“Sevem Iuseleva and Olketa wea Lisin Long Iu”

“Lukluk gud evritaem long iuseleva and teaching bilong iu. . . . Sapos iu duim olsem iu bae sevem iuseleva and olketa wea lisin long iu.”—1 TIMOTHY 4:16.

1, 2. Wanem nao muvim olketa tru Christian for go ahed long waka bilong olketa for sevem laef?

LONG wanfala farawe vilij long north part bilong Thailand, wanfala hasband and waef wea Jehovah’s Witness traem languis wea tufala just lanem long samfala member bilong wanfala hill tribe. For sharem gud nius abaotem Kingdom bilong God witim pipol bilong datfala vilij, datfala hasband and waef lanem Lahu languis.

² “Hem hard for storyim hapi and wei for satisfae wea mifala kasem, taem mifala waka midol long olketa interesting pipol hia,” datfala hasband hem talem. “Mifala feel olsem mifala insaed wei wea Revelation 14:6, 7 hem fulfill, for talemaot hapi nius ‘long evri nation and tribe and languis.’ Samfala ples nomoa gud nius no kasem yet, and diswan hem wanfala. Mifala garem planti Bible study and klosap no inaf taem for evriwan.” Tru nao, datfala hasband and waef hope for sevem no tufala seleva nomoa bat pipol wea lisin long tufala tu. Olsem olketa Christian, waswe, iumi no hope for duim sem samting?

“Lukluk Gud Evritaem Long Iuseleva”

3. For sevem nara pipol, wanem nao iumi mas duim firstaem?

³ Kaonsel bilong aposol Paul long Timothy for, “Lukluk gud evritaem long iuseleva and teaching bilong iu,” hem fitim evri Christian. (1 Timothy 4:16) Tru nao, for helpem nara pipol for kasem salvation, firstaem iumi mas lukluk gud long iumiseleva. Hao nao iumi savve duim diswan? Wanfala samting, iumi mas go ahed for wekap long disfala taem iumi stap insaed. Jesus givim saen wea garem planti part mekem olketa follower bilong hem bae savve wanem taem nao “taem bilong end bilong disfala system.” Nomata olsem, Jesus sei tu hao iumi bae no savve long barava taem wea datfala end bae kam. (Matthew 24:3, 36) Hao nao datwan shud muvim iumi?

4. (a) Wanem tingting nao iumi mas garem abaotem taem bilong disfala system wea stap yet? (b) Wanem kaen tingting nao iumi mas stap klia long hem?

⁴ Iumi wanwan savve ask olsem, ‘Waswe, mi iusim taem bilong disfala system wea stap yet for sevem miseleva and olketa wea lisin long mi? Or mi tingting olsem, “From iumi no savve long barava taem wea end bae kam, bae mi forgetim nomoa”?’ Mek-tu tingting olsem hem danger. Hem againstim strongfala advaes wea Jesus givim: “Iufala tu mas redy evritaem, bikos long hour wea iufala no tingim, Son bilong man bae kam nao.” (Matthew 24:44) Tru nao, diswan hem no taem for lusim strong bilong iumi for service bilong Jehovah or for luk long world for sef living and wei for satisfae.—Luke 21:34-36.

5. Wanem example nao olketa witness bilong Jehovah bifor Christian taem showimaot?

⁵ Narafala wei wea iumi showimaot iumi lukluk gud long iumiseleva hem for faithful for go ahed olsem wanfala Christian. Olketa servant bilong God long bifor go ahed strong, nomata olketa tingim God bae sevem olketa kwiktaem or nomoa. Bihaen Paul talem samfala example bilong olketa witness wea stap bifor Christian taem, olsem Abel, Enoch, Noah, Abraham, and Sarah, hem sei: “Olketa no kasem olketa promis wea fulfill, bat olketa lukim olketa stap farawe and hapi and talemaot long pablik hao olketa nao stranger and pipol wea stap for lelebet taem nomoa long datfala land.” Olketa no followim eni feeling for laekem isi living, or foldaon long hevi for duim dirty fasin wea raonem olketa, bat olketa luk forward long “olketa promis wea fulfill.”—Hebrews 11:13; 12:1.

6. Hao nao tingting bilong olketa Christian long first century abaotem salvation affectim living bilong olketa?

⁶ Olketa Christian long first century ting long olketa seleva olsem “stranger” long disfala world. (1 Peter 2:11) Bihaen olketa sev thru long taem wea Jerusalem finis evribit long 70 C.E., olketa tru Christian no finis for preach or go bak followim living bilong world. Olketa savve bigfala salvation stap yet for olketa wea stap faithful. Tru nao, kasem 98 C.E., aposol John raet olsem: “World hem redy for finis and evri samting wea hem wantem tu, bat man wea duim will bilong God bae stap olowe.”—1 John 2:17, 28.

7. Hao nao Olketa Jehovah’s Witness showimaot olketa go ahed strong long distaem?

⁷ Long distaem, Olketa Jehovah’s Witness go ahed strong tu long Christian waka, nomata olketa kasem barava nogud persecution. Waswe, wei wea olketa go ahed strong hem hard waka nating? Nomoa nao, from Jesus promisim iumi: “Man wea go ahed strong kasem end nao bae sev,” nomata datwan hem end bilong disfala old system or end long laef bilong iumi. Long resurrection, Jehovah bae rememberim and givim reward long evri faithful servant bilong hem wea dae finis.—Matthew 24:13; Hebrews 6:10.

8. Hao nao iumi savve showimaot iumi tinghae long wei wea olketa Christian bifor go ahed strong?

⁸ And tu, iumi hapi bikos olketa faithful Christian bifor no tingim salvation bilong olketa seleva nomoa. Iumi wea lane abaotem Kingdom bilong God from hard waka bilong olketa, iumi tinghae tumas long wei wea olketa go ahed strong for obeyim disfala komand bilong Jesus: “Dastawe go and mekem disaepol long pipol bilong evri nation, . . . teachim olketa for duim evri samting wea mi komandim long iufala.” (Matthew 28:19, 20) Taem iumi still garem chance, iumi savve showimaot thankiu taem iumi preach long nara pipol wea no herem gud nius yet. Bat, preaching waka hem first step nomoa for mekem disaepol.

‘Lukluk Gud Long Teaching Bilong Iu’

9. Hao nao wei for tingim gud saed savve helpem iumi for startim olketa Bible study?

⁹ Assignment bilong iumi hem no for preach nomoa bat for teach tu. Jesus appointim iumi for teachim pipol for duim evri samting wea hem komandim. Tru, long samfala territory, samfala pipol nomoa laek for lane abaotem Jehovah. Bat wei for garem nogud tingting abaotem territory savve holem iumi bak for startim olketa Bible study. Yvette, wanfala sista wea pioneer long territory wea samfala sei no eniwan interest, hem luksavve hao olketa wea visit kam long there, wea no garem kaen nogud tingting olsem, olketa startim hom Bible study. Bihaen hem changem tingting for luk long gud saed bilong samting, Yvette tu faendem pipol wea laek for studyim Bible.

10. Wanem nao main waka bilong iumi olsem pipol wea teachim Bible?

¹⁰ Samfala Christian maet hol bak for offerim Bible study long olketa wea interest bikos olketa ting olketa no savve conductim wanfala study. Hem tru, iumi garem difren kaen savve. Bat iumi no needim barava bigfala savve for win olsem teacher long Word bilong God. Klin message bilong Bible hem garem paoa, and Jesus sei pipol wea olsem sheep bae savve long voice bilong tru Shepherd taem olketa herem. So, responsibility bilong iumi hem for talemaot long klia wei datfala message bilong Gudfala Shepherd, Jesus.—John 10:4, 14.

11. Hao nao iumi savve kamap moabeta for helpem wanfala Bible student?

¹¹ Hao nao iumi savve talemaot message bilong Jesus long wei wea moabeta? First samting, iuseleva mas savve long wanem Bible talem abaotem datfala subject wea iufala bae storyim. Iuseleva mas minim wanfala subject bifor iu savve teachim long nara pipol. And tu, trae for garem wei bilong respect witim wei for fren tu long taem bilong study. Olketa student, and smol pikinini tu, savve isi for lanem samting taem olketa relax and teacher showimaot respect and hem kaen long olketa.—Proverbs 16:21.

12. Hao nao iu savve mek sure wanfala student minim wanem iu teachim long hem?

¹² Olsem wanfala teacher, iu no laek for talem information nomoa for student savve baeheartim. Helpem hem for minim wanem hem lanem. Education bilong student, living, and savve bilong hem long Bible bae affectim wei wea hem minim samting wea iu talem. So, iu savve askem iuseleva, ‘Waswe, hem kasem barava point bilong olketa scripture wea insaed long study?’ Iu savve kasem tingting bilong hem taem iu askem kwestin wea hem kanduit ansarem witim yes or no bat needim for hem explainim. (Luke 9:18-20) Long narasaed, samfala student hol bak for askem kwestin long teacher. So, olketa go ahed nomoa nomata olketa no minim wanem nao teacher hem talem. Encouragem student for askem kwestin and for talem iu taem hem no minim gud eni point.—Mark 4:10; 9:32, 33.

13. Hao nao iu savve helpem student for kamap wanfala teacher?

¹³ Wanfala important goal for conductim Bible study hem for helpem student kamap wanfala teacher. (Galatians 6:6) For duim datwan, taem iu reviewim study bilong iutufala, iu savve askem hem for explainim wanfala point long simpol wei, duim olsem hem explainim long samwan wea no savve long diswan. Bihaen, taem hem kamap fit for join insaed long ministry, iu savve invaetem hem for go witim iu long field service. Hem bae feel moa free for waka witim iu, and datwan bae helpem hem for mekem grow wei for no fraet go kasem taem hem redy for go aot seleva insaed long ministry.

Helpem Student for Kamap Fren Bilong Jehovah

14. Wanem nao main goal bilong iu olsem wanfala teacher, and wanem nao bae helpem iu for kasem datwan?

¹⁴ Main goal bilong evri Christian teacher hem for helpem student for fren witim Jehovah. Iu savve duim diswan no long toktok nomoa bat long example bilong iu tu. Example bilong iu hem savve affectim heart bilong student wea iu teachim long strong wei. Akson garem moa paoa winim toktok, especially long wei for putim stretfala fasin and strong insaed student. Sapos hem lukim wei wea toktok and akson bilong iu kamaot from wei for fren gud witim Jehovah, diswan savve muvim hem for mekem grow semkaen wei for fren tu.

15. (a) Why nao hem important for student mekem grow stretfala reason for servem Jehovah? (b) Hao nao iu savve helpem student for muv ahed long spiritual wei?

¹⁵ Iu laekem datfala student for servem Jehovah, no bikos hem no laek dae long Armageddon, bat bikos hem lovem Jehovah. Taem iu helpem hem for mekem grow stretfala reason for muvim hem, iu barava build witim material wea fire no savve burnim wea bae stand strong long olketa test bilong faith bilong hem. (1 Corinthians 3:10-15) Wanfala rong reason, olsem wei for laek tumas for hem followim iu or nara man, bae no strongim hem for againstim olketa samting wea no fitim Christian or garem strong for duim stret samting. Remember, iu bae no teacher bilong hem for olowe. Taem iu garem chance, iu savve encouragem hem for kamap klos long Jehovah long wei for readim Word bilong God evriday and tingting raonem. Long wei olsem hem bae go ahed for kasem evribit “plan bilong healthy toktok” from Bible and olketa Bible buk for planti year bihaen iu study witim hem.—2 Timothy 1:13.

16. Hao nao iu savve teachim student for prea from heart?

¹⁶ Iu savve helpem student for kamap klos long Jehovah tu taem iu teachim hem for prea from heart. Hao nao iu savve duim diswan? Maet iu savve showim hem example prea bilong Jesus, and tu planti prea wea stap insaed Bible, olsem long olketa psalm. (Psalms 17, 86, 143; Matthew 6:9, 10) And tu, taem student herem iu prea for startim and finisim study, hem luksavve long feeling bilong iu for Jehovah. So, prea bilong iu mas evritaem showimaot iu bilivim samting wea iu talem and iu feel free for talem, and hem balance tu long spiritual wei and saed bilong feeling.

Waka for Sevem Pikinini Bilong Iu

17. Hao nao dadi and mami savve helpem pikinini for stap long road bilong salvation?

¹⁷ Insaed olketa wea iumi laek for sevem tu hem olketa famili member bilong iumi. Staka pikinini bilong olketa Christian dadi and mami olketa “strong long faith.” Bat, for olketa narawan, truth maet no stap deep insaed heart bilong olketa. (1 Peter 5:9; Ephesians 3:17; Colossians 2:7) Planti long olketa young wan hia lusim Christian wei taem olketa growap. Sapos iu wanfala dadi or mami, wanem nao iu savve duim for missim diswan? First samting, iu savve duim samting for mekem famili living hem gud. Gudfala famili living hem mekem faondeson for garem gudfala tingting abaotem olketa wea garem paoa, for tinghae long stret fasin, and for fren gud witim nara pipol. (Hebrews 12:9) Long wei olsem, wei for feel klos insaed long famili savve kamap olsem graon for mekem grow wei wea pikinini fren witim Jehovah. (Psalm 22:10) Olketa strong famili duim samting tugeta—nomata dadi and mami mas sakrifaesim taem wea tufala savve iusim for samting bilong seleva. Long disfala wei iu bae showimaot example wea bae teachim olketa pikinini bilong iu for disaedem stret samting long living. Dadi and mami, samting wea olketa pikinini bilong iu barava needim from iu nao, no material samting, bat iu—taem, strong, and love bilong iu. Waswe, iu go ahed for givim olketa samting hia long pikinini bilong iu?

18. Wanem nao olketa kwestin wea dadi and mami mas helpem pikinini for faendem ansa long olketa?

¹⁸ Christian dadi and mami mas no tingse from tufala nao Christian, pikinini bilong tufala bae kamap Christian tu. Daniel, wanfala elder wea garem faevfala pikinini sei olsem: “Dadi and mami mas iusim taem for aotem olketa daot wea pikinini bilong tufala mas herem long skul and nara ples. Tufala mas patient for helpem pikinini bilong tufala faendem ansa long olketa kwestin olsem: ‘Waswe, iumi really stap long taem bilong end? Waswe, wanfala tru religion nomoa stap? Why nao wanfala skulfren wea luk olsem hem naes pikinini hem nogud for kaban witim? Waswe, hem rong evritaem for duim sex bifor marit?’” Dadi and mami, iu savve depend long Jehovah for blessim hard waka bilong iu, bikos hem tu interest long gud living bilong olketa pikinini bilong iu.

19. Why nao hem best for dadi and mami seleva nao study witim pikinini bilong tufala?

¹⁹ Samfala dadi and mami maet feel olsem olketa no fit for study witim pikinini bilong olketa seleva. Bat, iu no need for feel olsem, bikos no eniwan savve fit olsem iu for teachim gud pikinini bilong iu. (Ephesians 6:4) Wei for iuseleva study witim pikinini hem letem iuseleva for lukim wanem nao insaed heart and mind bilong olketa. Waswe, olketa toktok from heart or olketa talem from hed nomoa? Waswe, olketa barava bilivim wanem olketa lanem? Waswe, Jehovah hem trufala man long olketa? Iu savve faendem ansa long olketa hia and narafala important kwestin only sapos iu nao study witim olketa pikinini bilong iu.—2 Timothy 1:5.

20. Hao nao dadi and mami savve mekem evriwan enjoyim famili study and kasem gud samting from datwan?

²⁰ Hao nao iu savve mekem famili study program bilong iu go ahed bihaen iu startim? Joseph, wanfala elder wea garem young son and dota, hem sei olsem: “Olsem evri Bible study, famili study shud olsem samting for enjoyim, samting wea evriwan luk forward long hem. For duim datwan insaed famili bilong mifala, mifala no strict tumas long taem. Study bilong mifala maet go ahed for wan hour, bat nomata sapos samfala taem mifala garem ten minute nomoa, mifala still study. Wanfala samting wea mekem study bilong mifala olsem haelaet long week for olketa pikinini hem from mifala actim olketa story insaed Bible Story Buk bilong mi.a Wei wea samting go deep insaed and savve wea olketa kasem from diswan hem moa important winim haomas paragraf nao mifala duim.”

21. Wanem taem nao dadi and mami savve teachim pikinini bilong tufala?

²¹ Tru, taem bilong study hem no only taem for teachim olketa pikinini bilong iu. (Deuteronomy 6:5-7) Witness long Thailand wea iumi storyim long start hem sei: “Mi barava rememberim hao Dadi savve tekem mi go long preaching waka, long bicycle bilong mifala, long farawe territory bilong kongregeson bilong mifala. Tru nao, gudfala example and wei wea dadi and mami teachim mifala evritaem hem nao helpem mifala for disaed for go insaed long full-taem ministry. Luk olsem mi no forgetem example hia. Mi waka yet long olketa farawe ples bilong field!”

22. Wanem nao bae kamaot from wei wea iu ‘lukluk gud long iuseleva and teaching bilong iu’?

²² Klosap nao, long barava taem, Jesus bae kam for givim judgment bilong God long disfala system. Then datfala big samting wea happen bae kamap history long universe, bat olketa faithful servant bilong Jehovah bae go ahed for servem hem witim hope for kasem salvation for olowe. Waswe, iu hope for stap midolwan long olketa, witim olketa pikinini and Bible student bilong iu? Sapos olsem, remember: “Lukluk gud evritaem long iuseleva and teaching bilong iu. Followim olketa samting hia, from sapos iu duim olsem iu bae sevem iuseleva and olketa wea lisin long iu.”—1 Timothy 4:16.

[Footnote]

Waswe, Iu Savve Minim?

• Iumi shud garem wanem tingting from iumi no savve long barava taem bilong judgment bilong God?

• Wanem nao olketa wei wea iumi savve ‘lukluk gud long teaching bilong iumi’?

• Hao nao iu savve helpem wanfala student for kamap fren bilong Jehovah?

• Why nao hem important for dadi and mami iusim taem for teachim pikinini bilong tufala?

[Piksa long page 15]

Hem moa isi for lane sapos wei bilong respect witim wei for fren tu hem stap

[Piksa long page 18]

Wei for actim olketa Bible story, olsem taem Solomon judgem tufala jury woman, mekem evriwan enjoyim famili study