Sev Long Robinson Crusoe Island

ROBINSON CRUSOE hem wanfala long thrifala island long Pacific Ocean wea part long wanfala grup island wea olketa kolem Juan Fernández, wea stap samting olsem 640 kilometer from saed sea bilong Chile.a Datfala 93-square-kilometer island tekem nem bilong hem from wanfala story buk long mek-18 century wea garem title Robinson Crusoe, wea datfala man bilong England for raet, Daniel Defoe, hem raetem. Luk olsem datfala raeting kam from laef story bilong wanfala man bilong Scotland, Alexander Selkirk, wea hem stap seleva for fofala year long datfala island.

Wanfala timba saen long island hia hem sei: “Long disfala ples, for winim fofala year, datfala sailor-man bilong Scotland, Alexander Selkirk hem lukaot go long sea for eni boat for sevem hem from wei wea hem stap seleva.” Gogo, olketa sevem Selkirk and tekem hem go bak long hom bilong hem, wea hem no satisfae long hem moa bihaen hem stap long smol paradaes bilong hem. Bihaen hem sei: “Island bilong mi wea mi lovem tumas! Mi wish nomoa mi nating lusim iu!”

Samfala taem bihaen, olketa iusim datfala island for keepim olketa prisoner long hem, wea samfala pipol wea “brekem law bilong faith” againstim Catholic Church stap long there. Hem barava change from paradaes island wea Selkirk savve long hem! Bat, pipol wea stap long datfala island distaem, enjoyim wanfala kwaet laef bilong peace wea pipol from planti part long world no garem. Datfala kwaet living wea planti island garem, mekem hem isi for startim story witim eniwan nomoa.

Olketa report sei Robinson Crusoe garem samting olsem 500 pipol, bat evritaem insaed long year, samting olsem 400 pipol nomoa stap long datfala island. Reason nao hem bikos samfala mami and pikinini stap long mainland bilong Chile long taem for skul, and kam bak long disfala island long olketa month bilong holiday for spendem taem witim olketa narawan insaed famili.

Nomata Robinson Crusoe garem naes garden evriwea, samfala pipol long island hia feel olsem olketa emti long spiritual wei and lukaotem ansa. Samfala feel olsem olketa need for kamap free long spiritual wei.

Wanfala Wei for Sev Long Spiritual Wei

Disfala wei for sev long spiritual wei hem start long samting olsem 1979. Wanfala woman wea studyim Bible witim Olketa Jehovah’s Witness long Santiago, Chile, hem muv go long datfala island and start for teachim long nara pipol samting wea hem lanem. Samfala taem bihaen wanfala kongregeson elder wea visitim datfala island for waka for selen sapraes tumas for faendem wanfala smol grup bilong Bible student go ahed gud long spiritual wei witim help bilong datfala woman. Taem datfala elder visitim moa datfala island thrifala month bihaen, datfala Bible teacher and tufala student bilong hem olketa redy for baptaes nao, so disfala elder baptaesim olketa. Bihaen, wanfala long olketa niu Christian hia wea just baptaes hem marit and hem go ahed witim hasband bilong hem for lukaotem olketa nara pipol wea need for sev long spiritual wei. Hasband bilong hem tekem lead for buildim wanfala naes Kingdom Hall, wea smol grup long island hia go ahed for iusim. Gogo, from problem saed long selen, olketa lusim Robinson Crusoe and muv go long wanfala kongregeson long midol Chile, and olketa go ahed strong for servem Jehovah.

Isisi, disfala smol grup long island hia go ahed for grow taem olketa sevem olketa narawan from giaman religion. Bat, from olketa student mas muv go long main land for kasem hae skul, namba bilong disfala grup go daon gogo tufala sista wea baptaes and wanfala girl nomoa stap. Datfala grup savve grow moa long taem bilong holiday taem samfala mami kakam bak long datfala island. Diswan savve strongim moa thrifala Christian hia wea stap for full year long there. From hard waka bilong olketa sista hia, pipol long Robinson Crusoe savve gud long Olketa Jehovah’s Witness. For tok stret, samfala pipol long disfala island againstim waka bilong olketa and trae for forcem pipol for rejectim Kingdom message. Nomata olsem, samfala seed bilong Bible truth wea olketa plantim insaed heart bilong pipol wea honest go ahed for grow.

Strongim Pipol wea Sev Finis

Wanfala traveling overseer savve visitim disfala island wanfala taem long wan year. For visitim olketa Witness long wanfala farawe island hem olsem wanem? Wanfala circuit overseer storyim first visit bilong hem long Robinson Crusoe olsem:

“Diswan hem wanfala nambawan gogo. Hem start long 7:00 a.m. taem mifala lusim Valparaiso for draev go long Cerrillos Airport long Santiago. Mifala kasem wanfala smol plane wea savve karem sevenfala passenger. Bihaen mifala flae for 2 hour and 45 minute, mifala lukim wanfala hae maunten farawe wea ovarem cloud. Taem mifala go klosap, mifala lukim datfala island—wanfala naesfala big stone midol long sea. Luk olsem hem float antap long wata, olsem wanfala ship wea hem lus long sea.

“Bihaen mifala land, wanfala boat tekem mifala go long vilij. Olketa big stone kamaot evriwea long sea and mekem olketa smol island kamap olsem ples for rest for olketa Juan Fernández fur seal. Fur seal hem kaen animal long sea wea olketa protectim bikos namba bilong olketa hem barava gogo daon. Seke nomoa wanfala samting hem flae kam long saed bilong boat bifor hem lus insaed sea moa. Hem wanfala flying-fish, wea olketa fin bilong hem luk olsem olketa wing. Luk olsem hem enjoyim wei for jamp aot from wata for kasem olketa insect. Bat samfala taem olketa kasem hem tu; wei wea hem jamp maet pullim interest bilong olketa nara fish wea redy for swallowim hem taem hem start for go bak insaed sea.

“Bihaen, mifala arrive long vilij bilong San Juan Bautista (St. John datfala Baptist). Planti pipol long disfala island standap long wharf, for weitim visitor bilong olketa or just laek for savve hu nao bae arrive distaem. Mifala laekem tumas datfala ples wea barava luk naes—datfala hae steep maunten wea olketa kolem El Yunque (The Anvil), wea luk olsem dark-green carpet kavarem, and bihaen long hem wanfala klia skae wea garem staka white cloud.

“Mifala kwiktaem for luksavve long wanfala grup bilong olketa Christian sista bilong iumi and pikinini bilong olketa weit for mifala long wharf. Hem taem bilong holiday, so datfala grup hem big winim bifor. Bihaen mifala greetim olketa wanwan, olketa tekem mifala go long wanfala naesfala rum wea mifala bae kolem olsem hom bilong mifala for wanfala week.

“Hem barava spesol week, and mifala savve hem bae go pas kwiktaem. Mifala need for iusim gud taem bilong mifala. Datfala sem day, bihaen long lunch, mifala visitim wanfala Bible student wea hem klosap kamap wanfala spiritual sista bilong iumi and kamap part long spiritual paradaes bilong God. Hem luk hapi tumas bat hem lelebet fraet tu. Goal bilong hem for baptaes wea hem weitim for longtaem hem kakam klosap. Mifala story raonem samfala information witim hem mekem hem fit for kamap olsem pablisa bilong gud nius. Long next day, hem share long preaching waka for first taem. Long mek-thri day, mifala story witim hem abaotem olketa mark wea mekem man fit for baptaes. Hem baptaes bifor end bilong datfala week.

“Olketa barava saportim evri meeting wea mifala holem insaed long datfala week, wea 14-fala pipol nao attendim. Evri day mifala garem arrangement for duim field service, olketa return visit, Bible study, and shepherding kol. Wanfala barava encouragement for olketa sista wea go ahed seleva for duim waka bilong olketa insaed full year!”

Hem hard for olketa man long disfala island for lisin long truth, maet bikos waka for selen hem tekem tumas strong bilong olketa. Main waka hem for kasem olketa cray-fish. Wei for apim tingting bilong seleva tu hem nara samting wea mekem planti for no lisin. Nomata olsem, iumi hope long future planti pipol long disfala island, man and woman, bae lisin.

Kam kasem distaem, tenfala pipol nao sev finis long disfala island taem olketa start for savve long truth and olketa purpose bilong Jehovah God. Samfala long olketa lusim disfala island from olketa difren kaen reason. Bat nomata olketa stap or nomoa, wei wea olketa sev long spiritual wei hem winim wei wea Selkirk hem sev. Olketa enjoyim wanfala spiritual paradaes long eniwea olketa stap distaem. Olketa sista hia wea stap long disfala island and pikinini bilong olketa enjoyim olketa naesfala ples long there, bat winim datwan, olketa garem hope for stap taem full earth bae kamap paradaes long really wei.

Waka for Sevem Laef Hem Go Ahed

Disfala smol grup bilong Olketa Jehovah’s Witness long Robinson Crusoe stap farawe from olketa nara spiritual brata and sista bilong olketa. Nomata olsem, olketa nating feel olsem olketa stap seleva. Thru long olketa Bible buk, olketa video abaot olketa assembly and convention wea branch bilong Watch Tower Society long Chile sendem go long olketa thrifala taem long year, and visit bilong circuit overseer evri year, olketa keepim wei for stap klos witim organization bilong Jehovah. So olketa go ahed olsem part bilong ‘full sekson bilong olketa brata long world.’—1 Peter 5:9.

[Footnote]

[Map/​Piksa long page 9]

(lukim pablikeson)

CHILE

Santiago

ROBINSON CRUSOE ISLAND

San Juan Bautista

El Yunque

PACIFIC OCEAN

SANTA CLARA ISLAND

[Piksa]

Taem island hem start for showaot, man savve lukim barava bigfala rock long midol bilong sea

[Credit Line]

Map bilong Chile: Mountain High Maps® Copyright © 1997 Digital Wisdom, Inc.

[Piksa long page 8]

Datfala naesfala maunten wea olketa kolem El Yunque (The Anvil)

[Piksa long page 9]

Vilij bilong San Juan Bautista (St. John datfala Baptist)

[Piksa long page 9]

Olketa smol island stap olsem ples for rest for olketa fur seal and sea lion

[Piksa long page 10]

Mifala flae long wanfala smol plane from Santiago, Chile

[Piksa long page 10]

Saedsea wea raf long Robinson Crusoe Island

[Piksa long page 10]

Smol Kingdom Hall long island