Stap Loyal Long Jehovah

LOYAL FASIN, nomata hem hard for faendem distaem, hem wanfala fasin wea showaot klia long olketa servant bilong trufala God, Jehovah. Man wea loyal hem stap strong thru long olketa test and hem stedy nomoa nomata planti taem go pas. Tingim gudfala King Hezekiah. Bible hem sei: “Bihaen long hem no eniwan olsem hem stap midolwan long evri king bilong Judah, nomata olketa wea stap bifor long hem tu.” Wanem nao mekem Hezekiah hem difren? Hem “stap klos long Jehovah,” nomata hem stap midolwan pipol wea worshipim datfala giaman god Molech. Tru nao, Hezekiah “nating tanawe from wei for followim [Jehovah], bat hem go ahed for keepim olketa komandment bilong hem.”—2 Kings 18:1-6.

Aposol Paul hem narawan wea go ahed for stap loyal long Jehovah. Record long ministry bilong hem insaed Christian Greek Scripture givim strongfala pruv hao Paul hem go ahed for stand strong taem hem duim holy service long God witim full soul. Klosap long end long laef bilong hem long earth, Paul savve sei olsem abaotem hemseleva: “Mi faet long nambawan faet finis, mi ran go kasem end, mi keepim faith finis.”—2 Timothy 4:7.

Loyal fasin bilong Hezekiah and Paul hem barava nambawan example for iumi! Letem iumi go ahed for followim faith bilong tufala taem iumi go ahed for stap faithful long Nambawan God bilong iumi, Jehovah.—Hebrews 13:7.