Mifala No Stap Seleva Taem Faith Kasem Test

Vicky hem naesfala baby girl—healthy, and fulap witim laef. Taem hem born long spring season long 1993, mifala hapi fogud. Long datfala taem mifala stap long wanfala smol taon long south bilong Sweden, and laef hem barava gud.

BAT, taem Vicky kasem wan and haf year, laef bilong mifala hem barava change evribit. For lelebet longtaem hem bin sik, so mifala tekem hem long wanfala hospital. Bae mifala nating forgetim taem doctor talem hao dota bilong mifala garem acute lymphoblastic leukemia, wanfala kaen cancer wea savve kasem pikinini and wea affectim olketa white blood cell.

Mifala faendem hem hard for biliv hao smol girl bilong mifala garem disfala bigfala sik. Hem just start for luksavve long world raonem hem, and seknomoa hem maet dae. Taem hem trae for comfortim mifala, datfala doctor sei hao wanfala gudfala treatment stap for givim hem, wea insaed diswan hem chemotherapy witim samfala blood transfusion. Diswan nao next samting wea mekem mifala seke.

Faith Bilong Mifala Kasem Test

Mifala barava lovem dota bilong mifala and wantem best medical treatment for hem. Nomata olsem, mifala bae nating agree for iusim blood transfusion. Mifala biliv strong long Word bilong God, Bible, wea talemaot long klia wei hao olketa Christian mas ‘stap klia from blood.’ (Acts 15:28, 29) Mifala savve tu hao blood transfusion seleva garem samfala danger. Planti thousand kasem olketa sik and dae finis from olketa transfusion. Only wei nao hem for kasem gudfala treatment wea no iusim blood transfusion. Long disfala wei, faet bilong mifala for faith hem start.

Wanem nao mifala savve duim? Mifala contactim Hospital Information Services long branch office bilong Olketa Jehovah’s Witness long Sweden for askem help.a Stretawe, olketa contactim olketa difren hospital long Europe for lukaotem wanfala hospital and doctor wea willing for givim chemotherapy bat no witim blood transfusion. Strong and love wea olketa Christian brata bilong mifala showimaot taem olketa trae hard for help hem barava strongim mifala. Mifala no stap seleva long disfala faet bilong faith.

Insaed samfala hour nomoa, olketa faendem wanfala hospital and doctor long Homburg/Saar, Germany. Olketa redyim evriting mekem mifala go long aeroplane and kasem there long nextfala day for doctor lukluk gud long Vicky. Taem mifala arrive, olketa Christian brata from kongregeson bilong Olketa Jehovah’s Witness long Homburg, and samfala relative bilong mifala tu, stap for welkamim mifala. And long kaenfala wei wanfala brata from lokol Hospital Liaison Komiti welkamim mifala. Hem go witim mifala long hospital and saportim mifala long evri wei wea hem fit. Mifala kasem comfort for lukim hao nomata long difren kantri, olketa spiritual brata saportim mifala.

Taem mifala meetim Dr. Graf long hospital, mifala kasem comfort moa. Hem barava kaen long mifala and hem promis hao hem bae duim evriting wea hem fit for duim for givim treatment long Vicky wea no iusim blood transfusion. Nomata sapos hemoglobin level bilong hem go daon long 5 g/dl, hem willing for go ahed witim treatment and no iusim blood transfusion. Hem sei tu hao from olketa faendem disfala sik kwiktaem and duim samting kwiktaem for tekem Vicky kam long there, diswan minim treatment garem gudfala chance for win. Hem talem stret hao diswan bae firstaem bilong hem for givim chemotherapy and no iusim blood transfusion long kaen sik wea Vicky garem. Mifala barava thankiu and tinghae long wei wea Dr. Graf hem no fraet and hem disaed strong for helpem mifala.

Olketa Problem Saed Long Selen

Then kwestin kamap, Hao nao bae mifala peim kost bilong treatment bilong Vicky? Mifala seke fogud taem olketa talem hao olketa treatment for tufala year bae kostim samting olsem 150,000 deutsche marks. Nomata smol haf long selen hia, mifala no garem, bat hem important tumas for Vicky mas startim treatment bilong hem stretawe. From mifala lusim Sweden for kam long Germany for kasem treatment, mifala no fit for kasem eni pablik health insurance. So mifala long there and treatment stap redy for smolfala girl bilong mifala wea sik fogud, bat mifala no garem inaf selen for peim.

Datfala hospital helpem mifala and talem hao treatment savve start stretawe sapos mifala peim 20,000 marks and saenem wanfala pepa for promis for peim full kaon bihaen. Witim samfala selen wea mifala sevem and kaenfala help bilong olketa fren and relative, mifala peim datfala 20,000 marks—bat waswe long kaon wea stap yet?

Mifala luksavve moa hao mifala no stap seleva long faet bilong mifala for faith. Wanfala spiritual brata, wea mifala no savve long hem long datfala taem, hem willing for peim datfala kaon. Bat, nomata hem kaen tumas, from mifala mekem nara arrangement, mifala no need for iusim selen bilong hem.

Medical Savve Hem Duim Waka

Datfala chemotherapy treatment hem start. Olketa day and week go pas. Samfala taem, hem barava hard and tekem planti strong bilong mitufala and smol dota bilong mitufala tu. Long narasaed, mifala hapi fogud and thankiu evritaem hem kamap lelebet gud. Datfala chemotherapy hem go ahed for eitfala month. Hemoglobin level bilong Vicky hem go daon and wantaem kasem 6 g/dl, and Dr. Graf keepim promis bilong hem.

Distaem, winim sixfala year go pas finis, and wanfala last chek ap long spinal fluid bilong hem no showim eni saen bilong leukemia. Distaem hem wanfala hapi girl wea no garem eni saen bilong datfala sik. Yes, wei wea Vicky hem kamap gud evribit hem luk olsem wanfala mirakol. Mifala savve hao planti pikinini wea garem disfala sem sik dae nomata olketa kasem chemotherapy and olketa blood transfusion.

Faet bilong mifala for datfala faith hem win, bat hem win witim help bilong olketa relative, olketa Christian brata and sista, and olketa savveman bilong medical. Hospital Information Services saportim mifala full day and naet. Dr. Graf and olketa wea waka witim hem iusim savve bilong olketa for helpem Vicky kamap gud moa. For evri samting hia, mifala barava thankiu.

Hem Strongim Faith Bilong Mifala

Bat, winim evri samting, mifala thankiu long God bilong mifala, Jehovah, for loving kea bilong hem and strong wea mifala kasem thru long Word bilong hem, Bible. Taem mifala ting go bak, mifala luksavve hao mifala lanem staka samting and hao disfala samting wea mekem mifala wari tumas hem strongim faith bilong mifala.

Distaem feeling bilong mifala long heart hem for keepim gud disfala klos wei for fren witim Jehovah God and for teachim dota bilong mifala hao hem gud samting for garem laef wea followim olketa mark bilong hem. Yes, mifala want for givim hem wanfala gudfala spiritual present bilong laef olowe insaed datfala Paradaes wea bae kam long earth.—Contribution.

[Footnote]