Waswe, Iu Remember?

Waswe, iu hapi for readim olketa Wastaoa long olketa month wea go pas finis? Sapos olsem, trae for ansarem olketa kwestin long daon:

• Why nao iumi savve sure fulfillment bilong profesi abaotem “niu heven and niu earth” long Isaiah 65:17-19 bae no for olketa Jew wea go bak long homland bilong olketa nomoa?

Bikos aposol Peter and John, taem tufala raet long first century C.E., tufala point go long wanfala wei for fulfill long future, wea minim olketa blessing wea no kamap yet. (2 Peter 3:13; Revelation 21:1-4)—4/15, page 10-12.

• Wanem nao maet bihaenem olketa Greek kastom story abaotem olketa haf god wea raf?

Olketa kastom story olsem hem maet wei for storyim taem wea samfala angel tekem body olsem man and garem raf and dirty living bifor Flood. (Genesis 6:1, 2)—4/15, page 27.

• Wanem nao samfala danger wea samfala mature Christian mas lukaot long olketa long taem bilong wedding?

Hem important for stap klia from olketa laodfala wild party, wea maet kamap sapos pipol drinkim tumas alcohol and duim olabaot dance long laod music. Sapos olketa no sei wedding reception hem open for evriwan, olketa wea no kasem invitation shud no attendim. Datfala niu hasband nao shud askem samfala wea fit for mek sure celebration hem followim olketa mark bilong Bible and hem finis long taem wea fitim.—5/1, page 19-22.

• Wanem nao mining bilong toktok long Psalm 128:3, olketa son bilong iu bae “olsem olketa smolfala branch bilong olive tree” raonem tebol?

Niu shut grow evritaem from botom bilong wanfala olive tree. Taem tree kamap olo, olketa niu shut kamap strongfala trunk raonem datfala olo wan. Olsem tu, dadi and mami savve hapi for garem pikinini wea garem frut and joinim olketa for servem Jehovah.—5/15, page 27.

• Wanem nao samfala gud samting wea savve kamaot from wei for mekem famili living hem gud?

Gudfala famili living hem mekem faondeson for garem gudfala tingting abaotem olketa wea garem paoa, for tinghae long stret fasin, and for fren gud witim nara pipol. Long wei olsem, wei for feel klos insaed famili savve kamap olsem graon for mekem grow wei wea pikinini fren witim God.—6/1, page 18.

• Long wanfala Asia kantri, wanem nao olketa duim for strongim idea hao evri Christian olketa brata?

Evri kongregeson kasem encouragement for no iusim spesol nem for haem samfala. Bat, evriwan shud semsem for kolem each other olketa brata.—6/15, page 21, 22.

• Waswe, Olketa Jehovah’s Witness acceptim olketa medicine wea olketa wakem from blood?

Mifala biliv komand long Bible for ‘stap klia from blood’ hem tambuim transfusion bilong full blood or olketa main part bilong hem (plasma, red cell, white cell, and platelet). (Acts 15:28, 29) Long saed bilong olketa difren part moa wea kamaot from olketa main part hia, hem disison bilong Christian wanwan, long wei for ting raonem gud wanem Bible talem and wei wea hem fren witim God.—6/15, page 29-31.

• Waswe, man really savve kasem peace long mind distaem?

Yes. Thru long Bible, Jesus Christ hem leadim pipol go long klin worship and long peace wea Isaiah 32:18 hem storyim. And tu, olketa wea kasem diskaen peace garem hope for enjoyim peace olowe long earth wea Psalm 37:11, 29 hem talem.—7/1, page 7.

• Wanem part nao George Young garem insaed long theocratic history bilong distaem?

From 1917, hem serve olsem man for karem laet bilong gud nius bilong Kingdom go long staka kantri. Ministry bilong hem tekem hem evriwea long Canada, olketa island bilong Caribbean, long Brazil and olketa nara kantri bilong South America, long Central America, long Spain, long Portugal, long ples olketa kolem Soviet Union bifor, and long United States.—7/1, page 22-7.

• Wanem nao 1 Corinthians 15:29 minim taem hem sei samfala “baptaes for kamap olketa wea bae dae”?

Hem minim, taem holy spirit anointim olketa Christian, olketa go insaed wanfala laef wea lead go for dae and resurrect for go long heven.—7/15, page 17.

• Wanem nao Paul duim insaed olketa year wea olketa kolem olketa year bilong hem wea no eniwan savve?

Maet hem help for startim or strongim olketa kongregeson long Syria and Cilicia. Staka long olketa hard samting wea 2 Corinthians 11:23-27 story abaotem mas kamap insaed taem hia, wea showimaot hem busy long ministry.—7/15, page 26, 27.

• Wanem nao savve helpem iumi for balance long samting iumi expectim?

Remember hao Jehovah hem minim samting. Wei for prea long hem savve helpem iumi for balancem tingting bilong iumi, and hem showimaot hambol fasin. Narafala help hem wei for story witim wanfala mature fren for kasem difren tingting long samting.—8/1, page 29, 30.