Hao for Deal Witim Nogud Feeling

● Asaph komplen: “Hem barava iusles nomoa hao mi klinim heart bilong mi and hao mi wasim hand long wei for no guilty. And mi safa long full day, and mi kamap stret evri morning.”—Psalm 73:13, 14.

● Baruch krae: “Trabol, nao, long mi, from Jehovah joinim kam sorre long pain bilong mi! Mi feel taed from sorre bilong mi, and mi no faendem eni ples for rest.”—Jeremiah 45:3.

● Naomi tok sorre: “Almighty hem mekem saoa tumas for mi. Mi fulap taem mi go, and Jehovah mekem mi kam bak emti hand. Why nao iufala shud kolem mi Naomi, taem Jehovah nao wan wea mekem mi shame and Almighty nao kosim bigfala trabol for mi?”—Ruth 1:20, 21.

BIBLE garem staka example bilong olketa faithful worshiper bilong Jehovah wea long samfala taem barava feel wikdaon. Hem tru, iumi evriwan kasem kaen feeling olsem samfala taem from iumi no perfect. Samfala long iumi maet moa isi for feel wikdaon—maet witim wei for feel sorre long seleva tu—winim narawan from iumi kasem olketa barava nogud samting bifor.

Bat sapos iumi no kontrolem, olketa feeling hia savve spoelem wei wea iumi fren witim pipol and Jehovah God. Wanfala Christian woman wea lelebet garem wei for feel sorre long hemseleva sei: “Mi no acceptim staka invitation long olketa hipap tugeta from mi feel mi no gudfala kaban for olketa insaed kongregeson.” Olketa feeling olsem savve barava spoelem laef bilong man! Wanem nao iu savve duim for stretem olketa?

Kam Klosap Long Jehovah

Long Psalm 73, Asaph honest for storyim wari bilong hem. Taem hem markem laef bilong hemseleva witim gudfala living bilong wicked pipol, hem kamap jealous. Hem lukim hao olketa wea no followim God olketa praod and raf, and luk olsem olketa no kasem eni panis for diswan. Then Asaph daotem wei wea stretfala living hem bringim eni gud samting.—Psalm 73:3-9, 13, 14.

Olsem Asaph, waswe, iu bin lukim wei wea wicked pipol luk olsem olketa go ahed gud, wea show-off witim rong fasin bilong olketa? Hao nao Asaph winim nogud feeling bilong hem? Hem go ahed for sei: “Mi go ahed for tingting raonem mekem mi savve long hem; hem wanfala trabol long eye bilong mi, go kasem taem mi kam insaed nambawan holy ples bilong God. Mi laek for luksavve long future bilong olketa.” (Psalm 73:16, 17) Asaph lukaotem help taem hem tan go long Jehovah long prea. Long wei for iusim sem toktok wea aposol Paul talem bihaen, Asaph hem daonem “physical man” thru long wei for wekapem “spiritual man” insaed long hemseleva. Witim niufala spiritual tingting, hem minim hao Jehovah heitim nogud fasin and hao long taem wea hem markem, wicked pipol bae kasem panis.—1 Corinthians 2:14, 15.

Hem barava important for iu letem Bible helpem iu lukim tru samting bilong laef! Jehovah remindim iumi hao hem lukim wanem wicked pipol duim. Bible hem teach: “No giamanim iufala seleva: iufala no savve trikim God. Eni samting man hem plantim, datwan nao bae hem harvestim tu . . . So letem iumi no givap for duim wanem hem gud.” (Galatians 6:7-9) Jehovah bae putim wicked pipol “long graon wea slippery”; hem bae mekem olketa “foldaon and pisis.” (Psalm 73:18) Gogo justice from God mas evritaem win.

Wei for evritaem kaikai from spiritual tebol bilong Jehovah and kaban witim pipol bilong God bae helpem iu for strongim faith and winim wei for feel wikdaon or garem nogud feeling. (Hebrews 10:25) Olsem Asaph, thru long wei for stap klosap long God, iu savve kasem loving saport bilong hem. Asaph go ahed for sei: “Mi stap front long iu evritaem; iu holem nao raet hand bilong mi. Witim kaonsel bilong iu, bae iu leadim mi, and bihaen bae iu tekem mi long glory.” (Psalm 73:23, 24) Wanfala Christian wea olketa spoelem taem hem pikinini faendaot wisdom bilong disfala toktok. “For stap klos long kongregeson,” hem sei, “showim mi difren saed bilong laef. Mi lukim klia tumas hao olketa Christian elder olketa loving, hao olketa no policeman bat shepherd.” Yes, olketa Christian elder wea kea duim important waka for finisim olketa feeling wea savve spoelem man.—Isaiah 32:1, 2; 1 Thessalonians 2:7, 8.

Acceptim Kaonsel Bilong Jehovah

Baruch, secretary bilong Jeremiah datfala profet, hem sorre bikos long hevi saed long feeling wea hem kasem from assignment bilong hem. Bat, long kaenfala wei Jehovah mekem Baruch ting strong long wanem really happen. “‘For saed bilong iu, iu go ahed for lukaotem bigfala samting for iuseleva. No go ahed for lukaotem. From mi bae bringim bigfala trabol long evri flesh,’ hem nao toktok bilong Jehovah, ‘and bae mi givim iu soul bilong iu olsem reward long evri ples wea iu bae go long hem.’”—Jeremiah 45:2-5.

Long wei for tok stret, Jehovah explainim hao selfish wei bilong Baruch nomoa kosim hem for feel wiki. Baruch no savve faendem hapi insaed assignment wea God givim long hem and long semtaem aftarem bigfala samting for hemseleva. Iu tu maet faendem hao bigfala samting wea savve helpem iu winim wei for feel wikdaon hem for stap klia from olketa samting wea savve pullim iu and acceptim evribit peace bilong mind wea join witim wei for satisfae followim wei bilong God.—Philippians 4:6, 7.

Datfala widow woman Naomi nating letem feeling for sorre mekem hem stap seleva long Moab taem hasband and tufala son bilong hem dae. Bat, luk olsem hem bin garem nogud feeling abaotem hemseleva and tufala dota-in-law bilong hem. Taem hem sendem tufala awe, Naomi hem sei: “Hem saoa tumas long mi bikos long iufala, hao hand bilong Jehovah hem go aot againstim mi.” And narataem moa, bihaen hem kasem Bethlehem, hem sei: “No kolem mi Naomi [“Naesfala Samting Bilong Mi”]. Kolem mi Mara [“Saoa”], from Almighty hem mekem saoa tumas for mi.”—Ruth 1:13, 20.

Bat, Naomi no stap seleva taem hem sorre—awe from Jehovah and pipol bilong hem. Long Moab hem bin herem hao “Jehovah tan go moa long pipol bilong hem long wei wea hem givim olketa bred.” (Ruth 1:6) Hem savve hao best ples for hem hem witim pipol bilong Jehovah. So, Naomi witim dota-in-law bilong hem Ruth, go bak long Judah and long gudfala wei teachim Ruth wanem for duim long relative bilong tufala Boaz, wan wea baem hem bak.

Long sem wei distaem, olketa wea loyal wea lusim hasband or waef long dae deal witim hevi saed long feeling thru long wei for busy insaed Christian kongregeson. Olsem Naomi, olketa strong for followim spiritual samting, readim Word bilong God evriday.

Gud Samting From Wei for Followim Wisdom Bilong God

Olketa story hia long Bible givim moa savve long hao man savve deal witim nogud feeling. Asaph lukaotem help long temple bilong Jehovah and weit long patient wei long Jehovah. Baruch acceptim kaonsel and no letem material samting pullim hem. Naomi stap busy midolwan pipol bilong Jehovah, hem redyim young woman Ruth for olketa privilege bilong wei for worshipim trufala God.—1 Corinthians 4:7; Galatians 5:26; 6:4.

Iu savve winim feeling for wikdaon and nara nogud feeling thru long wei for tingim olketa win wea Jehovah givim long pipol bilong hem olsem wanfala sekson and olsem man wanwan. For win olsem, ting raonem nambawan love wea hem showim taem hem provaedem ransom for iu. Tinghae long trufala love bilong olketa Christian brata. Tingim evritaem living bilong iu insaed niu world bilong God wea klosap nao for kam. And letem iu ansa olsem Asaph: “For saed bilong mi, wei for kam klosap long God hem gudfala samting for mi. Mi putim Sovereign Lord Jehovah olsem ples bilong mi for stap sef, for talemaot evri samting wea iu duim.”—Psalm 73:28.