Iu Biliv Long Samting Iu No Savve Lukim?

TAEM samwan sei, ‘Mi biliv nomoa long samting mi savve lukim,’ hem no story abaotem samting wea hem savve lukim nomoa. Tru nao, iumi evriwan bilivim samting iumi no lukim.

Olsem example, long skul maet iu testim wei wea magnetic paoa stap. Maet hem olsem: Iu putim olketa smol pisis iron long wanfala pepa. Then putim pepa antap magnet. Taem iu muvim pepa, olsem magic magnet hem pullim olketa iron hia and mekem pattern bilong datfala magnetic paoa. Sapos iu duim diswan, waswe, iu savve lukim datfala magnetic paoa? Nomoa, bat man lukim klia samting hem duim long olketa iron, wea givim strong pruv hao magnetic paoa hem stap.

Iumi acceptim and nating kwestinim olketa nara samting wea iumi no savve lukim. Taem iumi lukim naesfala painting or laekem wanfala karving, iumi nating daotem hao man for paint or man for wakem karving hem stap. So taem iumi tingim wanfala watafol or lukim sun go daon, waswe, hem no fitim for tingse wanfala Nambawan Savveman for paint or karvem samting nao duim?

Why Samfala No Biliv

Samfala pipol no biliv moa long God from teaching wea olketa kasem long church. Diswan hem tru for wanfala man from Norway wea olketa teachim hem hao God burnim wicked pipol long hellfire. Disfala man barava hard for minim wanem kaen God nao bae mekem pipol safa olsem, so hem kamap man wea no biliv long God.

Bat, bihaen, disfala man agree for studyim Bible, witim help bilong Olketa Jehovah’s Witness. Hem sapraes for lanem hao Bible nating teachim wei wea wicked pipol bae safa insaed hellfire. Bible storyim dae olsem sleep. Insaed grev, iumi no feelim eni pain; iumi nating savve long eni samting. (Ecclesiastes 9:5, 10) Disfala man lanem tu hao pipol wea God judgem olketa olsem wicked pipol bae stap long grev for olowe. (Matthew 12:31, 32) Olketa narawan wea dae bae resurrect long taem wea God markem, witim chance for laef olowe insaed Paradaes. (John 5:28, 29; 17:3) Diswan here stret. Hem agree witim toktok long Bible “God hem love.” (1 John 4:8) Disfala honest man go ahed for studyim Word bilong God and, gogo, hem kamap for lovem God bilong Bible.

Samfala moa rejectim wei wea wanfala loving Creator stap bikos tumas pipol safa and no kasem justice. Olketa agree witim wanfala man from Sweden wea point go long skae and ask: “Hao nao wanfala almighty God wea givim evri samting, stap antap there taem iumi garem staka corruption and wicked fasin daon long hia?” Bikos no eniwan savve ansarem kwestin bilong hem, hem tu kamap man wea no biliv long God. Bihaen, hem start for studyim Bible witim Olketa Jehovah’s Witness. Hem lanem hao Word bilong God provaedem gudfala ansa for disfala kwestin from bifor kam, Why nao God letem wicked fasin for go ahed?a

Disfala honest man lanem hao wei wea wicked fasin stap hem no pruvim hao God no stap. For minim: Wanfala man maet wakem wanfala naef for katem meat. Wanfala man maet baem naef and iusim, no for katem meat, bat for killim man dae. Wei wea hem iusim rong disfala naef nating lelebet pruvim naef hia no garem man wea wakem. Long sem wei, wei wea olketa no iusim disfala earth followim firstfala purpose bilong hem no minim hem no garem Creator.

Bible teachim hao samting wea God wakem hem perfect. Hem “showimaot justice evribit; hem nao raeteous and stret.” (Deuteronomy 32:4) God givim olketa gudfala present long olketa man, bat olketa no iusim stret samfala present hia, wea kosim bigfala wei for safa. (James 1:17) Bat God bae endim wei for safa. From diswan, “olketa wea garem kwaet fasin bae kasem earth, . . . and olketa bae stap olowe long hem.”—Psalm 37:11, 29.

Wei wea olketa man safa hem affectim datfala man bilong Sweden wea iumi storyim finis. Bat feeling bilong hem for kea hem strongim wei wea wanfala God hem stap. Hao nao olsem?

For staka pipol, sapos olketa no biliv long God olketa biliv long evolution. Olketa wea biliv long evolution teach hao “olketa wea strong nomoa bae laef”—hao olketa man and animal trae winim narawan midolwan olketa seleva for stap laef. Strong wan nomoa laef; wik wan dae. Diswan hem natural wei, olketa sei. Bat sapos hem “natural” for olketa wik wan for dae mekem spes stap for olketa wea strong, hao nao iumi savve minim wei wea, olsem datfala man bilong Sweden, samfala strongfala man garem feeling for kea taem olketa lukim nara man hem safa?

Kamap for Savve Long God

Iumi kanduit for lukim God bikos hem no garem body olsem man. Nomata olsem, God wantem iumi for savve long hem. Wanfala wei for iumi savve long hem, hem thru long wei for lukim olketa nambawan samting wea hem wakem—“olketa painting” and “olketa karving” bilong creation. Long Romans 1:20, Bible hem sei: “Olketa fasin bilong [God] wea man no savve lukim, olketa showaot klia start kam long creation bilong world, from olketa showaot long olketa samting wea hem wakem, nomata paoa bilong hem wea olowe and wei wea hem God.” Tru nao, olsem wei for lukluk long wanfala painting or wanfala karving savve helpem iu for savve long fasin bilong man wea mekem, wei for tingting strong raonem olketa nambawan waka bilong God savve helpem iu savve gud moa long olketa fasin bilong hem.

Hem tru, iumi kanduit ansarem evri smol kwestin thru long wei for lukluk nomoa long olketa nambawan samting God creatim. Bat iumi savve faendem olketa ansa long olketa kwestin hia thru long wei for studyim Word bilong God, Bible. Tufala man wea iumi story abaot biliv wanfala God stap and hao hem kea abaotem olketa samting wea happen long iumi from tufala readim Bible witim open mind.

[Footnote]

[Piksa Credit Line long page 28]

J. Hester and P. Scowen (AZ State Univ.), NASA ▸