Kwestin From Reader

Waswe, Olketa Jehovah’s Witness acceptim eni medicine wea olketa wakem from blood?

Ansa hem insaed long wei wea Olketa Jehovah’s Witness no acceptim blood. Mifala biliv strong long wei wea law bilong God abaotem blood hem kanduit change followim savve wea go ahed for change. Nomata olsem, olketa niu kwestin kamap bikos olketa savve treatim blood and then separatem long fofala main part bilong hem and then evri difren part bilong olketa part hia. For wanfala Christian disaed for acceptim kaen olsem or nomoa, hem shud luk winim gud saed or danger saed bilong diswan saed long medical. Main wari bilong wanfala Christian shud wanem Bible talem and hao diswan maet affectim hao hem fren witim Almighty God.

Kwestin hem simpol wan nomoa. For help minim why nao olsem, tingim samfala samting wea happen insaed Bible, history, and saed long medical.

Jehovah God talem laen dadi bilong iumi Noah hao hem mas deal witim blood olsem spesol samting. (Genesis 9:3, 4) Bihaen, law bilong God long Israel showimaot wei wea blood hem holy: “Long saed bilong eni man bilong haos bilong Israel or man from difren kantri . . . wea kaikaim enikaen blood, mi bae barava againstim datfala soul wea kaikaim blood.” Taem wanfala Israelite rejectim law bilong God, hem savve mekem olketa narawan for kamap dirty; so, God sei moa: “Mi bae barava katem hem aot from midolwan pipol bilong hem.” (Leviticus 17:10) Bihaen, long wanfala meeting long Jerusalem, olketa aposol and older man putim law wea sei iumi mas ‘stap klia from blood.’ For duim diswan hem important olsem wei for stap klia from dirty fasin and wei for worshipim idol.—Acts 15:28, 29.

Long datfala taem, wanem nao maet “stap klia from” hem minim? Olketa Christian no iusim blood, nomata fresh wan or wea olketa keepim; and tu olketa no kaikaim meat bilong animal wea olketa no aotem blood from hem. Olketa kaikai wea olketa addim blood go insaed tu olketa bae no kaikaim, olsem blood sausage. Evrikaen wei olsem for iusim blood bae brekem law bilong God.—1 Samuel 14:32, 33.

Big haf long pipol bilong bifor bae nating wari long wei for kaikaim blood, olsem iumi savve lukim from raeting bilong Tertullian (mek-tu and thri century C.E.). Taem hem ansarem laea toktok bilong samfala wea sei olketa Christian kaikaim blood, Tertullian storyim samfala tribe wea savve strongim agreement long wei for teistim blood. Hem talem tu hao “taem wanfala show kamap long stadium, [samfala] greedy for drinkim blood bilong olketa wea dae . . . for healim olketa from epilepsy.”

Olketa wei hia (nomata sapos samfala bilong Rome duim for health bilong olketa) hem rong long olketa Christian: “Nomata blood bilong animal mifala no addim insaed kaikai bilong mifala,” Tertullian raet olsem. Pipol bilong Rome iusim kaikai wea garem blood for testim faithful fasin bilong olketa tru Christian. Tertullian sei moa: “Distaem, mi askem iu, hao nao, long taem iu sure [olketa Christian] bae ranawe from blood bilong animal witim fraet, iu tingse olketa greedy for blood bilong man?”

Distaem, no staka bae ting olketa no agree witim law bilong Almighty God taem doctor sei for olketa tekem blood. Nomata Olketa Jehovah’s Witness barava laek for laef, mifala disaed strong for obeyim law bilong Jehovah abaotem blood. Wanem nao diswan minim long saed long olketa niu medicine distaem?

Taem full blood transfusion kamap big bihaen World War II, Olketa Jehovah’s Witness lukim diswan olsem hem againstim law bilong God—and mifala still bilivim diswan. Nomata olsem, medicine hem change insaed taem wea go pas. Distaem, staka transfusion hem no full blood bat wanfala long olketa main part bilong hem: (1) red cell; (2) white cell; (3) platelet; (4) plasma (serum), liquid part. For fitim need bilong sikman olketa doctor maet givim olketa red cell, white cell, platelet, or plasma. Kaen wei hia for givim transfusion bilong olketa main part bilong blood nomoa hem mekem moa pipol wea sik for kasem samting from sem blood. Olketa Jehovah’s Witness biliv wei for acceptim full blood or eniwan long olketa fofala main part bilong hem, hem brekem law bilong God. Witim gud reason, wei for keepim disfala disison wea kam from Bible hem barava protectim olketa from staka danger, insaed diswan hem olketa sik olsem hepatitis and AIDS wea man savve kasem from blood.

Bat, from olketa savve treatim blood for kasem difren part from olketa main part bilong blood hia, olketa kwestin kamap abaot olketa difren part hia. Hao nao olketa iusim olketa difren part bilong blood hia, and wanem nao wanfala Christian mas tingim taem hem disaed for iusim or nomoa?

Blood garem staka samting insaed. Nomata plasma—wea hem 90 percent wata—hem garem olketa hormone, inorganic salt, enzyme, and nutrient, insaed diswan olketa mineral and sugar. Plasma hem garem tu olketa protein olsem albumin, clotting factor, and olketa antibody for faetem sik. Olketa wea waka long medical laboratory separatem and iusim staka protein bilong plasma. Olsem example, olketa givim disfala clotting factor VIII long pipol wea kasem sik hemophilia. Or sapos wanfala man hem kasem samfala sik, olketa doctor savve nilam hem witim gamma globulin, wea olketa aotem from blood plasma bilong pipol wea winim finis datfala sik. Olketa iusim olketa nara protein from plasma olsem medicine, bat olketa example antap showimaot hao olketa savve treatim wanfala part bilong blood (olsem plasma) and then treatim datfala part for kasem olketa difren part bilong hem.a

Long sem wei wea olketa savve tekem from blood plasma olketa difren part bilong hem, olketa savve duim sem samting for olketa nara main part bilong blood (olketa red cell, white cell, platelet). Olsem example, from olketa white blood cell nao iu maet tekem olketa interferon and interleukin for treatim samfala viral infection and cancer. Olketa savve treatim olketa platelet for kasem samting for healim kill long man. And olketa nara medicine bae kam bihaen wea iusim (firstaem) samfala difren part bilong blood. Olketa treatment hia hem no wei for givim transfusion bilong olketa main part bilong blood; planti taem diswan minim olketa smol haf nomoa bilong main part or olketa difren part bilong hem. Waswe, wanfala Christian shud acceptim olketa difren part hia olsem medicine? Iumi no savve. Bible no talem, so wanfala Christian mas iusim conscience bilong hem for disaed front long God.

Samfala bae rejectim eni samting wea kam from blood (nomata olketa barava smol part wea savve strongim body againstim sik nomoa). Hem nao hao olketa minim komand bilong God for ‘stap klia from blood.’ Olketa tingim law bilong hem for Israel for minim olketa mas “pourimaot long graon” blood bilong olketa samting wea God wakem. (Deuteronomy 12:22-24) Why nao hem fit for tingim diswan? From wei for wakem gamma globulin, clotting factor, and samfala samting moa, hem minim wei for kolektem and treatim blood. Dastawe, samfala Christian rejectim kaen treatment hia, long sem wei wea olketa rejectim full blood transfusion or fofala main part bilong hem. Iumi mas respectim disfala disison bilong olketa wea honest and trae hard for followim conscience.

Samfala nara Christian disaedem difren samting. Olketa tu rejectim transfusion bilong full blood, red cell, white cell, platelet, or plasma. Bat, olketa maet letem doctor for treatim olketa witim wanfala medicine wea kam from wanfala difren part bilong olketa main part bilong blood. Nomata long diswan samfala maet ting difren. Wanfala Christian maet acceptim gamma globulin injection, bat hem maet or maet no agree for olketa nilam hem witim eni part bilong red or white cell. Bat, wanem nao maet leadim samfala Christian for disaed olketa savve acceptim olketa treatment hia?

“Kwestin From Reader” insaed English Wastaoa bilong June 1, 1990, sei olketa protein bilong plasma (olketa difren part bilong hem) savve muv from blood bilong babule woman go long blood bilong baby. So mami pasim olketa immunoglobulin go long pikinini bilong hem, wea important for hem faetem sik. Taem red cell insaed long blood bilong baby hem duim full waka bilong hem, then body treatim disfala part wea karem oxygen. Samfala part bilong diswan kamap bilirubin, wea go thru long placenta bilong mami and aot from body bilong hem. Samfala Christian maet disaed sapos olketa barava smol part bilong blood savve pas go long nara man long natural wei, olketa savve acceptim olketa difren part bilong blood wea kam from blood plasma or olketa cell.

Waswe, wei wea olketa tingting and conscience bilong pipol difren hem minim disfala problem hem no important? Nomoa. Hem serious samting. Bat, main point bilong diswan hem klia. Olketa samting wea iumi storyim long hia showimaot Olketa Jehovah’s Witness rejectim transfusion bilong full blood and olketa main part bilong blood. Bible talem olketa Christian for ‘stap klia from olketa samting wea olketa sakrifaesim long idol and from blood and from fornication.’ (Acts 15:29) Long saed bilong olketa difren part moa wea kamaot from olketa main part hia, Christian wanwan, bihaen hem ting strong raonem witim prea, mas iusim conscience for disaed seleva.

Staka pipol bae willing for acceptim eni treatment wea luk olsem hem bae stretawe helpem olketa, nomata treatment wea garem danger, olsem medicine wea kam from blood. Wanfala tru Christian bae trae for garem tingting wea moa waed, moa balance wea no tingim nomoa physical saed. Olketa Jehovah’s Witness tinghae long hard waka wea insaed long wei for provaedem gudfala medical kea, and olketa lukluk gud long danger/gud saed bilong eni treatment. Nomata olsem, taem medicine hem kam from blood, olketa ting raonem gud wanem God talem and wei wea olketa fren witim Man Wea Givim Laef long iumi.—Psalm 36:9.

Hem wanfala blessing for wanfala Christian garem sem trust olsem man wea raetem psalm hem raet: “Jehovah God hem sun and wanfala shield; hem savve givim favor and glory. Jehovah seleva bae no holem bak gudfala samting from olketa wea wakabaot long stretfala fasin. O Jehovah . . . , hapi nao man wea trustim iu”!—Psalm 84:11, 12.

[Footnote]

[Box long page 30]

OLKETA KWESTIN WEA IU SAVVE ASKEM DOCTOR

Sapos iu bae kasem operation or treatment wea maet minim wei for iusim medicine wea kam from blood, askem:

Waswe evri doctor and nurse savve hao, olsem wanfala Jehovah’s Witness, mi nating acceptim eni blood transfusion (full blood, red cell, white cell, platelet, or blood plasma) nomata wanem kamap?

Sapos eni treatment wea doctor markem hem kam from blood plasma, red or white cell, or platelet, askem:

Datfala medicine kam from wanfala long olketa fofala main part bilong blood? Sapos olsem, iu savve explainim olketa samting insaed diswan?

Haomas long disfala medicine nao maet olketa givim mi, and hao nao bae mi kasem?

Sapos conscience bilong mi letem mi for acceptim, wanem medical danger nao stap?

Sapos conscience bilong mi muvim mi for rejectim disfala treatment, wanem nara treatment moa stap?

Bihaen mi ting raonem diswan moa, wanem taem nao mi savve talem iu disison bilong mi?