Plantim Olketa Seed Bilong Kingdom Truth
“Long morning plantim seed bilong iu and go kasem evening no letem hand bilong iu for rest.”—ECCLESIASTES 11:6.
1. Hao nao olketa Christian plantim seed tuday?
AGRICULTURE hem important tumas long Hebrew community bifor. Dastawe Jesus, wea stap long Promis Land for full laef bilong hem, iusim olketa agriculture story insaed olketa tokpiksa bilong hem. Olsem example, hem sei wei for preachim gud nius bilong Kingdom bilong God hem olsem wei for plantim seed. (Matthew 13:1-9, 18-23; Luke 8:5-15) Kasem tuday, nomata iumi stap long ples bilong agriculture or nomoa, wei for plantim spiritual seed nao hem important winim eni nara waka wea olketa Christian duim.
2. Hao important nao preaching waka bilong iumi, and wanem nao samfala samting wea go ahed tuday for helpem diswan?
2 Hem wanfala bigfala privilege for tekpart insaed waka for plantim Bible truth long disfala taem bilong end. Romans 10:14, 15 talem klia hao disfala waka hem important: “Hao nao olketa bae herem sapos no eniwan preach? So, hao nao olketa bae preach sapos no eniwan sendem olketa go? Olsem olketa raetem finis: ‘Leg bilong olketa wea talemaot gud nius bilong olketa gudfala samting hem luk naes tumas!’” Hem important tumas distaem, winim enitaem bifor, for strong witim positive tingting for fulfillim disfala waka wea God givim kam. For datfala reason, Olketa Jehovah’s Witness barava busy evribit for wakem and givimaot olketa Bible and buk for study insaed 340 languis. For redyim disfala samting hem needim 18,000 volunteer long headquarters and olketa branch office long samfala difren kantri. And klosap six million Witness tekpart for givimaot diskaen Bible buk raonem world.
3. Wanem nao kamaot from wei for plantim Kingdom truth?
3 Wanem nao frut bilong disfala hard waka? Olsem taem Christian Wei just start long bifor, planti tuday acceptim truth. (Acts 2:41, 46, 47) Bat, samting wea moa important winim namba bilong olketa wea baptaes hem wei wea disfala bigfala witness help for mekhae long nem bilong Jehovah and for showimaot klia hao hem nao only trufala God. (Matthew 6:9) And tu, savve abaotem Word bilong God hem mekem laef bilong planti for kamap moabeta and savve leadim olketa for kasem salvation.—Acts 13:47.
4. Hao big nao kea bilong olketa aposol for pipol wea olketa preach long hem?
4 Olketa aposol barava savve gud hao gud nius hem savve sevem laef, and olketa barava garem strong feeling for pipol wea olketa preach long hem. Diswan hem showaot klia from toktok bilong aposol Paul, taem hem sei: “From mifala garem loving feeling for iufala, mifala hapi for givim long iufala, no just gud nius abaotem God, bat soul bilong mifala seleva tu, from mifala lovem iufala.” (1 Thessalonians 2:8) Taem olketa showimaot trufala kea for pipol, Paul and olketa nara aposol followim Jesus and olketa angel long heven, wea barava insaed tu long disfala waka for sevem laef. Letem iumi lukluk gud long important waka wea olketa servant bilong God long heven duim saed long wei for plantim Kingdom truth, and letem iumi lukim hao nao example bilong olketa savve encouragem iumi for duim part bilong iumi.
Jesus—Man for Plantim Kingdom Truth
5. Wanem waka nao Jesus mekem hemseleva busy long hem taem hem long earth?
5 Jesus, man wea perfect, garem paoa for givim planti gudfala samting long material wei for pipol long taem bilong hem. Olsem example, hem savve stretem planti long olketa rong medical tingting long taem bilong hem, or maet hem apim savve bilong man long olketa nara samting bilong science. Bat, hem talem klia from start long ministry bilong hem hao waka bilong hem hem for preachim gud nius. (Luke 4:17-21) Klosap long end long ministry bilong hem, hem minim olsem: “For diswan nao mi kam insaed long world, for mi mas witness abaotem truth.” (John 18:37) So hem mekem hemseleva busy for plantim olketa seed bilong Kingdom truth. Waka for teachim pipol abaotem God and plan bilong Hem hem moa important winim eni nara teaching wea Jesus savve givim long olketa.—Romans 11:33-36.
6, 7. (a) Wanem nambawan promis nao Jesus mekem bifor hem go ap long heven, and hao nao hem fulfillim? (b) Hao nao tingting bilong Jesus abaotem preaching waka hem affectim iu?
6 Jesus storyim hemseleva olsem Man for plantim Kingdom truth. (John 4:35-38) Hem spreadim olketa seed bilong gud nius long evri chance. Nomata taem hem gogo for dae long post, hem talemaot gud nius abaotem paradaes wea bae kamap long earth. (Luke 23:43) And tu, main interest bilong hem hem hao wei for preachim gud nius bae no stop taem hem dae long torture stake. Bifor hem go ap long heven, hem komandim olketa aposol for go ahed for plantim seed bilong Kingdom truth and for mek disaepol. Then Jesus mekem wanfala nambawan promis. Hem sei: “Lukim! Mi stap witim iufala evri day go kasem taem bilong end bilong disfala system.”—Matthew 28:19, 20.
7 Long olketa toktok hia Jesus mekem wanfala promis for saportim, leadim, and lukaftarem disfala waka for preachim gud nius “evri day go kasem taem bilong end bilong disfala system.” Kam kasem day bilong iumi, Jesus go ahed for interest long disfala preaching waka. Hem nao Leader bilong iumi, wea lukaftarem waka for plantim Kingdom truth. (Matthew 23:10) Olsem Hed bilong Christian kongregeson, hem nao ansa go long Jehovah abaotem disfala waka raonem world.—Ephesians 1:22, 23; Colossians 1:18.
Olketa Angel Talemaot Hapi Nius
8, 9. (a) Hao nao olketa angel showimaot trufala interest long waka bilong man? (b) Long wanem wei nao iumi maet sei iumi stap long wanfala stage long pablik stadium?
8 Taem Jehovah wakem earth, olketa angel “hapi and singaot tugeta, and . . . start for shout and klapim hand.” (Job 38:4-7) Start long datfala taem, olketa angel long heven interest tumas long waka bilong man. Jehovah bin iusim olketa for talemaot tingting bilong hem long olketa man. (Psalm 103:20) Diswan hem barava tru saed long wei for spreadim gud nius long day bilong iumi. Insaed vision wea hem kasem, aposol John lukim wanfala “angel flae long midol heven, and hem garem gud nius for olowe for talemaot olsem hapi nius for olketa wea stap long earth, and long evri nation and tribe and languis and pipol, and hem sei long laodfala voice: ‘Fraet long God and givim hem glory, from hour bilong judgment bilong hem kam finis nao.’”—Revelation 14:6, 7.
9 Bible storyim olketa angel olsem “olketa spirit for duim pablik service, wea go aot for servem olketa wea bae kasem laef.” (Hebrews 1:14) Taem olketa angel interest for duim waka bilong olketa, olketa garem chance for lukim iumi and waka bilong iumi. Olsem long wanfala stage long pablik stadium, iumi duim waka bilong iumi front long olketa long heven. (1 Corinthians 4:9) Hem mekem iumi ting strong and hem spesol samting for savve hao iumi no waka seleva for plantim Kingdom truth!
Iumi Willing for Duim Part Bilong Iumi
10. Hao nao gudfala advaes long Ecclesiastes 11:6 savve fitim waka bilong iumi for preachim gud nius?
10 Why nao Jesus and olketa angel interest tumas long waka bilong iumi? Jesus givim wanfala reason taem hem sei: “Mi talem iufala, olketa angel bilong God hapi taem wanfala sinner hem repent.” (Luke 15:10) Iumi tu garem kaen trufala interest olsem for olketa pipol. Dastawe, iumi duim best bilong iumi for spreadim olketa seed bilong Kingdom truth evriwea. Toktok bilong Ecclesiastes 11:6 savve fitim waka bilong iumi. Long there Bible hem kaonselem iumi: “Long morning plantim seed bilong iu and go kasem evening no letem hand bilong iu for rest; from iu no savve wea nao bae iu win, maet long hia or there, or sapos tufala evriwan bae gud.” Hem tru, samfala nomoa long maet staka handred or thousand nao acceptim message bilong iumi. Bat olsem olketa angel, iumi hapi taem nomata “wanfala sinner” hem acceptim disfala message bilong salvation.
11. Wanem kaen samting nao savve kamaot taem iumi iusim olketa buk wea storyim Bible?
11 Planti samting nao insaed long waka for preachim gud nius. Wanfala important help for disfala waka hem olketa buk wea storyim Bible, wea Olketa Jehovah’s Witness iusim. Long samfala wei, olketa buk hia olketa tu olsem seed wea spread evriwea. Iumi no savve wea nao bae olketa win. Samtaem wanfala buk maet muv go long narawan bifor samwan hem readim. Samtaem Jesus and olketa angel bilong hem maet help for mekem diswan kamap for helpem olketa wea garem honest heart. Tingim samfala experience wea showimaot hao nao Jehovah savve iusim olketa buk wea iumi lusim witim pipol for duim nambawan samting wea iumi no expectim.
Waka Bilong Trufala God
12. Hao nao wanfala old magasin hem helpem wanfala famili for savve long Jehovah?
12 Long 1953, Robert, Lila, and olketa pikinini bilong tufala muv from wanfala big taon go long wanfala oldfala farm haos long rural ples long Pennsylvania, U.S.A. No longtaem bihaen olketa muv, Robert disaed for wakem wanfala bathrum andanit long ladder bilong haos. Bihaen hem aotem samfala timba, hem faendem hao bihaen long wall, rat hem hipimap staka pisis pepa, skin bilong nat, and narakaen rabis. Long midol long evriting hia hem wanfala Golden Age magasin. Robert hem barava interest long wanfala article abaotem wei for trainim pikinini. Hem hapi tumas long kliafala kaonsel insaed disfala magasin wea kamaot from Bible gogo hem talem Lila hao tufala bae joinim “religion bilong datfala Golden Age magasin.” Insaed tu-thri week nomoa, Olketa Jehovah’s Witness kam long haos bilong olketa, bat Robert talem olketa hao famili bilong hem interest nomoa long “religion bilong Golden Age magasin.” Olketa Witness minim hao datfala Golden Age magasin hem distaem garem niufala nem, Wekap! Robert and Lila start for evritaem studyim Bible witim olketa Witness, and gogo olketa baptaes. Then, tufala plantim seed bilong truth long olketa pikinini bilong tufala and kasem planti samting. Tuday, winim 20-fala member bilong disfala famili, insaed diswan hem evriwan long sevenfala pikinini bilong Robert and Lila, olketa kamap baptaes servant bilong Jehovah God.
13. Wanem nao muvim tufala long Puerto Rico for mekem grow interest long Bible?
13 Samting olsem 40 year bifor, William and Ada, wea marit and kam from Puerto Rico, nating interest for studyim Bible. Enitaem Olketa Jehovah’s Witness kam long haos bilong tufala, tufala haed. Wanday, long ples for baem staka samting wea pipol iusim finis, William laek for baem samting hem needim long haos. Taem hem redy for lusim datfala ples, hem lukim wanfala braet-green buk leidaon insaed wanfala bigfala rabis box. Nem bilong hem Religion, wanfala buk wea Olketa Jehovah’s Witness pablisim long 1940. William tekem disfala buk go long haos and barava hapi for readim hao false and tru religion tufala difren. Next taem Olketa Jehovah’s Witness kam, William and Ada hapi for lisin long message bilong olketa and start for studyim Bible witim olketa. Samfala month bihaen, tufala baptaes long Will Bilong God International Assembly long 1958. Start long datfala taem, olketa helpem winim 50 pipol for kamap part long bigfala Christian famili.
14. Olsem experience hia showimaot, wanem nao savve kamaot from olketa Bible buk bilong iumi?
14 Karl hem 11 year nomoa and hem savve plei krangge lelebet. Hem feel olsem hem insaed trabol olowe. Dadi bilong hem, wanfala German Methodist preacher, bin teachim hem hao nogud pipol bae burn long hell bihaen olketa dae. So Karl hem barava fraetem hell. Wanday long 1917, Karl lukim wanfala smolfala pepa long street and hem pikimap. Taem hem readim, eye bilong hem kwiktaem pas long disfala kwestin: “Wanem nao hell?” Datfala pepa hem wanfala invitation for wanfala pablik tok long datfala subject bilong hell, wea olketa Bible Student nao sponsarem, wea tuday olketa garem nem Olketa Jehovah’s Witness. Bihaen samting olsem wanfala year, bihaen samfala Bible study, Karl hem baptaes, and hem kamap wanfala long olketa Bible Student. Long 1925, olketa invaetem hem for waka long world headquarters bilong Olketa Jehovah’s Witness—wea hem serve long hem yet. Wanfala Christian waka wea go ahed klosap 80 year hem start from wanfala smolfala pepa long street.
15. Wanem nao Jehovah savve duim, followim hao hem laekem?
15 Tru, iumi man hard for savve sapos and haomas waka nao olketa angel duim insaed olketa experience hia. Nomata olsem, iumi shud no daotem hao Jesus and olketa angel waka hard insaed preaching waka and hao Jehovah savve gaedem olketa samting followim hao hem laekem. Olketa hia and planti semkaen experience showimaot gud samting wea savve kamaot from olketa buk bilong iumi bihaen hem lusim iumi.
Iumi Garem Waka for Lukaotem Richfala Samting
16. Wanem nao iumi savve lanem from toktok bilong 2 Corinthians 4:7?
16 Aposol Paul tok abaotem wanfala ‘rich samting long olketa clay pot.’ Datfala rich samting hem waka wea God givim for preach, and datfala clay pot hem olketa man wea Jehovah givim disfala rich samting long olketa. From olketa man wik and no perfect, Paul go ahed for talem hao samting wea kamaot from olketa kasem datfala waka hem wei wea “paoa wea winim wanem iumi garem hem bilong God and no bilong iumiseleva.” (2 Corinthians 4:7) Tru nao, iumi savve depend long Jehovah for givim iumi paoa wea iumi needim mekem iumi savve duim waka wea stap for iumi.
17. Wanem nao iumi bae kasem taem iumi plantim seed bilong Kingdom truth, and nomata olsem, why nao iumi shud keepim positive tingting?
17 Planti taem iumi need for mekem sakrifaes. Hem maet hard and no isi for waka long samfala territory. Long samfala ples luk olsem klosap evri pipol barava no kea, and raf tumas tu. Long olketa ples hia iumi hard waka tumas and luk olsem no eni gud samting kamaot. Bat, from samting wea savve lus hem big tumas, no eni waka saed long diswan hem ova tumas. Tingim, olketa seed wea iu plantim savve givim hapi long pipol distaem and laef olowe long future. Toktok bilong Psalm 126:6 hem kamap tru planti taem: “Datwan wea evritaem go aot, nomata hem krae, wea karem basket wea fulap long seed, bae sure for kam bak witim hapi singaot, and karem harvest bilong hem.”
18. Hao nao iumi savve go ahed for lukluk gud long ministry bilong iumi, and why nao iumi shud olsem?
18 Letem iumi iusim evri chance wea fit for barava plantim olketa seed bilong Kingdom truth. Iumi mas no forget hao, nomata iumi nao plant and watarem olketa seed, Jehovah nao mekem olketa grow. (1 Corinthians 3:6, 7) Bat, olsem hao Jesus and olketa angel duim part bilong olketa, Jehovah expectim iumi for barava duim evri part bilong ministry bilong iumi. (2 Timothy 4:5) Iumi laek for lukluk gud long teaching bilong iumi, tingting bilong iumi, and hao iumi interest long ministry. Why? Paul hem ansa: “Taem iu duim olsem iu bae sevem iuseleva and olketa wea lisin long iu.”—1 Timothy 4:16.
Wanem Nao Iumi Lanem?
• Long wanem kaen wei nao waka bilong iumi for plantim seed mekem gud samting kamap?
• Hao nao Jesus Christ and olketa angel insaed long waka for preachim gud nius tuday?
• Why nao iumi shud barava plantim Kingdom truth?
• Taem iumi meetim insaed long ministry pipol wea no interest or wea raf tumas, wanem nao shud muvim iumi for go ahed strong?
[Piksa long page 15]
Olsem olketa farmer long Israel bifor, olketa Christian tuday barava spreadim olketa seed bilong Kingdom truth
[Piksa long page 16]
Olketa Jehovah’s Witness wakem and givimaot planti kaen Bible buk insaed 340 languis