Wei for Obey—Important Leson for Olketa Pikinini?
“PARENTS Wantem Olketa Pikinini wea Garem Tingting Bilong Olketa Seleva, No Olketa Pikinini wea Obey.” Hem nao wanfala niuspepa heding talem. Disfala report kamaot from wanfala survey long New Zealand, wea showimaot hao “22 percent (nomoa) long olketa wea insaed long survey agree hao parents nao shud teachim olketa pikinini for obey.” Disfala survey faendem tu hao distaem, parents biliv hem moa important for teachim pikinini for garem gudfala fasin, for no depend long eniwan, and acceptim responsibility.
From pipol distaem tingim seleva nomoa, iumi no sapraes hao staka pipol no ting strong long wei for obey and for teachim diswan long olketa pikinini. Bat waswe, iumi shud ting long wei for pikinini obey olsem samting wea no fitim distaem? Or waswe, hem wanfala long olketa important leson wea olketa pikinini savve lanem and kasem gudfala samting from hem? Samting wea moa important, hem hao nao Jehovah God, datwan wea startim famili arrangement, ting long wei for pikinini obeyim mami and dadi, and wanem nao samfala gud samting wea kamaot from kaen wei for obey olsem?—Acts 17:28; Ephesians 3:14, 15.
“Diswan Hem Raeteous”
Taem aposol Paul hem raet go long first-century Christian kongregeson long Ephesus hem sei: “Olketa pikinini, obeyim dadi and mami bilong iufala insaed long Lord, from diswan hem raeteous.” (Ephesians 6:1) So, main reason for kaen wei for obey olsem, hem hao diswan hem fitim mark bilong God abaotem wanem hem stret. Olsem wei wea Paul hem talem, “diswan hem raeteous.”
For followim diswan, iumi lukim hao Word bilong God storyim wei for dadi and mami givim discipline witim love olsem samting wea luk naes tumas, “samting wea luk naes tumas long hed bilong iu, and naesfala nekles long nek bilong iu,” and olsem samting wea “mekem Lord hapi.” (Proverbs 1:8, 9; Colossians 3:20) Long wei wea barava difren, Jehovah bae no acceptim olketa wea no obeyim mami and dadi.—Romans 1:30, 32.
“For Mekem Evri Samting Go Ahed Gud Witim Iufala”
Paul hem storyim nara gudfala samting wea bae kamaot from wei for obey taem hem sei: “‘Honorim dadi and mami bilong iu’; hem nao firstfala komand witim promis: ‘For mekem evri samting go ahed gud witim iufala and for mekem iufala savve stap longtaem long disfala earth.’” (Ephesians 6:2, 3; Exodus 20:12) Long olketa wanem wei nao maet wei for obey long mami and dadi mekem pikinini for stap gud?
First samting, waswe, hem no tru hao mami and dadi garem moa savve from olketa laef for longfala taem? Nomata luk olsem maet olketa no savve tumas abaotem olketa computer or samfala nara subject wea olketa teachim long skul, olketa savve abaotem living and hao for deal witim olketa problem bilong laef. Long narasaed, young pipol no garem balance tingting wea mature pipol garem. So, hem wei bilong olketa for no tingting firstaem taem olketa disaedem samting, planti taem olketa wikdaon from hevi wea kam from olketa wea sem age, wea spoelem olketa. Bible hem sei: “Krangge fasin hem stap insaed long heart bilong wanfala boy.” Wanem nao ansa? “Stik bilong discipline nao bae aotem datwan from hem.”—Proverbs 22:15.
Olketa gudfala samting wea kamaot from wei for obey affectim moa samting winim wei wea mami, dadi and pikinini fren gud tugeta nomoa. For mekem community go ahed gud and fit for duim samting, pipol mas waka gud tugeta, wea needim wei for obey. Olsem example, samting wea mekem hasband and waef garem peace, wan mind and hapi, hem wei wea tufala willing for tingim narawan, winim wei for forcem samting and no tingim feeling bilong narawan and samting wea hem fit for kasem. For wanfala company win, hem barava needim olketa wakman for garem fasin for stap anda. Saed long olketa law bilong gavman, fasin for obey hem mekem man free from panis, and hem protectim pipol tu.—Romans 13:1-7; Ephesians 5:21-25; 6:5-8.
Young pipol wea no obeyim olketa wea garem paoa planti taem kamap olketa bighed pipol insaed long community. Long wei wea difren, for full laef bilong hem, man savve kasem olketa reward from wei wea hem lane for obey taem hem young. Hem barava helpem man for lanem diswan taem hem wanfala pikinini!
Bigfala Reward for Wei for Obey
Wei for obey mekem olketa long famili fren gud tugeta and givim olketa nara gudfala samting wea stap for full laef, and tu, hem kamap faondeson for buildim wanfala wei for fren wea important winim eni narawan—wei for fren midolwan wanfala man and creator bilong hem. Olsem datfala “Nambawan Creator” wea “givim laef,” fitim iumi for obeyim Jehovah God evribit.—Ecclesiastes 12:1; Psalm 36:9.
Disfala word “obey” and olketa nara word for obey, hem stap winim 160 taem insaed Bible. And tu, hem garem planti handred long olketa law, order, komandment, and judicial disison bilong God, wea evriwan long olketa needim man for stap anda long hem. Iumi no garem eni daot hao God ting long wei for obey olsem wanfala mark wea man mas garem for Hem appruvim hem. Tru nao, man no savve mekem grow wei for fren witim Jehovah sapos hem no obey. (1 Samuel 15:22) Hem sorre samting hao feeling bilong evri man hem for no obey. Bible hem sei: “Evri feeling insaed long heart bilong man hem nogud start kam long taem hem young.” (Genesis 8:21) So, man mas lane for obey no long taem hem pikinini nomoa bat long full laef bilong hem. Wei for duim olsem bae bringim bigfala reward.
Remember hao, olsem aposol Paul talem, wei wea Jehovah komandim pikinini for obeyim parents hem kam witim promis wea garem tufala part, “for mekem evri samting go ahed gud witim iufala and iufala savve stap longtaem long disfala earth.” Iumi savve faendem wanfala promis wea semsem long Proverbs 3:1, 2: “Son bilong mi, no forgetim law bilong mi, and letem heart bilong iu followim olketa komandment bilong mi, from planti day and year bilong laef and peace bae kam long iu.” Nambawan reward for olketa wea obey hem wei for fren witim Jehovah distaem, and laef olowe long wanfala niu world wea garem peace.—Revelation 21:3, 4.
[Olketa Piksa long page 30, 31]
Wei for obey mekem gudfala wei for fren insaed long famili, ples for waka, and witim Jehovah