Olketa Jehovah’s Witness Muv Ahed Witim Biliv wea Strong!

Report Bilong Annual Meeting

LONG disfala taem wea fasin for daot hem kamap big, Olketa Jehovah’s Witness difren evribit olsem olketa Christian wea garem biliv wea strong. Diswan showaot klia long annual meeting bilong Watch Tower Bible and Tract Society of Pennsylvania, long Jersey City, New Jersey, Assembly Hall bilong Olketa Jehovah’s Witness long Saturday, October 7, 2000.a

Long firstfala toktok bilong hem, datfala chairman, John E. Barr, wanfala member bilong Governing Body bilong Olketa Jehovah’s Witness hem sei: “Nomata planti billion man stap long earth, iumi nomoa savve and biliv hao Son bilong Jehovah wea hem lovem tumas, Christ Jesus, distaem hem long throne long heven, and rul midolwan long olketa enemy bilong hem.” Pruv abaotem wei for biliv strong olsem hem showaot klia long sixfala report from raonem world wea mekem iumi barava hapi tumas.

Winim Spiritism Witim Truth Bilong Bible Long Haiti

Spiritism kasem evriwea long Haiti. “Planti taem,” Branch Komiti coordinator John Norman hem sei, “pipol start for duim voodoo for protectim olketa seleva.” Wanfala kastom man garem samfala daot taem hem lusim leg bilong hem long wanfala accident. Hem laek savve, ‘Hao nao diswan kasem mi sapos olketa spirit protectim mi?’ Olsem planti nara man, disfala man lanem truth from Olketa Jehovah’s Witness and olketa helpem hem for kamap free from spiritism. Wei wea Haiti fit for garem increase hem showaot long April 19, 2000, taem olketa wea attendim Memorial bilong dae bilong Christ hem fofala taem moa big winim namba bilong olketa pablisa long datfala kantri.

Strong Long Bigfala Territory Bilong Korea

Long Korea, 40 percent bilong Olketa Jehovah’s Witness duim full-taem service. Branch Komiti coordinator Milton Hamilton sei,“nomata territory bilong mifala garem winim 47 million pipol, from disfala bigfala army for preach, mifala duim full territory samting olsem wantaem evri month.” Samting wea barava grow big hem olketa saen languis kongregeson. Long wanfala saen languis circuit, olketa conductim 800 hom Bible study. Diswan hem average bilong wanfala study for evri pablisa. Sorre samting, olketa young brata still go long prison bikos olketa no teksaed. Olketa wea lukaftarem olketa prisoner deal witim olketa faithful Christian hia long gudfala wei, and planti taem trustim olketa witim samfala waka.

Duim Samting Fitim Increase Long Mexico

Peak bilong 533,665 wea talemaot Kingdom reportim field service long Mexico long August 2000. Winim thrifala taem datfala namba attendim Memorial. “Goal bilong mifala for disfala year hem for buildim nara 240 Kingdom Hall,” Branch Komiti coordinator Robert Tracy hem talem. “Bat,” hem sei, “mifala needim planti moa.”

Olketa young wan long Olketa Jehovah’s Witness long Mexico barava gudfala example. Taem hem story abaotem wanfala young wan, wanfala Catholic priest sei: “Mi laek for garem just wanfala olsem hem midolwan olketa follower bilong mi. Mi tinghae long olketa pipol hia for strongfala will bilong olketa and wisefala wei wea olketa iusim Bible. Olketa defendim God, nomata sapos olketa mas putim laef bilong olketa long danger for duim diswan.”

Faithful Fasin Midolwan Long Trabol Long Sierra Leone

Start kam from April 1991, taem civil war kamap long Sierra Leone, planti thousand pipol dae, garekil or cripple from disfala faet. Branch Komiti coordinator Bill Cowan reportim hao “war and hard taem barava affectim pipol long bigfala wei.” “Planti wea bifor no interest long message bilong mifala, distaem lisin witim interest. Planti taem pipol kam seleva long Kingdom hall bilong mifala for attendim first meeting bilong olketa. Planti taem long street pipol stopem olketa brata for ask for wanfala Bible study.” Datfala Kingdom-preaching waka garem gudfala frut long Sierra Leone nomata datfala kantri garem olketa problem wea no finis.

Bigfala Building Waka Long South Africa

Distaem, need hem stap for planti thousand Kingdom Hall long territory wea branch office bilong South Africa lukaftarem. Olketa buildim finis planti handred hall. Branch Komiti member John Kikot sei hao “winim wei for garem meeting long wanfala rabis haos or andanit long wanfala tree, olsem olketa duim bifor, olketa brata bilong iumi meet long wanfala ples wea fitim and garem olketa gudfala chair.” “Nomata klosap evri Kingdom hall hia no followim spesol plan, planti pipol mekhae long olketa olsem samting wea barava fitim winim olketa nara building wea stap long datfala sem area. Long samfala area, olketa experiencem hao bihaen olketa buildim wanfala Kingdom Hall, namba wea attendim datfala kongregeson long year bihaen bae dabol.”

Wanfala Niu Genereson Bilong Olketa Witness Long Ukraine

Long 2000 service year, disfala kantri garem peak bilong 112,720 pablisa. Winim 50,000 bilong olketa hia lanem Bible truth insaed faevfala year wea go pas finis. John Didur, coordinator bilong Branch Komiti sei hao “tru tumas, Jehovah mekem kamap wanfala niu, and strong genereson bilong olketa Witness for talemaot nem bilong hem!” “Insaed long tufala year wea just go pas,” hem sei, “mifala offerim winim 50 million magasin, wea semsem witim namba bilong pipol long kantri. Evri month, mifala kasem samting olsem wan thousand leta from pipol wea interest for askem moa information.”

Olketa Nara Part Long Program wea Muvim Man

Daniel Sydlik, wanfala member bilong Governing Body, givim wanfala interesting tok. Datfala article “Wei wea Governing Body Hem Difren From Wanfala Legal Corporation,” insaed long disfala magasin, hem garem planti information wea kam from datfala tok.

Theodore Jaracz bilong Governing Body givim wanfala tok wea muvim tingting bilong man wea garem theme “Olketa Overseer and Ministerial Servant Kasem Appointment Long Theocratic Wei.” Wanfala article long disfala magasin storyim datfala subject.

Insaed datfala annual meeting tu hem wanfala tok for muvim man, wea member bilong Governing Body, David Splane, hem givim abaotem yeartext for year 2001. Hem kam from toktok bilong aposol Paul, wea sei: “Standap evribit witim biliv wea strong long full will bilong God.” (Colossians 4:12) Olketa Jehovah’s Witness raonem world disaed strong for duim diswan taem olketa preachim long faithful wei datfala gud nius bilong Kingdom bilong God long full earth.—Matthew 24:14.

[Footnote]