Bible Insaed Wanfala Volume

FOR mekem olketa copy bilong Bible, olketa Christian bifor nao main sekson wea iusim codex—wanfala buk, no wanfala scroll. Bat, olketa Christian no start stretawe for mekem wanfala volume wea garem evri buk bilong Bible. Long mek-six century, Flavius Cassiodorus hem startim wanfala important step for mekem staka long olketa wan-volume Bible.

Flavius Magnus Aurelius Cassiodorus hem born long samting olsem 485-490 C.E. long wanfala rich famili long Calabria, long barava end bilong south saed bilong Italy distaem. Hem stap long wanfala hardfala taem long history bilong Italy taem olketa Goth pipol tekovarem datfala land, then bihaen moa olketa Byzantine. Taem hem samting olsem 60 or 70 year, Cassiodorus startim Vivarium monastery and library klosap long hom bilong hem long Squillace, Calabria.

Wanfala Man wea Careful for Raetem Bible

Midolwan olketa main tingting bilong Cassiodorus hem for mekem pipol savve kasem Bible. Man for raetem history Peter Brown hem raet olsem: “Long tingting bilong Cassiodorus, evri buk long Latin mas givim man information abaotem olketa Scripture. Olketa mas iusim evri help wea olketa iusim bifor for studyim and copyim olketa old raeting mekem olketa savve minim olketa Scripture and for copyim olketa long gudfala wei. Olsem wanfala planet system wea just kamap, Latin kastom olsem wanfala sekson, shud spin raonem sun bilong Word bilong God.”

Cassiodorus hem hipimap pipol for transleit and olketa wea savve long languis long Vivarium monastery for kolektem full Bible and hem duim bigfala waka for go ahed raetem. Hem givim disfala waka long tu-thri man wea garem savve nomoa. Olketa mas stap klia from wei for kwiktaem changem eni raeting wea olketa tingse hem mistek bilong olketa wea copyim. Sapos olketa garem kwestin abaotem languis, olketa bae followim olketa firstfala Bible manuscript winim wei for acceptim wei for iusim Latin. Cassiodorus hem sei: “Mas keepim . . . , olketa languis wea olketa manuscript saportim, from no eni samting savve spoelem eni raeting wea kam from God. . . . Mas keepim gud olketa toktok bilong Bible, tokpiksa, and olketa word, nomata olketa barava difren from Latin, olsem tu witim olketa nem long ‘Hebraic’ languis wea olketa mas keepim.”—The Cambridge History of the Bible.

Datfala Codex Grandior

Olketa appointim olketa man for copy long Vivarium monastery for mekem thrifala separate edition bilong Bible long Latin. Wanfala long olketa hia, long naenfala volume, maet garem Old Latin raeting, wanfala transleison wea kamap long end bilong mek-tu century. Mek-tu edition garem Latin Vulgate, wea Jerome finisim klosap long start bilong mek-faev century. Mek-thri, datfala Codex Grandior, wea minim “bigfala codex,” olketa tekem from thrifala Bible raeting. Tufala lastfala edition hia putim tugeta evri buk bilong Bible insaed wanfala volume nomoa.

Luk olsem Cassiodorus nao hem first man for mekem Latin Bible insaed wanfala volume, wea hem kolem pandectae.a Iumi sure hem lukim wei wea hem gud for putim tugeta evri buk bilong Bible insaed wanfala volume nomoa, long datfala wei hem finisim wei for westem taem for lukluk insaed staka volume.

From South Italy go kasem British Isles

No longtaem bihaen Cassiodorus hem dae (maet long samting olsem 583 C.E.), longfala gogo bilong Codex Grandior hem start. Long datfala taem, olketa muvim go finis part bilong Vivarium library long Lateran library long Rome. Long 678 C.E., datfala Anglo-Saxon priest Ceolfrith tekem datfala codex witim hem go long British Isles taem hem go bak bihaen hem stap long Rome. So hem kam kasem tufala monastery bilong Wearmouth and Jarrow, wea Ceolfrith nao directim, wea distaem hem nao Northumbria, England.

Wan-volume Bible bilong Cassiodorus mas mekem Ceolfrith and olketa priest bilong hem sapraes, maet olketa laekem tumas wei wea hem isi for iusim. So, insaed tu-thri year nomoa, olketa wakem thrifala moa full Bible olsem wanfala volume. Only copy long olketa hia wea still stap hem wanfala bigfala manuscript wea olketa kolem Codex Amiatinus. Hem garem 2,060 page wea olketa wakem from skin bilong young buluka, each wan hem samting olsem 51 x 33 centimeter. Thick bilong disfala buk witim kava hem 25 centimeter and hevi bilong hem ovarem 34 kilogram. Hem barava oldfala full wan-volume Bible wea still stap. Important man long mek-19 century wea tinghae long Bible, Fenton J. A. Hort hem luksavve long datfala old buk long 1887. Hort hem sei olsem: “Nomata olketa wea lukim distaem, wei wea disfala [manuscript] hem nambawan mekem olketa garem bigfala respect.”

Go Bak long Italy

Datfala first Codex Grandior wea Cassiodorus hem appointim olketa for wakem hem lus finis. Bat Anglo-Saxon copy wea kamaot from hem, datfala Codex Amiatinus, hem start for kam bak long Italy kwiktaem bihaen hem finis. No longtaem bifor hem dae, Ceolfrith disaed for go bak long Rome. Hem tekem witim hem wanfala long thrifala Latin Bible manuscript bilong hem olsem wanfala present for Pope Gregory II. Ceolfrith hem dae long datfala gogo bilong hem, long 716 C.E., long Langres, France. Bat Bible bilong hem still gogo witim olketa man wea travel witim hem. Gogo hem stap insaed library bilong monastery bilong Mount Amiata, central Italy, ples wea hem tekem disfala nem Codex Amiatinus. Long 1782 olketa muvim go datfala manuscript long Medicean-Laurentian Library long Florence, Italy, wea hem still olsem wanfala riches bilong datfala library.

Hao nao disfala Codex Grandior affectim iumi? From taem bilong Cassiodorus, olketa man wea copy and print favorim olketa wan-volume Bible. Kam kasem taem bilong iumi, for garem Bible olsem mekem hem moa isi for pipol lukluk long hem and long datfala wei olketa kasem gud samting from paoa bilong hem long laef bilong olketa.—Hebrews 4:12.

[Footnote]

[Map long page 29]

Gogo bilong Codex Grandior

Vivarium monastery

Rome

Jarrow

Wearmouth

Gogo bilong datfala Codex Amiatinus

Jarrow

Wearmouth

Mt. Amiata

Florence

[Credit Line]

Mountain High Maps® Copyright © 1997 Digital Wisdom, Inc.

[Olketa Piksa long page 30]

Antap: Codex Amiatinus Left: Piksa bilong Ezra insaed Codex Amiatinus

[Credit Line]

Biblioteca Medicea Laurenziana, Firenze