Hao for Iusim Gud Selen

Iumi evriwan needim selen for peim olketa samting wea famili bilong iumi needim. (Proverbs 30:8) Bible hem sei, ‘selen savve protectim man.’ (Ecclesiastes 7:12) Maet hem no isi for iu and marit partner bilong iu for story abaotem hao for iusim selen, bat no letem selen for mekem iutufala raoa. (Ephesus 4:32) Tufala wea marit shud trustim tufala and waka tugeta for disaedem hao for iusim selen.

1 PLAN GUD

BIBLE HEM SEI: “Sapos eniwan long iufala laek for wakem wanfala taoa, hem mas ting raonem firstaem haomas selen nao hem needim.” (Luke 14:28) Hem important tumas for hasband and waef garem plan long hao for iusim selen. (Amos 3:3) Tingim wanem iutufala mas baem and haomas selen nao hem fitim for iutufala iusim. (Proverbs 31:16) Nomata sapos iu garem selen, datwan no minim iu mas baem samting. Trae for no garem kaon and for iusim nomoa selen wea iu garem.—Proverbs 21:5; 22:7.

SAMTING IU SAVVE DUIM:

• Sapos iutufala garem extra selen bihaen iu peim olketa samting wea iu needim, iutufala evriwan shud disaedem hao for iusim datfala selen

• Sapos iutufala no garem inaf selen for peim evri samting, iutufala savve disaed tugeta for no baem samting wea famili no barava needim

2 HONEST AND GAREM STRETFALA TINGTING

BIBLE HEM SEI: ‘Trae for honest long evri samting wea iufala duim for fitim wanem hem stret long tingting bilong Jehovah and olketa man tu.’ (2 Corinth 8:21) Talem tru samting long marit partner bilong iu abaotem haomas selen nao iu kasem and spendem.

Story firstaem witim hasband or waef bilong iu bifor iutufala peim eni big samting. (Proverbs 13:10) Taem iutufala story abaotem hao iutufala bae iusim selen, datwan bae helpem iutufala for stap gud tugeta. Nomata iuseleva kasem selen from waka wea iu duim, ting long datwan olsem hem selen bilong famili. —1 Timothy 5:8.

SAMTING IU SAVVE DUIM:

• Agree long haomas selen nao each wan savve spendem seleva

• Evritaem storyim hao iutufala bae iusim selen and no weitim nomoa taem problem kamap saed long selen for storyim datwan