“Pablik Health Danger wea Haed”
WANFALA long evri thrifala full-grown pipol wea iusim Internet long United States lukluk long samfala kaen Web site bilong sex, wanfala survey long on-line sex showimaot diswan no longtaem go nomoa. Distaem planti pipol satisfaem feeling bilong olketa saed long sex thru long Internet. “Diswan hem wanfala big pablik health danger wea haed bikos, long wanfala wei, tu-thri nomoa luksavve long hem olsem or ting long hem long serious wei,” Dr. Al Cooper, datfala savveman wea leadim survey hia hem sei.
Hu nao isi for foldaon long wei for duim sex long internet olsem? “Olketa wea for full laef maet faendem hem hard for duim sex” bat wea “seknomoa faendem staka chance long Internet,” Dr. Cooper hem sei.
Bat olketa wea lukluk evritaem long olketa dirty piksa long Internet tingim fasin olsem no savve spoelem man. Waswe, hem olsem? Olsem wei wea man wea depend long drug needim datfala drug long bigfala wei moa, man wea iusim Internet for sex bae aftarem diskaen sex long wei wea moa big. Olketa duim nomata olketa savve maet olketa lusim waka bilong olketa and wei for fren witim partner!
Bat, olketa wea laek for mekem God hapi garem moa reason for stap klia from wei for lukluk long olketa piksa bilong sex long Internet. Word bilong God givim kaonsel olsem: “Killim dae olketa part bilong body bilong iufala long earth long saed bilong fornication, fasin wea no klin, wei for wantem sex, wei for wantem nogud samting and fasin for kavet, wea hem fasin for worshipim idol. Bikos long olketa samting hia, kros bilong God bae kam.” (Colossians 3:5, 6) For ‘killim dae olketa part bilong body bilong hem’ saed long wei for wantem sex wea no klin, man need for mekem grow strongfala love for Jehovah God. (Psalm 97:10) Sapos hem faendem hao disfala pablik health danger bilong wei for duim sex long Internet switim hem, hem need for strongim love for Jehovah long wei for studyim Word bilong God, Bible. Gudfala wei for kaban witim Olketa Jehovah’s Witness long Kingdom Hall savve helpem man for strongim wei wea hem disaed strong for mekem God hapi.