Laef Bilong Iu Savve Garem Moa Mining?

TRU kost bilong wanfala samting no evritaem showaot long datfala samting. Note wea kost bilong hem winim evri nara note long United States hem for $10,000. Bat pepa bilong datfala note hem kost tu-thri coin nomoa.

Waswe, enitaem iu tingting hao nao pepa wea garem smol kost nomoa fit for givim tru mining long laef? Staka pipol ting olsem. Planti million pipol waka naet and day for kasem moa selen. Samfala taem wei for aftarem selen minim sakrifaes saed long health, olketa fren, and maet famili tu. Wanem nao kamaot from diswan? Waswe, selen—or wanem iumi baem witim—savve givim man trufala wei for satisfae for olowe?

Olketa wea duim research talem hao bae man faendem moa hard for satisfae sapos hem luk long olketa material samting for satisfae. Niusman Alfie Kohn talem hao “wei for satisfae hem no samting man peim. . . . Pipol wea ting long riches olsem main samting long laef planti taem wari and feel wikdaon tumas and no mas hapi long living.”—International Herald Tribune.

Nomata olketa wea duim research maet luksavve hao laef wea garem mining needim difren samting and no selen, planti pipol no ting olsem. Diswan no mekem iumi sapraes, from insaed wan day pipol long olketa Western kantri maet herem samting olsem 3,000 toktok bilong advertisement. Nomata advertisement hia hem for car or loli, main message hem: ‘Baem disfala samting, and iu bae moa hapi.’

Wanem nao kamaot from disfala bigfala wei for mekhae long material samting? Pipol ting nating long spiritual samting! Long wanfala report insaed Newsweek magasin, archbishop bilong Cologne, Germany, no longtaem go nomoa sei hao “long community bilong iumi, pipol no story moa abaotem God.”

Maet iu iusim klosap full strong bilong iu for provaed for famili. Maet iu feel iu garem lelebet taem nomoa for duim eni nara samting. Bat, samfala taem, maet iu feel laef mas garem moa samting winim wei for waka nomoa gogo man sik or olo tumas for waka.

Waswe, for tingting gud long spiritual samting savve mekem wei for satisfae kamap moa big? Wanem nao bae mekem laef bilong iu garem moa mining?