Resurrection Bilong Jesus Kasem Test
“Mi savve talem iu stret hao nomata iumi barava sure hao Jesus hem stap bifor . . . , iumi kanduit sure hao God resurrectim Hem from dae.” Hem nao samting wea wanfala bigman bilong Church of England, Archbishop bilong Canterbury, hem talem.
CHRISTIAN aposol Paul no garem eni daot abaotem diswan. Long chapter 15 bilong first leta bilong hem wea kam from God for olketa Christian fren bilong hem long Corinth bifor, Paul raet olsem: “Mi givim long iufala, witim olketa firstfala samting, wanem mi kasem tu, hao Christ dae for olketa sin bilong iumi for fitim olketa Scripture; and olketa berem hem, yes, hem laef bak long mek-thri day for fitim olketa Scripture.”—1 Corinthians 15:3, 4.
Faith long resurrection bilong Jesus Christ nao muvim olketa disaepol bilong hem for preachim gospel evriwea long Greek-Roman world—“evriwea anda long heven.” (Colossians 1:23) Tru nao, resurrection bilong Jesus nao barava faondeson bilong Christian faith.
Bat, long barava start, pipol daotem and no bilivim resurrection bilong Jesus. Long planti Jew, hem wei for tokspoelem God taem olketa follower bilong Jesus sei disfala man wea olketa killim dae hem nao Messiah. And long planti Greek pipol wea skul gud, witim biliv bilong olketa abaotem soul wea no savve dae, datfala idea abaotem resurrection hem nogud tumas.—Acts 17:32-34.
Olketa Man wea Daot Distaem
Long olketa year wea just go pas, samfala savveman wea sei olketa Christian raetem samfala buk and article wea showimaot daot long resurrection bilong Jesus, olsem hem wanfala story nomoa and olketa startim bigfala raoa abaotem disfala subject. Long lukluk bilong olketa for “datfala Jesus bilong history,” olketa difren savveman sei olketa story bilong Gospel abaotem grev wea emti and wei wea Jesus showim hemseleva bihaen resurrection, hem story nomoa wea olketa planim longtaem bihaen dae bilong hem for saportim wei wea olketa sei hem garem paoa long heven.
Olsem example, lukim tingting bilong savveman bilong Germany, Gerd Lüdemann, professor bilong New Testament and man wea raetem datfala buk What Really Happened to Jesus—A Historical Approach to the Resurrection. Hem talem hao resurrection bilong Jesus hem “wanfala emti idea” wea eniwan wea garem “tingting bilong science abaotem world” mas rejectim.
Professor Lüdemann sei samting wea aposol Peter lukim and bilivim olsem Christ wea resurrect, hem kamaot from wei wea Peter garem bigfala sorre and guilty feeling from hem denyim Jesus. And olsem Lüdemann talem, wei wea Jesus showim hemseleva wantaem long winim 500 pipol wea biliv hem just wanfala “bigfala hapi feeling” nomoa. (1 Corinthians 15:5, 6) For talem klia, planti savveman ting long Bible report abaotem samting wea Jesus duim bihaen hem resurrect, olsem hem tingting bilong olketa disaepol nomoa wea strongim bak moa trust bilong olketa long spiritual wei and strong long missionary waka.
Tru, planti pipol no interest tumas long diskaen raoa. Bat, wei for story abaotem resurrection bilong Jesus shud mekem iumi evriwan interest. Why nao olsem? Bikos, sapos Jesus no resurrect, Christian Wei garem giaman faondeson. Long narasaed, sapos resurrection bilong Jesus hem really wanfala tru samting bilong history, Christian Wei garem faondeson long truth. Olketa no mekhae long wanem Christ talem nomoa bat olketa promis bilong hem tu. And tu, sapos resurrection hem really happen, dae hem wanfala strongfala enemy wea iumi fit for winim.—1 Corinthians 15:55.
[Piksa Credit Line long page 3]
From the Self-Pronouncing Edition of the Holy Bible, containing the King James and the Revised versions