Iumi Datkaen wea Garem Faith

Preachim Kingdom Long Altiplano Long Peru

Midol long east and west bilong olketa Andes Maunten—wea Bolivia and Peru meet—Altiplano hem stap. Nem hia minim “hae level ples,” or “plateau.” Big part long diswan insaed Bolivia.

Altiplano hem 100 kilometer waed and winim 1,000 kilometer long, and samting olsem 3,700 meter hae winim sea level. Sapos iu flae insaed aeroplane from Lima, kapitol bilong Peru, iu bae go pas long El Misti wea snow kavarem, volcano wea hae kasem 5,822 meter. From there iu savve lukim Nevado Ampato and Nevado Coropuna, tufala maunten wea hae winim 6,000 meter. Then seknomoa iu bae lukim wanfala big level area—Altiplano long south bilong Peru.

Kapitol bilong Altiplano long Peru hem Puno, long northwest saed bilong Lake Titicaca, barava hae lake long world. Bikos ples hia hem winim thri kilometer hae, hem tek taem lelebet for man wea visit for getius long air wea thin. Pipol wea stap saed long Lake Titicaca olketa Quechua and Aymara Indian. Olketa werem color kaleko wea red, green, or blue taem olketa waka long chacras, or smol farm bilong olketa. Nomata Spanish nao hem languis bilong Peru, pipol savve story long Quechua and Aymara languis long Altiplano.

Leadim Preaching Waka

Planti hambol pipol wea waka hard wea iusim Quechua and Aymara languis kasem stretfala savve abaotem Bible truth no longtaem go nomoa. Diswan hem bikos long rich blessing bilong Jehovah long hard waka bilong olketa wea full-taem for talemaot Kingdom wea serve olsem spesol pioneer.

Olsem example, tufala spesol pioneer José and Silvia kasem assignment long taon bilong Putina, wea samting olsem 50 kilometer from Lake Titicaca. Insaed tufala month, Silvia conductim 16 hom Bible study, and José, 14. Insaed sixfala month nomoa, kongregeson pablisa grow from 23 go kasem 41. Long semtaem, namba bilong olketa wea attendim meeting grow from 48 go kasem peak bilong 132.

“Taem mifala startim olketa kongregeson meeting long olketa community olsem,” José sei, “mifala faendem hem gud for start witim Pablik Meeting and Kongregeson Buk Study. Diswan mekem hem moa isi for olketa niu wan for start attendim olketa meeting.”

Tufala really sista—wanfala hem pioneer—nao firstaem tekem gud nius go long Muñani, wea samting olsem 20 kilometer from Putina. Long there tufala startim Bible study witim wanfala blind man, Lucio.a Hem invaetem brata bilong hem Miguel, missionary bilong Catholic church and leader bilong community from wanfala area klosap. Taem wanfala fren askem Miguel why hem go long Muñani evri week, hem sei hem go for lane abaotem Jehovah and Word bilong Hem. Then hem askem disfala kwestin: “Why nao iumi no studyim Bible long hia?” Bikos long interest wea pipol bilong Miguel showimaot, olketa Witness arrange for duim olketa meeting long there.

Miguel start for sharem samting wea hem lanem witim nara pipol. Bat waswe long position bilong hem olsem Catholic missionary and deputy governor? Long wanfala meeting long community hall, hem announcem hem resign olsem Catholic missionary. Waswe, bae olketa appointim nara person? Samwan long audience sei: “Why nao iumi needim nara missionary taem iumi lanem truth?” Hem minim evri samting wea Olketa Jehovah’s Witness teachim. Nara man sei moa: “Mifala no agree for iu nomoa resign. Hao sapos iumi evriwan nao resign?” Evriwan wea attend singaot tugeta: “Iumi evriwan resign!”

No longtaem bihaen, olketa storyim olketa idol long wanfala community meeting. Wanfala man askem evriwan for readim Deuteronomy 7:25, wea sei: “Olketa image bilong god bilong olketa iufala shud bonem long fire. Iufala mas no laekem silver and gold wea stap long olketa, or tekem for iufala seleva, nogud hem trapim iufala; from hem samting wea nogud tumas long God bilong iufala Jehovah.”

Then datfala man askem evriwan wea laek for bonem evri idol for apim hand bilong olketa. Stretawe evri hand go ap. (Acts 19:19, 20) Distaem, 23 long 25 famili insaed datfala community studyim Word bilong God. Tufala kamap pablisa wea no baptaes, and faevfala hasband and waef plan for registerim marit bilong olketa mekem olketa savve stap klin front long Jehovah.—Titus 3:1; Hebrews 13:4.

Teach Witim Kaset Recording

Bikos staka pipol no savve read long Altiplano, olketa Watch Tower video and kaset recording long olketa languis long there givim bigfala help—and for conductim olketa hom Bible study tu. Witim help bilong wanfala kaset, wanfala spesol pioneer, Dora conductim olketa study insaed brochure Wanem Nao God Mas Kasem From Iumi? Hem pleim each paragraf, then hem askem Bible student olketa kwestin long information wea hem just herem.

Radio station long there evritaem pleim olketa part bilong Wanem God Mas Kasem brochure long Quechua languis. Olketa duim sem samting tu for samfala part bilong Wekap! magasin long Spanish languis. So, planti pipol herem Kingdom message and laek for lanem moa samting taem Olketa Jehovah’s Witness kam long haos bilong olketa.

Altiplano hem stap farawe from eye bilong planti long world bat no from eye bilong God. From love bilong Jehovah for man, planti pipol long Altiplano bilong olketa Andes Maunten kamap part long sekson wea givim glory long nambawan haos bilong hem for tru worship.—Haggai 2:7.

[Footnote]