Report Bilong Olketa wea Talemaot Kingdom
Hem Satisfaem Olketa Spiritual Need Bilong Hem
CYPRUS hem wanfala island long northeast corner bilong Mediterranean Sea. Long taem bilong Bible, pipol savve long Cyprus from copper and nambawan timba bilong datfala ples. Paul and Barnabas talemaot gud nius bilong Kingdom long there insaed firstfala missionary gogo bilong tufala. (Acts 13:4-12) Distaem, gud nius still givim gud samting long laef bilong planti pipol long Cyprus. Diswan hem tru for Lucas, man wea winim 40 year finis. Hem sei olsem:
“Mi born long famili wea garem sevenfala pikinini, long wanfala farm bilong buluka. Taem mi pikinini, mi laekem tumas wei for read. Buk wea mi barava laekem nao hem Christian Greek Scripture poket-size Bible. Taem mi ten year, mi and samfala fren bilong mi startim smol Bible study grup. Bat hem no for longtaem bikos olketa olo long vilij kolem mifala olsem pipol for againstim teaching bilong church.
“Bihaen, taem mi go for skul long United States, mi meetim pipol from planti difren kaen religion. Datwan strongim moa feeling bilong mi for laekem olketa spiritual samting. Mi iusim planti day long university library for studyim olketa difren kaen religion. Mi visitim planti difren kaen church tu, bat nomata mi waka hard olsem, mi still no satisfae long spiritual wei.
“Bihaen mi finisim olketa study bilong mi, mi go bak long Cyprus and waka olsem director bilong wanfala medical laboratory. Wanfala olo man nem bilong hem Antonis, wea hem wanfala Jehovah’s Witness, savve visitim mi olowe long workples bilong mi. Bat, Greek Orthodox Church luksavve long olketa visit hia.
“Kwiktaem nomoa, wanfala savveman bilong religion hem kam long mi and talem mi for no tok long Olketa Jehovah’s Witness. From mi kasem teaching start long taem mi pikinini hao Greek Orthodox Church garem truth, mi obeyim hem and no story moa witim Antonis bat mi start for storyim Bible witim datfala savveman bilong religion. And mi visitim planti monastery long Cyprus tu. Mi gogo long north Greece and visitim Mount Athos, wea olketa tingse hem barava holy maunten long Orthodox Christian world. Nomata olsem, olketa kwestin bilong mi abaotem Bible no kasem ansa.
“Then mi prea long God for helpem mi for faendem truth. No longtaem bihaen datwan, Antonis kam for visitim mi moa long workples bilong mi, and mi tingim diswan nao hem ansa long prea bilong mi. So mi stop for visitim datfala savveman bilong religion and start for studyim Bible witim Antonis. Mi muv ahed gud, and long October 1997, mi showimaot dedication bilong mi long Jehovah taem mi baptaes long wata.
“Firstaem waef and tufala first pikinini bilong mi, wea age long datfala taem hem 14 and 10, barava againstim mi. Bat from gud fasin bilong mi, waef bilong mi disaed for attendim wanfala meeting long Kingdom Hall. Hem sapraes tumas long kaenfala fasin bilong olketa Witness and wei wea olketa showimaot interest long hem. Hem barava sapraes long wei wea olketa iusim Bible. Gogo, waef and tufala dota bilong mi acceptim Bible study witim Olketa Jehovah’s Witness. Tingim hapi bilong mi taem thrifala evriwan baptaes long “Profesi Toktok Bilong God” Distrik Convention long 1999!
“Yes, mi satisfae witim wei wea mi lukaotem truth. Distaem full famili bilong mifala, insaed diswan hem waef bilong mi and fofala pikinini, evriwan join insaed klinfala worship bilong Jehovah.”