Selen Bilong Iu or Laef Bilong Iu?

Maet iu herem story hao olketa raskol savve showim gun long man and ask: “Selen bilong iu or laef bilong iu!” Long distaem, disfala toktok showaot long wanfala hard samting wea iumi evriwan feisim—especially iumi wea stap long rich kantri. Distaem, no eni raskol holem gun long iumi. Bat, hem wei wea community mekhae long selen and for win saed long material samting.

WEI for mekhae long diswan mekem kamap samfala niu kwestin and olketa wari. Man bae sakrifaesim haomas samting for aftarem selen and material samting? Iumi savve hapi witim tu-thri samting? Waswe, pipol sakrifaesim “datfala really laef” for kasem material samting? Selen hem wei for kasem wanfala hapi laef?

Krangge for Aftarem Selen

Midolwan olketa samting wea man laekem and lovem—nomata gud samting or nogud—for lovem selen hem kamap olsem main wan. No olsem feeling for wantem sex and kaikai, krangge for aftarem selen hem no savve katdaon long samfala man. Wei for kamap olo tu no savve finisim diswan. Planti taem wei for kamap olo mekem man interest or wari moa abaotem selen and haomas samting hem savve baem.

Luk olsem greedy fasin hem kamap moa big distaem. Main actor long wanfala video hem sei: “Greedy fasin hem win. Greedy fasin hem gud tumas.” Nomata samfala sei olketa year bilong 1980 nao Taem Bilong Greedy Fasin, samting wea happen bifor and bihaen long datfala taem showimaot hao tingting bilong man long selen hem nating change tumas insaed long olketa year.

Samting wea hem maet niu distaem hem wei wea staka pipol lukim olketa chance for satisfaem semtaem feeling bilong olketa for garem moa samting. Hem luk olsem big haf long world iusim big haf long taem and big haf long energy for mekem and for kasem moa and moa material samting. Maet iu agree hao wei for garem material samting and spendem selen hem kamap samting wea pipol barava laek for duim long disfala taem.

Bat waswe, pipol kamap moa hapi from diswan? For ansarem diswan, wise and richfala King Solomon raet olsem 3,000 year bifor: “Man wea lovem silver bae no satisfae witim silver nomoa, olsem eniwan wea lovem richfala samting bae no satisfae witim wages. Diswan tu hem iusles.” (Ecclesiastes 5:10) Olketa wea studyim living bilong pipol distaem faendemaot sem interesting samting.

Selen and Wei for Hapi

Wanfala samting wea olketa faendemaot abaotem fasin bilong man hem hao wei for hipimap selen and material samting hem no minim man hipimap wei for satisfae and hapi wea semsem. Samting wea planti savveman luksavve long hem distaem hem hao taem wanfala man kasem wanfala namba saed long material samting, feeling bilong hem for hapi hem no join witim haomas moa material samting nao hem bae garem.

So, wei for aftarem tumas material samting and selen mekem planti pipol ting olsem, ‘Mifala olsem enjoyim evri niu samting wea mifala baem, bat why nao olketa naes samting olsem nating mekem mifala really satisfae bihaen?’

Long buk bilong hem Happy People, man wea raetem Jonathan Freedman talem: “Taem iu kasem inaf selen, then haomas selen iu garem no really help for bringim hapi. Taem man winim living wea poor tumas, then wei wea hapi bilong hem depend long selen hem nating big nomoa.” Gogo planti luksavve hao main wei for kasem hapi hem for man garem spiritual samting, aftarem gudfala samting, and olketa gudfala fasin. Wei for fren gud witim nara pipol hem important tu, and for free from olketa raoa or problem wea maet stopem iumi for enjoyim wanem iumi garem.

Planti lukim hao main samting wea kosim klosap evri problem bilong community hem disfala wei for trae iusim olketa rich samting for finisim problem wea really stap insaed long olketa man. Samfala man for storyim diskaen samting sei feeling for no really hapi hem stap. Olketa lukim tu wei wea pipol long olketa rich kantri start for go long olketa difren kaen man and grup for kasem help saed long mining bilong laef and peace long mind. Diswan pruvim hao olketa material samting fail for givim trufala mining long laef.

Selen Garem Paoa and No Garem Paoa

Hem tru, selen garem paoa. Hem savve baem olketa naes haos, kaleko, and naes samting for haos. Hem savve baem tu samting wea luk olsem praise, or samfala fren for lelebet taem. Bat hem nomoa samting paoa bilong selen savve duim. Samting wea iumi barava needim, selen no savve baem—love bilong wanfala tru fren, peace long mind, or lelebet comfort taem man klosap for dae. And for olketa wea tinghae long wei for fren witim Creator, selen no savve baem wei wea God appruvim olketa.

King Solomon, wea garem evri samting wea selen savve baem long taem bilong hem, luksavve hao wei for trustim olketa material samting no lead go long hapi for olowe. (Ecclesiastes 5:12-15) Selen savve lus taem wanfala bank brekdaon or thru long hae kost bilong living. Olketa cyclone savve distroem olketa property. Insurance maet changem bak samfala selen wea iu lusim, bat hem no savve healim sorre feeling. Stock market savve brekdaon insaed wanfala day nomoa. Nomata sapos iu garem wanfala gud waka, hem savve lus kwiktaem nomoa tu.

So, hao nao iumi savve keepim balance tingting long selen? Hao important nao shud selen or olketa material samting long laef bilong iumi? Plis lukluk moa long diswan for faendemaot hao iu savve kasem samting wea garem hae price—“datfala really laef.”

[Olketa Piksa long page 4]

Olketa material samting no givim hapi for olowe