“Jehovah Hem Bin Barava Kaen Long Mi!”
LONG naesfala evening long March 1985, olketa man and woman long Raeting Department long headquarters bilong Olketa Jehovah’s Witness long New York, U.S.A., celebratem wanfala important samting. Kasem datfala taem Karl F. Klein serve finis for 60 year long full-taem ministry. Brata Klein hapi tumas for sei: “Jehovah hem bin barava kaen long mi!” Hem talem hao Psalm 37:4 hem wanfala Bible text wea hem laekem tumas. Bihaen, hem mekem evriwan hapi taem hem pleim cello bilong hem.
Long next 15-fala year, Brata Klein go ahed for waka olsem member bilong sekson wea duim raeting and for serve long Governing Body bilong Olketa Jehovah’s Witness. Then, long January 3, 2001, wea long dat taem hem 95 year, Karl Klein finisim laef bilong hem long earth long faithful wei.
Karl hem born long Germany. Famili bilong hem muv go long United States, and Karl hem growap long Chicago, Illinois. Taem hem young yet, Karl witim smol brata bilong hem Ted start for garem deep interest long Bible. Karl hem baptaes long 1918, and olketa spesol samting wea hem herem long wanfala convention bilong olketa Bible Student long 1922 startim wei wea hem lovem field ministry long full laef bilong hem. Hem no laek for missim chance for share long preaching waka evri week, and hem duim diswan nomata long olketa last week long laef bilong hem.
Karl kamap wanfala member bilong headquarters long 1925, and firstaem hem waka long printery. Hem barava lovem tumas music, and for samfala year hem pleim cello insaed wanfala orchestra wea plei long olketa Christian radio program. Bihaen, hem waka long Service Department, and hem enjoyim tumas for kaban witim overseer bilong hem, T. J. Sullivan. Long semtaem, Ted hem marit and hem witim waef bilong hem, Doris, start long missionary service long Puerto Rico.
For fifti year, Karl Klein hem waka long Raeting Department, wea hem duim bigfala waka from hem laekem tumas research and hem garem deep savve long Bible. Long 1963, Karl maritim Margareta, wanfala German missionary wea serve long Bolivia. Witim loving saport bilong Margareta, especially from hem garem samfala problem saed long health, hem fit for go ahed strong nomata hem winim age wea planti finis for waka. Wei bilong Karl for tok stret witim feeling bilong man for pleim music, join tugeta for mekem pipol rememberim olketa tok bilong hem long olketa kongregeson and convention. No longtaem bifor hem dae, evriwan hapi and kasem gud samting taem hem chairman for storyim morning text long bigfala Bethel famili long New York.
Planti wea evritaem readim Wastaoa bae rememberim laef story bilong Brata Klein, wanfala naesfala story abaotem olketa experience bilong hem wea olketa pablisim long magasin bilong October 1, 1984. Iu bae enjoy for readim or readim moa datfala story, taem iu tingim tu hao bihaen, hem go ahed for nara fiftin year olsem faithful and loyal Christian.
Olsem wanfala anointed wan bilong Lord, witim full heart bilong hem Brata Klein wantem tumas for rul witim Christ long heven. Iumi garem evri reason for biliv hao distaem Jehovah fulfillim datwan.—Luke 22:28-30.
[Piksa long page 31]
Karl long 1943 witim T. J. Sullivan and Ted and Doris
[Piksa long page 31]
Karl and Margareta, October 2000