Waswe, Prea Duim Eni Gud?
KLOSAP evriwan feelim need for prea samfala taem. Tru nao, pipol bilong klosap evri religion savve prea strong. Olsem example, planti thousand taem insaed wanfala day, wanfala Buddhist maet repeatim disfala prea “Mi putim faith bilong mi long Amida Buddha.”
From planti problem wea go ahed evriwea long earth, fitim man for ask olsem: Wanem nao pipol expectim taem olketa prea? Waswe, evri prea hia duim eni gud samting?
Why Nao Pipol Prea?
Planti pipol bilong East prea long laen dadi and olketa god bilong Shinto and Tao. Olketa prea witim hope for pasim exam long skul, kasem gudfala harvest, or stopem sik. From hard waka bilong olketa, olketa Buddhist hope for kasem spesol savve. Olketa Hindu prea strong long olketa favorite god and woman god for savve, riches, and protection.
Samfala Catholic hope for helpem olketa man long wei for givim laef bilong olketa olsem monk or nun long olketa monastery or convent, for prea olowe. Planti Catholic askem help from Mary taem olketa talem prea wea olketa baeheartim, maet witim help bilong olketa rosary bead. Long olketa kantri long Asia, planti pipol iusim olketa prea wheel. Olketa Protestant repeatim Lord’s Prea, and tu olketa savve talemaot feeling bilong olketa long God enitaem. Planti Jew travel farawe for prea long Western Wall long Jerusalem, olketa hope for temple kamap moa and for wanfala niu taem bilong gudfala living and peace.
Nomata planti million waka hard for prea, living bilong man hem fulap witim olketa problem bilong poor living, wei for depend long drug, famili wea brekdaon, raf fasin, and war. Waswe, maet hem from evri pipol hia no prea long stret wei? Waswe, eniwan really herem olketa prea?
Waswe, Eniwan Herem Olketa Prea?
Prea no savve duim eni gud samting sapos no eniwan herem. Taem man prea, hem biliv samwan long spirit world herem hem. Nomata olsem, olketa saond wave no karem go olketa prea. Planti pipol biliv samwan savve readim tu tingting bilong man wea prea. Hu nao datwan?
Pipol wea duim research no savve hao nao tingting start long planti billion neuron wea mekem ap cerebral cortex bilong brain bilong iumi. Bat, hem fitim for Datwan wea wakem brain nao savve readim olketa tingting olsem. Datwan nao hem Creator bilong iumi, Jehovah God. (Psalm 83:18; Revelation 4:11) Olketa prea shud go long hem. Bat waswe, Jehovah lisin long evri prea olsem?
Waswe, Hem Herem Evri Prea?
King David bilong Israel bifor hem wanfala man for prea. Olsem man wea raetem psalm hem singim: “O Man wea herem prea, evri difren kaen pipol bae kam long iu.” (Psalm 65:2) Jehovah savve minim olketa prea long eniwan bilong planti thousand languis wea olketa man iusim. Wei wea no eni man garem mind wea savve herem planti information olsem no minim God no savve lisin long evriwan wea prea long hem long wei wea hem acceptim.
Nomata olsem, Jesus Christ—man for prea tu—showimaot hao God no hapi long evri prea. Lukim samting wea Jesus talem abaotem fasin for talem moa prea wea olketa bae-heartim wea pipol long datfala taem duim. Insaed Catholic Jerusalem Bible, hem sei olsem: “Long prea bilong iufala no talem enikaen toktok olsem olketa heathen duim, from olketa tingim taem olketa talem staka toktok bae God herem olketa.” (Matthew 6:7) Iumi kanduit expectim Jehovah for lisin long olketa prea wea no talemaot trufala feeling bilong iumi.
Taem hem showimaot why nao God no hapi long samfala prea, wanfala Bible proverb sei: “Man wea tanem ear bilong hem for no herem law—prea bilong hem tu olsem samting nogud.” (Proverbs 28:9) Narafala proverb sei: “Jehovah hem stap farawe from wicked pipol, bat hem herem prea bilong olketa raeteous wan.” (Proverbs 15:29) Long wanfala taem wea olketa leader bilong Judah bifor guilty long bigfala wei, Jehovah sei: “Taem iufala openem hand bilong iufala, mi haedem eye bilong mi from iufala. Nomata iufala talem planti prea, mi no lisin; hand bilong iufala fulap witim wei for spillim blood.”—Isaiah 1:1, 15.
Aposol Peter storyim nara samting wea savve mekem God no acceptim olketa prea. Peter raet olsem: “Iufala hasband, go ahed for stap long sem wei witim waef bilong iufala long wei wea fitim savve, givim honor long olketa olsem wanfala samting wea hem no strong tumas, wanfala woman, from iufala tu bae kasem laef witim olketa, nogud diswan stopem prea bilong iufala.” (1 Peter 3:7) Prea bilong man wea no lisin long kaonsel olsem hem maet kasem ruf long haos nomoa!
So, hem barava klia hao man mas kasem samfala mark bifor God herem prea bilong hem. Nomata olsem, planti wea prea no warim wei for duim samting wea God askem from iumi. Dastawe staka prea no mekem world kamap moabeta.
So, wanem nao God laekem for mekem hem herem olketa prea bilong iumi? Ansa hem join witim reason bilong iumi for prea? Tru nao, sapos iumi laek for savve sapos prea bilong iumi duim eni gud samting, iumi mas minim purpose bilong prea. Why nao Jehovah openem wei for iumi story long hem?
[Piksa Credit Line long page 3]
G.P.O., Jerusalem