“Sapos God Stap Witim Iumi, Hu Nao Bae Againstim Iumi?”
“Wanem nao bae iumi sei abaotem olketa samting hia? Sapos God hem stap witim iumi, hu nao bae againstim iumi?”—ROMANS 8:31.
1. Hu nao lusim Egypt witim olketa Israelite, and wanem nao leadim olketa for duim olsem?
TAEM olketa Israelite kamap free bihaen olketa stap for 215 year long Egypt, and big haf long datfala taem olsem prisoner, “wanfala big sekson bilong difren pipol go witim olketa.” (Exodus 12:38) Olketa hia wea no Israelite lukim tenfala trabol wea fit for mekem man fraet wea barava spoelem Egypt and mekem olketa giaman god long there for luk krangge. Long semtaem, olketa lukim—especially start long mek-foa trabol—wei wea Jehovah fit for protectim pipol bilong hem. (Exodus 8:23, 24) Nomata olketa no garem bigfala savve abaotem olketa purpose bilong Jehovah, olketa sure long wanfala samting: Olketa god bilong Egypt fail for protectim olketa bilong Egypt, bat Jehovah pruvim hem strong for saed bilong olketa Israelite.
2. Why nao Rahab saportim olketa Israelite spae, and why nao trust wea hem garem long God bilong olketa hem fitim?
2 Foti year bihaen, just bifor olketa Israelite go insaed long Promis land, man wea changem Moses, Joshua, sendem tufala man for spaem datfala ples. Long there olketa meetim Rahab, wanfala woman bilong Jericho. From samting wea hem herem abaotem olketa strongfala samting wea Jehovah duim for protectim olketa Israelite long 40 year from taem olketa lusim Egypt, hem savve hao sapos hem laekem blessing bilong God, hem mas saportim pipol bilong God. Bikos long wisefala disison bilong hem, Rahab and famili bilong hem no dae taem olketa Israelite kasholem datfala taon. Mirakol wei wea olketa sev hem barava strongfala pruv hao God hem stap witim olketa. Dastawe, trust wea Rahab garem long God bilong olketa Israelite hem fitim.—Joshua 2:1, 9-13; 6:15-17, 25.
3. (a) Wanem mirakol nao Jesus duim klosap long taon bilong Jericho wea olketa buildim moa, and wanem nao olketa Jew bigman duim taem olketa lukim diswan? (b) Wanem nao samfala Jew, and bihaen planti wea no Jew tu, start for luksavve?
3 Fiftin handred year bihaen, Jesus Christ healim wanfala blind man klosap long taon bilong Jericho wea olketa buildim moa. (Mark 10:46-52; Luke 18:35-43) Disfala man begim Jesus for showimaot mercy long hem, wea showimaot hem luksavve God nao saportim Jesus. Bat, olketa bigman bilong Jew religion and nara follower bilong olketa no laek for acceptim olketa mirakol wea Jesus duim olsem pruv hao hem duim waka bilong God. Bat olketa tok againstim hem. (Mark 2:15, 16; 3:1-6; Luke 7:31-35) Nomata olketa lukim hao Jesus hem resurrect bihaen olketa killim hem dae, olketa no willing for sei diswan hem kam from God. Bat, olketa lead for persecutim olketa follower bilong Jesus, and trae for stopem waka bilong olketa for “talemaot gud nius bilong Lord Jesus.” Bat samfala Jew, and bihaen planti wea no Jew, luksavve long olketa samting hia and tingting raonem olketa long stretfala wei. Hem klia hao God rejectim olketa Jew leader wea apim seleva and hem saportim olketa hambol follower bilong Jesus Christ.—Acts 11:19-21.
Hu Nao God Saportim Distaem?
4, 5. (a) Hao nao samfala pipol feel abaotem wei for chusim religion? (b) Taem man laek luksavve long tru religion, wanem nao barava important kwestin?
4 Long kwestin abaotem tru religion, wanfala bigman bilong religion talem long wanfala TV interview no longtaem go nomoa: “Long tingting bilong mi, wanfala religion hem tru sapos hem mekem man kamap moabeta taem hem garem living followim datwan.” Hem tru, trufala religion mekem pipol kamap moabeta. Bat waswe, wei wea wanfala religion hem mekem pipol kamap moabeta hem nomoa samting wea pruvim hao God saportim datfala religion? Datwan nao main mark for luksavve sapos wanfala religion hem tru?
5 Evriwan tinghae long wei iumi man free for chusim samting seleva, insaed diswan hem religion bilong iumi. Bat wei wea man garem freedom for chus no minim datfala man bae chusim stret wan. Olsem example, samfala pipol chusim religion bikos long haomas pipol insaed, riches, enikaen ceremony, or bikos long famili. No eni samting hia mark wea showimaot sapos wanfala religion hem tru wan or nomoa. Important kwestin long diswan hem: Wanem religion nao encouragem olketa follower bilong hem for duim will bilong God and givim strongfala pruv bilong wei wea God saportim, mekem olketa wea insaed savve sei olsem witim strong, “God hem stap witim mifala”?
6. Wanem toktok bilong Jesus nao showimaot klia tru and giaman religion?
6 Jesus talem rul for luksavve long tru worship and giaman worship taem hem sei: “Lukaot long olketa giaman profet wea werem skin bilong sheep, bat long insaed olketa olsem wolf wea hangre fogud. From frut bilong olketa iufala bae luksavve long olketa.” (Matthew 7:15, 16; Malachi 3:18) Letem iumi reviewim samfala “frut,” or mark for luksavve long trufala religion, mekem iumi savve barava disaedem hu long distaem nao God saportim.
Olketa Mark for Luksavve Long Sekson wea God Saportim
7. Wanem nao hem minim for teachim nomoa samting wea stap insaed long Bible?
7 Teaching bilong olketa kam from Bible. Jesus sei: “Wanem mi teachim hem no bilong mi, bat bilong hem wea sendem mi kam. Sapos eniwan want for duim will bilong Hem, hem bae savve sapos disfala teaching hem from God or mi talem samting from tingting bilong miseleva nomoa.” And tu: “Man wea kam from God hem lisin long olketa toktok bilong God.” (John 7:16, 17; 8:47) So, for God saportim hem, man mas teachim samting wea stap insaed Word bilong hem nomoa and rejectim olketa teaching wea kam from wisdom or kastom bilong man.—Isaiah 29:13; Matthew 15:3-9; Colossians 2:8.
8. Why nao hem important for iusim nem bilong God long worship?
8 Olketa iusim and talemaot nem bilong God, Jehovah. Isaiah talem profesi: “Long datfala day iufala bae barava sei: ‘Givim thankiu long Jehovah, iufala pipol! Singaot long nem bilong hem. Talemaot long pipol olketa waka bilong hem. Talem hao nem bilong hem nao stap hae. Singsing long Jehovah, from hem duim nambawan samting. Full earth nao hem savve long diswan.’” (Isaiah 12:4, 5) Jesus lanem olketa follower bilong hem for prea olsem: “Dadi bilong mifala wea stap long heven, letem nem bilong iu kamap holy.” (Matthew 6:9) So, nomata olketa Jew or no Jew, olketa Christian mas serve olsem “wanfala pipol for nem bilong [God].” (Acts 15:14) God hem hapi for saportim olketa wea praod for kamap “wanfala pipol for nem bilong hem.”
9. (a) Why nao hapi hem fasin bilong olketa member bilong tru religion? (b) Hao nao Isaiah hem markem tru religion witim giaman wan?
9 Olketa showimaot fasin bilong God for hapi. Olsem man wea talem “gud nius,” Jehovah hem “hapi God.” (1 Timothy 1:11) So olketa worshiper bilong hem shud hapi and evritaem tingim gud saed. Nomata trabol long world and olketa problem bilong seleva, olketa tru Christian keepim hapi spirit bikos olketa evritaem kaikaim staka spiritual kaikai. Isaiah markem olketa witim pipol wea followim giaman religion: “Diswan nao samting wea Sovereign Lord Jehovah hem talem: “Lukim! Olketa servant bilong mi bae kaikai, bat iufala bae hangre. Lukim! Olketa servant bilong mi bae drink, bat iufala bae thirsty. Lukim! Olketa servant bilong mi bae hapi, bat iufala bae shame. Lukim! Olketa servant bilong mi bae singaot from hapi bikos olketa feel gud long heart, bat iufala bae singaot from pain long heart and iufala bae krae bigfala from spirit bilong iufala hem brekdaon.’”—Isaiah 65:13, 14.
10. Hao nao olketa wea garem tru religion savve missim wei for lane from olketa mistek?
10 Fasin and olketa disison bilong olketa hem garem faondeson long olketa Bible principle. “Trust long Jehovah witim full heart bilong iu and no depend long savve bilong iuseleva,” man wea raetem Proverbs hem talem iumi, “long evri wei bilong iu, lisin long hem, and hemseleva nao bae stretem gogo bilong iu.” (Proverbs 3:5, 6) God saportim olketa wea luk long hem for leadim olketa and no trustim olketa difren idea bilong man wea no laekem wisdom bilong God. For man missim wei for lane from mistek bilong hem bae depend long haomas hem willing for followim Word bilong God long living.—Psalm 119:33; 1 Corinthians 1:19-21.
11. (a) Why nao olketa member bilong tru religion no divaed long wanfala sekson bilong olketa bigman and sekson wea stap anda? (b) Wanem example nao olketa wea lead midolwan long pipol bilong God showimaot for olketa sheep?
11 Olketa organize followim Christian kongregeson long first century. Jesus talemaot disfala principle: “No letem eniwan kolem iufala Rabbi, from wanfala nomoa hem teacher bilong iufala, bat iufala evriwan olketa brata. And tu, no kolem eniwan father bilong iufala long earth, from wanfala nomoa hem Father bilong iufala, Datwan long heven. And olketa mas no kolem iufala ‘leader,’ from Leader bilong iufala hem wanfala, hem nao Christ. Bat man wea nambawan midolwan long iufala mas kamap servant bilong iufala.” (Matthew 23:8-11) Wanfala kongregeson bilong olketa brata no garem wanfala praodfala sekson bilong olketa bigman wea garem bignem and apim olketa seleva winim sekson wea stap anda long olketa. (Job 32:21, 22) Olketa wea shepherdim sheep bilong God kasem komand for duim olsem “no from eniwan forcem iufala, bat long willing wei; no from love for kasem selen, bat from iufala barava want for duim; no olsem iufala kamap bigman ovarem samting bilong God, bat kamap example long olketa sheep.” (1 Peter 5:2, 3) Olketa trufala Christian shepherd hol bak from wei for mekem olketa seleva bigman ovarem faith bilong nara pipol. Olsem olketa wea waka tugeta insaed service bilong God, olketa trae hard for showimaot gudfala example.—2 Corinthians 1:24.
12. Wanem balance tingting abaotem olketa gavman bilong man nao God askem from olketa wea laekem hem for saportim olketa?
12 Olketa stap anda long gavman bilong man bat olketa no teksaed. Man wea fail for “stap anda long olketa hae paoa” kanduit expectim saport bilong God. Why nao olsem? Bikos “olketa paoa bilong distaem stap long ples wea God letem olketa for stap. So man wea againstim disfala paoa hem againstim datfala arrangement bilong God.” (Romans 13:1, 2) Nomata olsem, Jesus luksavve hao samting wea God and Caesar askem maet nating savve agree taem hem sei: “Peim bak olketa samting bilong Caesar long Caesar, bat olketa samting bilong God long God.” (Mark 12:17) Olketa wea laekem God for saportim olketa mas “go ahed for lukaotem firstaem kingdom bilong [God] and raeteous fasin bilong hem,” and long semtaem obeyim evri law bilong kantri wea fitim olketa responsibility wea olketa garem long God. (Matthew 6:33; Acts 5:29) Jesus mekhae long wei for no teksaed taem hem sei olsem abaotem olketa disaepol bilong hem: “Olketa no part bilong world, olsem mi tu no part bilong world.” Bihaen hem sei moa: “Kingdom bilong mi hem no part bilong disfala world.”—John 17:16; 18:36.
13. Wanem part nao love garem for luksavve long pipol bilong God?
13 Olketa no teksaed taem olketa duim “samting wea gud long evriwan.” (Galatians 6:10) Christian love hem no favorim eniwan, hem acceptim evri pipol nomata wanem color skin, living saed long selen and education, nation, or languis. Wei for duim samting wea gud long evriwan and especially long olketa wea garem sem faith hem help for markem olketa wea God saportim. Jesus sei: “From diswan evriwan bae savve iufala nao olketa disaepol bilong mi, sapos iufala garem love midolwan long iufala seleva.”—John 13:35; Acts 10:34, 35.
14. Waswe, pipol evritaem acceptim pipol wea God appruvim? Minim diswan.
14 Olketa willing for kasem persecution taem olketa duim will bilong God. Jesus givim disfala warning long olketa follower bilong hem: “Sapos olketa persecutim mi, bae olketa persecutim iufala tu; sapos olketa followim toktok bilong mi, bae olketa followim toktok bilong iufala tu.” (John 15:20; Matthew 5:11, 12; 2 Timothy 3:12) Pipol evritaem no laekem olketa wea God saportim, olsem Noah, wea hem judgem world thru long faith bilong hem. (Hebrews 11:7) Distaem, olketa wea God saportim barava no willing for changem mining bilong word bilong God or lusim olketa principle bilong God for olketa missim persecution. Taem olketa go ahed faithful for servem God, olketa savve pipol bae “konfius and go ahed for tok nogud” abaotem olketa.—1 Peter 2:12; 3:16; 4:4.
Taem for Lukluk Gud Long Olketa Tru Samting
15, 16. (a) Wanem nao olketa kwestin wea bae helpem iumi for luksavve long religion wea God saportim? (b) Wanem nao planti million pipol luksavve long hem, and why nao olsem?
15 Askem iuseleva, ‘Wanem religion nao barava followim gud Word bilong God, nomata olketa teaching bilong hem difren from biliv bilong planti pipol? Hu nao mekhae long wei wea nem bilong God hem important, and iusim tu for kolem long olketa seleva? Hu nao point go long Kingdom bilong God olsem only ansa for evri problem bilong olketa man? Hu nao keepim olketa mark bilong Bible saed long fasin, nomata pipol ting diswan hem wei bilong bifor? Wanem grup nao no garem wanfala sekson bilong bigman wea olketa peim, bat evri member bilong hem olketa preach? Hu nao kasem praise olsem pipol wea obeyim law bilong kantri, nomata olketa no joinim politik? Hu nao showim love long wei for iusim taem and selen for helpem olketa narawan for lane abaotem God and olketa purpose bilong hem? And nomata evri gud samting hia, hu nao pipol still lukdaonem, tokspoelem, and persecutim?’
16 Planti million pipol long world lukluk gud long olketa tru samting hia and biliv Olketa Jehovah’s Witness nomoa followim tru religion. Olketa garem disfala tingting bikos long samting wea Olketa Jehovah’s Witness teachim and fasin bilong olketa, and tu olketa gudfala samting wea olketa kasem from olketa followim datfala religion. (Isaiah 48:17) Planti million pipol go ahed for talem toktok bilong Zechariah 8:23: “Mifala bae go witim iufala pipol, from mifala herem finis hao God hem stap witim iufala pipol.”
17. Why nao hem no praod fasin taem Olketa Jehovah’s Witness sei olketa nao garem trufala religion?
17 Waswe, hem praod fasin taem Olketa Jehovah’s Witness sei olketa seleva nomoa God hem saportim? For tok stret, diswan hem semsem nomoa olsem taem olketa Israelite long Egypt sei God saportim olketa nomata wanem kaen samting nao olketa bilong Egypt tingim, or taem olketa Christian long first century sei God saportim olketa and no olketa bilong Jew religion. Olketa tru samting nao pruvim hao God saportim olketa. Insaed 235 kantri Olketa Jehovah’s Witness duim waka wea Jesus sei olketa trufala follower bilong hem bae duim long taem bilong end: “Olketa bae talemaot disfala gud nius bilong kingdom evriwea long earth for givim witness long evri nation; and then end bae kam.”—Matthew 24:14.
18, 19. (a) Why nao no eni reason stap for Olketa Jehovah’s Witness stop for duim preaching waka, nomata pipol againstim olketa? (b) Hao nao Psalm 41:11 showimaot God saportim olketa Witness?
18 Olketa Jehovah’s Witness bae go ahed for fulfillim disfala komand, nating letem persecution or wei for againstim olketa for spoelem waka bilong olketa. Olketa mas duim and bae duim waka bilong Jehovah. Evri samting wea nara pipol duim insaed wan handred year wea go finis for stopem olketa Witness for no duim waka bilong God hem fail, bikos Jehovah promis olsem finis: “Eni samting for faet againstim iu bae no win, and eni toktok wea bae kam againstim iu long datfala judgment bae iu daonem. Diswan hem samting wea olketa servant bilong Jehovah bae garem, and raeteous fasin bilong olketa hem kam from mi.”—Isaiah 54:17.
19 Wei wea Olketa Jehovah’s Witness moa strong and waka moa hard distaem winim bifor—and duim diswan nomata pipol againstim olketa evriwea long earth—hem pruvim Jehovah appruvim samting wea olketa duim. King David sei olsem: “Thru long diswan mi savve iu hapi long mi, bikos olketa enemy bilong mi no shout from olketa win ovarem mi.” (Psalm 41:11; 56:9, 11) Olketa enemy bilong God bae no singaot moa from olketa win ovarem pipol bilong Jehovah, bikos Leader bilong olketa, Jesus Christ, hem muv go for win evribit!
Waswe, Iu Savve Ansa?
• Wanem nao samfala example bilong bifor long pipol wea God saportim?
• Wanem nao samfala mark wea showimaot trufala religion?
• Why nao iu barava sure God saportim Olketa Jehovah’s Witness?
[Piksa long page 13]
Olketa wea laekem God for saportim olketa mas garem teaching wea followim Word bilong hem nomoa
[Piksa long page 15]
Olketa Christian elder serve olsem example long olketa sheep