Wea Nao Iu Savve Tan Go for Gudfala Advaes?
Olketa “bisnis for givim advaes” distaem kamap bigfala billion dollar bisnis evri year. Pipol laekem help. Wanfala savveman saed long tingting bilong man, Heinz Lehmann, hem sei: “Olketa problem saed long education and living stap [long community tuday]. Tingting saed long lotu no mas strong olsem bifor. Olketa famili no mas stedy . . . , and from diswan olketa pipol no feel sef.” Eric Maisel, man for raet, hem sei: “Olketa wea bifor tan go long hedman bilong tribe, pastor or doctor for help saed long mind, spiritual and physical problem distaem tan go for ansa insaed olketa buk for helpem man.”
AMERICAN Psychological Association wakem wanfala grup for lukluk long disfala bisnis wea go ahed for grow. Olketa sei hem tru hao “planti need stap for helpem pipol for savve gud long olketa seleva and nara pipol . . . , planti toktok wea pipol talemaot and title bilong olketa program hia hem start for ova tumas nao.” Wanfala man wea raet long Toronto Star hem sei: “Pipol mas luksavve hao staka giaman religion or spiritual grup nao stap. . . . Lukaot gud especially long olketa buk, kaset or toktok wea promisim tumas samting, insaed short taem tumas, for barava smol waka nomoa.” Hem tru, planti pipol stap wea laek for barava helpem pipol wea garem need. Bat, sorre samting olketa conman tu savve conim pipol wea stap seleva or safa, and no givim trufala help or ansa.
From diswan, wanem nao main help wea iumi savve trustim? Wea nao iumi savve faendem kaonsel wea bae waka evritaem?
Source Bilong Gaed wea No Savve Fail
Wanfala man for preach from America long mek-19 century, Henry Ward Beecher hem sei: “Bible hem map bilong God for iu stia followim, for keepim iu from botom sea, and for showim iu wea nao harbor, and for no bangam reef taem iu go for hem.” Nara man sei olsem abaotem Bible: “No eniwan garem moa savve winim Bible; datfala buk hem kamap moa waed and deep taem iumi iusim moa and moa.” Why nao iu shud tingting gud abaotem diswan?
Bible sei olsem abaotem hemseleva: “Evri Scripture kam from God and gud for teach, for givim kaonsel, for stretem evri samting, for givim discipline long raeteous fasin, mekem man bilong God hem fit evribit, barava redy for duim evri gudfala waka.” (2 Timothy 3:16, 17) Evriting insaed Bible kam from barava Source bilong laef, Jehovah God. (Psalm 36:9) Dastawe hem savve gud long wanem nao insaed long iumi, olsem Psalm 103:14 talem iumi: “Hem savve gud hao hem wakem iumi, hem tingim hao iumi dust.” So, iumi savve garem full trust long Bible.
For tok stret, Bible garem planti principle and gaedlaen wea iumi savve iusim for enikaen living wea iumi maet feisim. Thru long hem, God sei long iumi: “Diswan nao wei. Wakabaot long hem, iufala pipol.” (Isaiah 30:21) Waswe, Bible savve barava satisfaem need bilong pipol tuday? Letem iumi lukim.
Bible Givim Samting Iumi Needim . . .
For Deal Witim Wari. Bible talem iumi: “No wari long eni samting, bat long evri samting thru long prea and wei for barava askem witim wei for sei thankiu, talem evri samting long God; and peace bilong God wea winim evri tingting bilong man bae gardim heart and tingting bilong iufala thru long Christ Jesus.” (Philippians 4:6, 7) Waswe, prea hem gud for deal witim feeling for wari saed long hardfala living, trabol saed long sex and toktok, or taem wanfala wea iumi lovem hem dae? Tingim experience hia.
Jackie, bihaen hem savve abaotem wei wea olketa spoelem dota bilong hem saed long sex, hem sei: “No eni toktok savve minim guilty feeling wea man garem from hem no garem paoa for protectim pikinini bilong hem. Mi faet evritaem witim feeling bilong saoa tumas, and kros. Olketa feeling hia start for poisonim laef bilong mi. Mi barava needim Jehovah for gardim heart bilong mi.” Bihaen hem readim and readim moa Philippians 4:6, 7, hem trae hard for followim datfala kaonsel. “Mi prea evriday, evritaem mi askem Jehovah for no letem nogud feeling for spoelem mi, and Jehovah hem helpem mi for garem heart wea kwaet and hapi. Mi barava feelim peace insaed long mi,” Jackie hem talem.
Iu tu maet kasem hevi wea winim paoa bilong iu for kontrolem or stretem and wea mekem iu wari tumas. Taem iu followim kaonsel bilong Bible for prea, iu savve deal witim long gudfala wei. Man wea raetem Psalm encouragem iumi witim olketa toktok hia: “Putim gogo bilong iu long Jehovah, and depend long hem, and hem nao bae duim samting.”—Psalm 37:5.
For Encouragement. Man wea raetem Psalm showimaot wei for tinghae olsem: “Jehovah, mi laekem tumas for stap long haos bilong iu and ples wea glory bilong iu stap. Leg bilong mi bae barava standap long level ples; midolwan long olketa pipol wea hipap tugeta mi bae blessim Jehovah.” (Psalm 26:8, 12) Bible encouragem iumi for evritaem hipap tugeta for worshipim Jehovah. Hao nao wei for hipap olsem savve satisfaem olketa need bilong iu? Wanem nao nara pipol faendem?
Becky tok olsem: “Dadi and mami bilong mi no servem Jehovah, so olketa givim mi hard taem taem mi trae for duim eniting saed long service for God. For go long meeting hem big samting long mi.” Becky savve hem kasem planti blessing from wei wea hem barava trae hard for attendim olketa meeting evritaem. “Olketa meeting strongim faith bilong mi, mekem mi savve stand strong long olketa hevi wea mi feisim evriday olsem wanfala student, dota, and servant bilong Jehovah. Olketa pipol long Kingdom Hall barava difren from olketa student long skul! Olketa savve kea and help, and story bilong mifala evritaem encouragem mi. Olketa barava trufala fren.”
Tru nao, taem iumi followim instruction bilong Bible for go long meeting evritaem, Jehovah bae satisfaem need bilong iumi for kasem encouragement. There nao iumi lukim toktok bilong man wea raetem Psalm hem kamap tru: “For iumi God hem wanfala ples for haed and wanfala strong, wanfala help wea isi for faendem long taem bilong trabol.”—Psalm 46:1.
For Kasem Waka Wea Satisfae and Fitim. Bible hem sei: “Stand strong, no seksek, garem planti samting for duim insaed long waka bilong Lord, from iufala savve iufala no hard waka nating long saed long Lord.” (1 Corinthians 15:58) Waswe, man savve barava satisfae long “waka bilong Lord”? Waswe, Christian waka savve kasem gudfala samting?
Amelia talem feeling bilong hem: “Mi studyim Bible witim tufala wea klosap nomoa for separate. Mi helpem tu mami bilong wanfala girl wea olketa killim dae long barava nogud wei. Woman hia wari tumas from hem no savve wanem nao happen long olketa wea dae finis. Long tufala story evriwan, wei for followim Bible principle givim peace and hope long laef bilong olketa. Mi barava feel hapi and satisfae bikos mi duim samting for helpem olketa.” Scott hem sei: “Sapos iu garem naes taem long preaching, startim wanfala niu Bible study, or garem gudfala experience saed long wei for preach long enitaem, iu bae tok abaotem for planti year long future. Datfala sem feeling savve kamap evritaem iu story abaotem! Preaching waka hem samting wea man savve kasem bigfala hapi long hem wea stap for longtaem.”
Hem klia tumas, wei for followim kaonsel bilong Bible for kamap strong long wei for preach hem satisfaem need bilong olketa hia for faendem waka wea mekem olketa hapi. Iu tu savve share long disfala waka for teachim nara pipol abaotem olketa wei and principle bilong God, and long semtaem kasem gudfala samting for iuseleva.—Isaiah 48:17; Matthew 28:19, 20.
Kasem Gudfala Samting From Word Bilong God
Tru tumas, iumi savve trustim hao toktok bilong Bible hem barava waka long world tuday. For kasem gud samting from diswan, iumi need for waka hard evritaem. Iumi mas readim, studyim, and tingting strong long hem evritaem. Paul sei: “Ting raonem evri samting hia; tingting strong long olketa, mekem wei wea iu muv ahed savve showaot long evriwan.” (1 Timothy 4:15; Deuteronomy 11:18-21) God promisim hao sapos iu trae for followim olketa kaonsel bilong hem wea stap insaed long Bible, iu bae win. Hem promis olsem: “Trust long Jehovah . . . Long evri wei bilong iu, lisin long hem, and hemseleva nao bae stretem gogo bilong iu.”—Proverbs 3:5, 6.
[Piksa long page 31]
Wei for followim kaonsel bilong Bible hem mekem laef hem satisfae and garem mining