Sekson Raonem World wea Kea for Each Other
GO KASEM ples wea eye savve kasem, pipol long there. Planti olketa olo, wea samfala long olketa barava cripple so olketa hard for wakabaot gud. Olketa babule woman and olketa young hasband and waef wea leadim olketa smol pikinini long there tu. Evriwan hia refugee—olketa man, woman, and pikinini—wea war, natural disaster, or olketa nara problem forcem olketa for ranawe from hom bilong olketa for lukaotem sef ples long olketa kantri klosap. Samfala olketa forcem olketa planti taem for lusim ples wea olketa stap. Taem firstfala saen bilong trabol or bilong disaster hem start, olketa tekem tu-thri samting bilong famili, tekem pikinini bilong olketa, and go for ples wea moa sef. Then, taem evri samting kamap gud moa, planti refugee go bak for wakem moa hom bilong olketa and start moa.
Long olketa year wea go pas, Central African Republic hem openem wei for olketa refugee from planti kantri for kam insaed. No longtaem go nomoa, planti thousand pipol, wea insaed diswan hem planti long Olketa Jehovah’s Witness, mas ranawe from war wea go ahed long Democratic Republic of Congo for faendem sef ples long Central African Republic.
Olketa Brata Givim Help
Olketa Witness long Central African Republic tingim wei for organizem help hem wanfala privilege. Olketa redyim haos for olketa Christian brata wea kam. Firstaem, olketa faendem olketa rum long olketa private hom, bat taem namba bilong olketa refugee go ahed for grow, hem showimaot klia hao olketa need for mekem moa arrangement. Olketa changem samfala Kingdom Hall for kamap ples for stap. Olketa Witness long datfala ples go ahed for wakem moa laet, joinim olketa wata pipe, and olketa cement floor for olketa wea stap long hem feel gud. Olketa refugee hia waka tugeta witim olketa brata long there for wakem olketa haos hia. Olketa arrangem full program bilong Christian meeting long Lingala languis mekem olketa wea kam savve kasem planti spiritual kaikai wea givim laef. Datfala klos wei for waka tugeta midolwan olketa Witness long datfala ples witim olketa guest hia showimaot hao wanfala sekson bilong olketa brata evriwea long world hem wanfala really samting.
Olketa refugee famili no arrive tugeta evritaem. Samfala taem, olketa famili member wea separate join tugeta moa long ples wea olketa kam for hem. Olketa keepim wanfala list long nem bilong olketa wea arrive sef long evri Kingdom Hall. Olketa mekem arrangement for faendem olketa wea still lus. Branch office wea directim waka bilong Olketa Jehovah’s Witness long datfala kantri sendem thrifala trak evri day for helpem olketa Witness wea still kakam and for lukaotem eniwan wea maet lus. For luksavve long olketa trak hia, wanfala bigfala saen stap wea read “WATCH TOWER—Jehovah’s Witnesses.”
Tingim hapi wea olketa kasem taem wanfala grup bilong sevenfala refugee pikinini wea separate from dadi and mami bilong olketa lukim wanfala bas bilong Olketa Jehovah’s Witness. Semtaem olketa ran go long bas hia and showimaot olketa seleva olsem olketa Witness. Olketa brata helpem olketa for go insaed datfala bas and tekem olketa go long wanfala Kingdom Hall, wea olketa join tugeta moa witim famili bilong olketa.
Wanem nao helpem olketa faithful Christian hia for deal witim olketa problem olsem, no just wantaem nomoa, bat planti taem? Olketa barava bilivim strong hao iumi stap insaed olketa last day olsem olketa Holy Scripture talem finis.—2 Timothy 3:1-5; Revelation 6:3-8.
So, olketa savve hao klosap nao Jehovah God bae finisim olketa war, heit, raf fasin, and raoa. Disfala refugee problem hem bae wanfala samting bilong bifor. Long disfala taem, for fitim kaonsel bilong aposol Paul long 1 Corinthians 12:14-26, Olketa Jehovah’s Witness trae hard for kea for each other. Nomata olketa river, spialaen, languis, and farawe ples separatem olketa, olketa kea for each other, so olketa kwiktaem for duim samting taem samwan garem need.—James 1:22-27.
[Map long page 30]
AFRICA
Central African Republic
Democratic Republic of Congo
[Credit Line]
Mountain High Maps® Copyright © 1997 Digital Wisdom, Inc.
[Olketa Piksa long page 30]
Thrifala Kingdom Hall kamap ples for stap
[Piksa long page 31]
Olketa kwiktaem wakem olketa kitchen
[Piksa long page 31]
Moa and moa refugee arrive
[Olketa Piksa long page 31]
Just born bat olketa refugee finis