Olketa Standard Change, Spoelem Trust
Long taem bilong King Henry I bilong England (1100-1135), long bilong wan yard hem “from nose bilong King go kasem end bilong hand bilong hem wea hem holem aot front long hem.” Waswe, disfala wei for measure bilong pipol bilong King Henry hem stret? Only wei for sure long diswan hem for visitim King.
WEI for measure distaem hem moa stret followim olketa standard. Olsem example, wan meter hem distance wea laet travel thru long wanfala vacuum (spes wea air taet) insaed wan second divaed bae 299,792,458. For barava stret, long bilong disfala laet hem semsem olowe and hem spesol kaen laet. Sapos pipol garem machine for chekim disfala standard, pipol evriwea bae kasem sem ansa.
Olketa change long olketa standard, nomata hao smol, savve kosim daot, and pipol waka hard for protectim olketa standard. Olsem example, long Britain standard for measurem hevi hem wanfala blok wea olketa wakem from platinum and iridium wea hevi bilong hem wan kilogram. Olketa keepim diswan long National Physical Laboratory. Air pollution from olketa trak and aeroplane mekem standard bilong kilogram kamap moa hevi evriday. Bat, disfala metal blok hem wanfala copy bilong world standard wea stap anda graon insaed thrifala samting wea sheip olsem glas botol long International Bureau of Weights and Measures long Sèvres, France. Bat nomata hevi bilong diswan tu hem change from olketa barava smol samting mekem hem dirty. Kasem distaem, olketa wea studyim metrology no faendem wanfala standard wea man fit for trustim evribit.
Nomata barava smol change luk olsem no important long pipol, wanfala change long standard savve barava konfiusim man. Long Britain, datfala change from imperial wei for measurem hevi bilong samting (pound and ounce) go long metric wei (kilogram and gram) hem mekem grow bigfala wei for no trust—and from gud reason tu. Samfala raverave stoakeeper mekius long wei wea pipol no savve gud long disfala niu wei for measure and ravem olketa customer.
Standard Saed Long Famili and Fasin
Waswe olketa change long standard saed long famili and fasin? Olketa change hia savve barava spoelem pipol. Olketa report distaem abaotem famili brekdaon, olabaot sex, and wei wea olketa spoelem staka pikinini, mekem staka barava feel nogud and strongim hao iumi stap long taem wea standard hem gogo daon. Olketa singol dadi or mami, olketa pikinini wea growap witim “parents” wea tufala evriwan man or woman, and barava rabis wei for spoelem pikinini saed long sex kamap from pipol tanawe from olketa stretfala standard. Moa and moa pipol kamap olketa wea “lovem seleva, . . . no garem love, . . . no lovem gudfala fasin, . . . lovem hapitaem winim wei for lovem God,” olsem Bible talem profesi abaotem tu thousand year bifor.—2 Timothy 3:1-4.
Wei wea standard saed long fasin hem gogo daon hem barava join witim wei for spoelem trust enihao nomoa. No longtaem go nomoa, wei for min for go difren from hae medical standard showaot klia long Hyde, wanfala taon long north England, wea “pipol respectim and trustim” famili doctor bilong olketa. Bat disfala trust bringim sorre bihaen. Long wanem wei? Olketa kot report showimaot wanfala doctor killim dae winim 15 long olketa woman wea go lukim hem. Tru nao, police mas lukluk moa long winim 130 nara dae wea join witim disfala doctor. Hao big nao disfala wei for spoelem trust hem showaot taem olketa luksavve hem guilty and panisim datfala doctor for go long prison. Tufala prison officer, wea disfala doctor maet killim dae mami bilong tufala, olketa changem waka mekem tufala no need for kea for disfala nogud prisoner. Dastawe wanfala report long disfala case insaed The Daily Telegraph niuspepa kolem guilty doctor hia “‘Devil’ doctor.”
Taem iu tingim olketa standard wea savve change and wea gogo daon long staka part long living, hu nao iu fit for trustim? Wea nao iu savve faendem olketa standard wea no savve change, wea kam from wanfala wea garem paoa for saportim olketa? Nextfala article bae ansarem olketa kwestin hia.