap, go kasem ples wea sun go daon.” (Mal. 1:11, NW) Tru nao, from east go kasem west, nomata wea nao olketa stap lo earth, olketa wea plantim and olketa wea harvestim evriwan hapi. And start lo morning go kasem evening, or for full day iumi hariap for duim waka.

²¹ Taem iumi ting bak lo winim 100 year wea go pas, and iumi lukim smol grup lo olketa servant blo God “kamap wanfala maeti nation,” heart blo iumi “seksek and fulap witim hapi.” (Isa. 60:5, 22, NW) Letem wei wea iumi hapi and love blo iumi for Jehovah, “man wea ownim planteison,” muvim iumi wanwan for duim part blo iumi for finisim bigfala harvest waka wea gohed lo taem blo iumi!—Luke 10:2.

a For lane moa abaotem harvest waka wea start lo 1919 go kasem 1992, mifala encouragem iu for readim buk Jehovah’s Witnesses—Proclaimers of God’s Kingdom, page 425-520.

b For savve moa abaotem disfala profesi, lukim buk Isaiah’s Prophecy—Light for All Mankind II, page 303-320.

c Olketa Bible Student luksavve finis lo disfala important truth. Zion’s Watch Tower blo November 15, 1895 sei: “Nomata sapos lelebet wheat nomoa olketa kolektem, gud nius abaotem truth bae kasem evri pipol. . . . Evriwan savve preach abaotem Kingdom.”

TUFALA TRACT KASEM HEART BLO TUFALA MAN LO AMAZON

Antônio Simões

WANFALA 91 year old, faithful elder wea nem blo hem Antônio Simões ting go bak lo hao dadi and uncle blo hem kasem truth from tufala tract wea Olketa Jehovah’s Witness pablisim. Hem askem tufala wea visitim hem, “Waswe, iutufala laek herem story hia?” Tufala sei: “Ia, mifala laek herem.” Antônio smile and sidaon, and hem start for story.

“Dadi blo mi, Zeno, hem wanfala pastor lo Baptist church. Lo 1931, hem go lo wanfala farawe ples lo Amazon forest for visitim wanfala member blo Baptist church. Hem lukim tufala Bible tract, lo haos blo woman hia. Datfala woman faendem tufala tract hia insaed lo church, bat hem no savve hu nao putim lo there. Wanfala tract storyim hellfire, and narawan storyim resurrection. Samting wea dadi readim kasem heart blo hem. Semtaem nomoa hem tingim Guilherme, brata-in-law blo hem, wea savve tok olsem evritaem: ‘Mi no bilivim hellfire. God wea garem love hard tumas for wakem kaen ples olsem.’ From dadi laek for showim tufala tract hia lo Guilherme, hem padol lo kanu for eitfala hour for kasem Manaquiri, wanfala settlement klosap lo Manaus, ples wea Guilherme hem stap.

Firstfala kongregeson lo Amazonas State, lo Brazil

“Taem Dadi and Uncle Guilherme studyim gud tufala tract hia, tufala sei, ‘Diswan nao hem truth!’ Stretawe, tufala raet lo branch office lo Brazil and ask for literature. Dadi resign from pastor, then hem and uncle blo mi start for sharem Bible message lo datfala farawe ples. Pipol lo there laekem wanem olketa lanem, so insaed wanfala year nomoa wanfala kongregeson hem start lo Manaquiri. Gogo, 70 pipol lo vilij nao savve attendim olketa meeting, and lo datfala taem lo Brazil, hem nao bigfala kongregeson.” Antônio stop lelebet, then hem sei, “Hem naes tumas for kingdom message kasem Amazon.” Tru nao, tufala Bible tract, olsem tufala smol seed wea olketa plantim, garem rut and grow big for kamap wanfala kongregeson. Distaem datfala Manaquiri Kongregeson wea stap for 83 year, hem no wanfala kongregeson nomoa lo Amazonas State bat hem wanfala lo 143 kongregeson lo there.

“SMOL SEKSON” WEA KAMAP “WANFALA MAETI NATION”

“OLKETA wea no staka bae kamap wan thousand, and olketa wea smol sekson nomoa bae kamap wanfala maeti nation. Mi Jehovah, bae mi mekem datwan for happen kwiktaem long taem bilong hem.” (Isa. 60:22, NW) Hao nao datfala profesi kamap tru? Hao nao wei wea disfala profesi kamap tru, hem affectim olketa brata and sista blo iumi raonem world wea worshipim Jehovah for longtaem finis?

Börje Nilsson (84 years old, and baptaes lo 1943) sei: “Mi tingim wanfala anointed brata wea hem wanfala colporteur lo olketa year blo 1920. Taem hem kasem assignment blo hem wea hem haf lo kantri lo Sweden, hem willing and preach. And gud samting kamaot from preaching waka wea hem and olketa nara faithful brata duim! Distaem, mifala garem winim 22,000 pablisa. Nomata distaem mi olo, mi laek for gohed faithful lo waka blo Jehovah. Iumi no sapraes wanem nao Jehovah laekem iumi for duim!”

Etienne Esterhuyse (83 years old, and baptaes lo 1942) sei: “Distaem, taem mi ting go bak, mi sapraes tumas for savve namba lo pipol blo Jehovah lo South Africa hem go ap from 1,500 lo year 1942, and distaem namba hia go ap winim 94,000. For part lo wanfala bigfala organization olsem, hem barava strongim faith blo mi!”

Keith Gaydon (82 years old, and baptaes lo 1948) sei: “Taem mi lukim namba blo olketa pablisa lo Britain go ap from samting olsem 13,700 lo 1948, and distaem, hem klosap kasem 137,000 pablisa, datwan pruvim hao disfala waka hem blo Jehovah. Man no savve duim lo strong blo hemseleva, bat Jehovah nao ‘duim olketa nambawan samting’” hia.—Ex. 15:11, NW.

Ulrike Krolop (77 years old, and baptaes lo 1952) sei: “Bihaen World War II, olketa kongregeson lo Germany kasem strong moa from olketa Witness wea no givap nomata olketa kasem persecution from Nazi. Pipol needim samwan for comfortim olketa, so mifala savve comfortim olketa bikos mifala no tek part insaed datfala war. Winim 60 year go finis, mi luksavve hao spirit blo God leadim pipol blo hem. Nambawan samting kamaot from diswan, distaem mifala garem winim 164,000 Witness!”

Mariya Brinetskaya (77 years old, and baptaes lo 1955) sei: “Mi baptaes lo naet mekem olketa no arrestim mi. Bihaen, from hasband blo mi hem wanfala Witness olketa sendem lo wanfala prison wea stap farawe. So mi careful and gohed preach lo vilij blo mi lo hia lo Russia, and samfala lo olketa neiba blo mi acceptim truth. Lo datfala taem, olketa brata and sista no staka. Bat mi hapi bikos distaem winim 168,000 Witness nao lo Russia!”

Kimiko Yamano (79 years old, and baptaes lo 1954) sei: “Lo 1970, mi herem mifala garem 10,000 pablisa lo Japan, mi barava hapi gogo mi krae nao, diswan muvim mi for promis moa lo Jehovah, ‘Lo full laef blo mi, mi bae faithful lo iu.’ Mi barava hapi, bikos distaem mifala garem winim 216,000 pablisa!”

Daniel Odogun (83 years old) sei: “Taem mi baptaes lo 1950, Nigeria garem 8,000 pablisa. Distaem, Nigeria garem samting olsem 351,000 pablisa! Lo olketa assembly, mi hapi tumas for lukim staka savve attend, diswan mekem mi tingim Haggai 2:7, NW. Jehovah nao sekem evri nation, and olketa spesol samting kam insaed lo organization. Mi traem best blo mi for gohed duim preaching waka, bikos preaching waka hem wanfala wei for mi savve sei, ‘Thankiu, Jehovah!’”

Carlos Silva (79 years old) sei: “Taem mi baptaes lo 1952, mifala garem 5,000 Witness lo Brazil. Lo datfala year, mifala garem assembly lo wanfala ples for pleim sport, lo Sao Paulo. Tufala car nomoa lo ples for parkim trak. Wanfala brata point go lo Pacaembu Stadium, wea stap klosap and askem mi, ‘Hao, iu tingse enitaem bae iumi fulimap datfala stadium?’ Luk olsem hem hard, bat lo 1973 datfala stadium fulap lo 94,586 wea attend! Distaem mifala garem winim 767,000 brata and sista lo Brazil. Hem gud tumas for lukim namba hia kamap big!”

Carlos Cázares (73 years old) sei: “Lo 1954, taem mi baptaes, Mexico garem 10,500 pablisa. From bigfala need stap for staka wakaman, mi kasem appointment for circuit overseer taem mi 21 years old. Hem wanfala blessing for lukim profesi lo Isaiah 60:22, NW hem kamap tru. Distaem, mifala garem winim 806,000 pablisa, and olketa conductim winim wan million Bible study! Diswan hem spesol tumas!”