Kwestin From Reader
Why nao New World Translation long 2 Peter 3:13 story abaotem “olketa niu heven [winim wanfala] and wanfala niu earth,” bat Revelation 21:1 talem profesi abaotem “wanfala niu heven [wanfala nomoa] and wanfala niu earth”?
Diswan hem samting saed long toktok bilong first languis. Luk olsem diswan no savve changem mining.
Tingim firstaem olketa Hebrew Scripture. Long firstfala-languis text, datfala Hebrew word sha·maʹyim, wea olketa transleitim “(olketa) heven,” hem evritaem olketa heven. Luk olsem taem olketa sei olketa heven, diswan showimaot, no wei wea hem staka, bat wei wea hem big tumas, or wei wea hem garem olketa separate part. Datwan hem fitim bikos olketa physical heven barava go farawe tumas from earth and garem staka billion star insaed. Taem sha·maʹyim garem word datfala front long hem, klosap evritaem New World Translation hem transleitim olsem “olketa heven,” olsem long Isaiah 66:22. Taem sha·maʹyim no garem word datfala front long hem, olketa savve transleitim olsem wanfala (“heven,” olsem long Genesis 1:8; 14:19, 22; Psalm 69:34) or winim wanfala (“olketa heven,” olsem long Genesis 49:25; Judges 5:4; Job 9:8; Isaiah 65:17).
Long Isaiah 65:17 and 66:22, datfala Hebrew word for olketa heven hem olsem winim wanfala, and olketa transleitim evritaem olsem “olketa niu heven and wanfala [or, datfala] niu earth.”
Datfala Greek word ou·ra·nosʹ hem minim “heven,” and ou·ra·noiʹ hem minim “olketa heven.” Interesting samting hem olketa wea transleitim Greek Septuagint iusim wanfala heven long Isaiah 65:17 and 66:22.
Waswe long disfala toktok “niu heven [or olketa heven] and wanfala niu earth” wea kamap tufala taem insaed olketa Christian Greek Scripture?
Long 2 Peter 3:13, datfala aposol iusim Greek word olketa heven. Bifor, olketa verse hia (7, 10, 12), hem story abaotem olketa wicked “heven” bilong datfala taem, and hem iusim olketa heven. So hem duim sem samting taem hem iusim word olketa long verse 13. And tu, luk olsem hem talem moa firstfala toktok bilong Isaiah 65:17, wea long Hebrew hem iusim word olketa, sem olsem long 2 Peter 2:22 hem talem toktok from Hebrew text long Proverbs 26:11. So Peter hem point go long “olketa niu heven and wanfala niu earth wea iumi weitim olsem hem promisim.”
Long wei wea lelebet difren, long Revelation 21:1, luk olsem aposol John hem iusim toktok bilong Isaiah 65:17 olsem olketa transleitim long Septuagint, wea, olsem iumi lukim, hem garem datfala Greek word for “heven” wea minim wanfala. So, samting wea John raetem hem: “Mi lukim wanfala niu heven and wanfala niu earth; bikos heven bilong bifor and earth bilong bifor hem finis nao.”
Diswan hem saed long wei for talem toktok wea join witim wei for transleitim samting. Hem fitim for talem moa hao no eni difren mining stap nomata man readim, or talem olsem “olketa niu heven” or “niu heven.” Mining bilong tufala evriwan hem semsem nomoa.
[Piksa Credit Line long page 31]
Stars: Frank Zullo