Gogo Long Olketa Pacific Island for Waka!
PLES for weit long international airport long Brisbane and Sydney, Australia, hem fulap witim hapi saond. Wanfala grup bilong 46 pipol redy for flae go long Samoa, for meetim nara 39 pipol from New Zealand, Hawaii, and United States. Olketa karem samfala difren samting insaed basket—main samting hem olketa tul, olsem olketa hammer, saw, and drill—kaen samting wea man no savve tekem witim hem taem hem gogo long wanfala naesfala Pacific island. Bat, disfala gogo hem spesol wan.
Olketa seleva peim gogo bilong olketa, and redy for spendem samting olsem tufala week olsem volunteer wea no kasem eni pei for duim wanfala construction program wea Regional Engineering Office long Australia branch office bilong olketa Jehovah’s Witness nao lukaftarem. Insaed disfala program, wea kasem selen for saportim diswan thru long contribution, hem waka for buildim olketa Kingdom Hall, Assembly Hall, missionary hom, and olketa branch or transleison office for olketa kongregeson bilong olketa Jehovah’s Witness long olketa Pacific island wea grow kwiktaem tumas. Letem iumi meetim samfala wakman hia, wea join finis insaed Kingdom Hall building team long kantri bilong olketa.
Max, wanfala man for wakem ruf, hem kam from Cowra long New South Wales, Australia. Hem marit and garem faevfala pikinini. Arnold hem from Hawaii. Hem and waef bilong hem garem tufala son, and hem wanfala pioneer tu, or full-taem minister. Olsem Max, Arnold serve olsem elder long hom kongregeson bilong hem. Luk olsem, olketa man hia—and tu planti long olketa wea insaed disfala program—no duim volunteer waka bikos olketa garem free taem for duim diswan. Nomoa, bat olketa and famili luksavve long need, and olketa want for help long eni wei.
Olketa Wakman from Olketa Difren Kantri Helpem Wanfala Important Need
Wanfala ples wea barava needim savve and help nao hem Tuvalu, wanfala Pacific nation bilong samting olsem 10,500 pipol wea stap long wanfala grup bilong naenfala farawe coral island klosap long equator and long northwest saed bilong Samoa. Size bilong olketa island hia, or atoll, wanwan hem samting olsem tu and haf square kilometer. Kasem 1994, 61 Witness long there barava needim wanfala niu Kingdom Hall and wanfala transleison office wea moa big.
Long disfala part bilong Pacific, olketa mas planim gud olketa building and buildim long wei wea hem bae strong long olketa bigfala wind, rain and cyclone wea happen evritaem. Bat no planti gudfala building material stap long olketa island hia. Hao nao for winim diswan? Evri samting—from ruf sheeting and truss kasem furniture and curtain, toilet bowl and shower tap, and nomata olketa screw and nila tu—olketa shipim kam insaed cargo container from Australia.
Bifor olketa material hia arrive, wanfala smol team preparem ples firstaem and leim faondeson. Then evri international wakman hia kam for buildim, paintim, and putim evri samting insaed long olketa building hia.
Evri waka hia long Tuvalu mekem wanfala bigman bilong lokol church kros wea hem talemaot long radio hao olketa Witness go ahed for buildim wanfala “Taoa bilong Babel”! Bat, wanem nao tru samting? Wanfala volunteer wakman, Graeme, hem sei: “Taem pipol wea buildim datfala Taoa bilong Babel insaed Bible luksavve hem hard for minim narawan bikos God hem konfiusim languis bilong olketa, olketa lusim datfala project bilong olketa and no finisim datfala taoa.” (Genesis 11:1-9) “Hem barava difren taem iumi waka for Jehovah God. Nomata languis and kastom hem difren, evritaem olketa savve finisim olketa project hia.” And hem nao samting wea happen witim diswan—hem finis insaed tufala week nomoa. Tru tumas, 163 pipol nao attendim dedication ceremony, witim waef bilong prime minister.
Doug, supervisor bilong disfala project, ting bak and sei: “Hem hapi samting for waka witim olketa volunteer from nara kantri. Iumi garem olketa difren kaen wei for duim samting, iusim difren word, and olketa difren wei for measurem samting, nomata olsem olketa samting hia no kosim eni problem.” From hem waka finis long samfala project olsem, hem sei: “Diswan strongim long mind bilong mi hao witim help bilong Jehovah pipol bilong hem savve buildim wanfala building eniwea long earth, nomata ples hem farawe or hard tumas. Hem tru, iumi garem olketa man wea garem gudfala savve, bat spirit bilong Jehovah nao savve mekem samting fit for kamap.”
Spirit bilong God muvim tu olketa Witness famili long olketa island hia for provaedem kaikai and ples for stap, wea, long samfala, hem wanfala big sakrifaes. And olketa wea kasem disfala fasin for welkam barava tinghae long hem. Ken, wea kam from Melbourne, Australia, waka long kaen project olsem long French Polynesia. Hem sei: “Mifala kam olsem olketa servant, bat olketa treatim mifala olsem olketa king.” Taem hem fitim, olketa lokol Witness help tu long construction waka. Long Solomon Islands, olketa woman mixim concrete—witim hand nomoa. Wan handred man and woman klaemapem olketa slippery maunten and karem go daon winim 40 ton timba. Olketa young wan tu join insaed. Wanfala wakman from New Zealand hem ting bak: “Mi rememberim wanfala young island brata wea karem tu or thri bag cement wantaem. And hem digim gravol full day long hot sun and rain.”
Wei wea olketa lokol Witness tekpart long disfala waka bringim nara gud samting. Branch office bilong Watch Tower Society long Samoa sei: “Olketa island brata lanem staka waka wea olketa savve iusim for buildim olketa Kingdom Hall and for duim repair waka bihaen cyclone and waka for buildim bak. Hem maet helpem olketa tu for kasem selen for living bilong olketa insaed community wea planti faendem datwan hem hard.”
Datfala Building Program Givim Gudfala Witness
Colin stap long Honiara and lukim taem olketa go ahed for buildim Assembly Hall long Solomon Islands. From diswan muvim hem, hem raetem disfala message go long branch office bilong Watch Tower Society long Pijin English: “Evriwan garem wan mind and no eniwan kros, and tu olketa wan famili nomoa.” No longtaem bihaen, taem hem go bak long vilij bilong hem long Aruligo, wea stap samting olsem 40 kilometer awe, hem and famili bilong hem buildim Kingdom Hall bilong olketa seleva. Then olketa sendem narafala message long office: “Kingdom Hall bilong mifala, witim wanfala platform tu, hem redy nao, so waswe, mifala savve garem olketa meeting long hia?” Olketa arrangem diswan kwiktaem, and winim 60 pipol attend evritaem.
Wanfala European Union adviser lukim datfala project long Tuvalu. Hem sei olsem long wanfala wakman: “Mi ting evriwan talem sem samting long iu, bat long mi diswan hem wanfala mirakol!” Wanfala woman wea waka long telephone exchange askem narafala volunteer wea visit: “Hao nao iufala hapi nomoa? Hem hot tumas long hia!” No enitaem bifor olketa lukim Christian wei hem waka long gudfala wei olsem and long wei for sakrifaesim seleva.
No Sorre Long Olketa Sakrifaes
“Man wea plantim staka samting bae harvestim staka samting tu,” Bible sei long 2 Corinthians 9:6. Olketa wakman, famili bilong olketa, and kongregeson bilong olketa go ahed for plant long willing wei for helpem olketa Witness long Pacific. Ross, wanfala elder from Kincumber, klosap long Sydney, hem sei: “Kongregeson bilong mi givim winim wan third long airfare bilong mi, and brata-in-law bilong mi, wea hem tu kam, givim nara $2,500.” Nara wakman sellim car bilong hem mekem hem fit for peim gogo bilong hem. Narawan moa sellim samfala land bilong hem. Kevin needim nara $4,500, so hem disaed for sellim 16-fala pigeon bird bilong hem wea tu year. Thru long wanfala fren, hem faendem wanfala man for baem olketa pigeon hia wea givim $4,500 stret!
“Waswe, olketa kasem eni gud samting taem olketa peim airfare and lusim wages, wea total hem winim $30,000?” olketa askem Danny and Cheryl. “Yes! Nomata datfala amount hem dabol, hem gud tumas,” olketa ansa. Alan, from Nelson, New Zealand, hem sei: “Wanem hem kostim mi for go long Tuvalu, mi fit for go finis long Europe and garem samfala leftova selen. Bat, waswe, mi bae kasem olketa blessing, or garem staka fren wea kam from difren kaen living, or duim samting for samwan and no for miseleva? Nomoa nao! Nomata wanem mi givim long olketa island brata bilong mi, olketa givim bak moa samting winim wanem mi givim.”
Nara key wea mekem disfala program win hem saport bilong famili. Samfala waef fit for go witim hasband bilong olketa and help, bat narawan garem pikinini wea skul for lukaftarem or famili bisnis for ranem. “Wei wea waef bilong mi willing for lukaftarem olketa pikinini and famili taem mi no stap hem big sakrifaes winim sakrifaes wea mi mekem,” Clay hem sei. Tru nao, evri hasband wea no fit for tekem waef bilong olketa bae sei “Amen” long datwan!
Start long taem datfala project long Tuvalu hem finis, olketa volunteer wakman buildim finis olketa Kingdom Hall, Assembly Hall, missionary hom, and olketa transleison office long Fiji, Tonga, Papua New Guinea, New Caledonia, and olketa nara ples moa. Planti project olketa go ahed for redyim, insaed diswan hem samfala long Southeast Asia. Waswe, bae inaf wakman stap?
Luk olsem no eni problem long datwan. Branch office long Hawaii hem raet olsem: “Evriwan hia wea tekpart long olketa international building project bifor ask for mifala rememberim olketa taem narafala project kamap. Stretawe taem olketa go bak long hom, olketa start for sevem selen for diswan.” Hao nao disfala program bae fail taem iu addim diskaen wei for givim seleva witim blessing bilong Jehovah?
[Piksa long page 9]
Olketa material for disfala project
[Piksa long page 9]
Olketa wakman long ples for waka
[Piksa long page 10]
Taem olketa project hia finis, mifala hapi long wanem spirit bilong God hem duim