Needim Help for Minim Bible
BIBLE hem wanfala spesol buk. Olketa man wea raetem sei God nao muvim olketa, and olketa toktok wea stap insaed givim planti pruv hao samting wea olketa talem hem tru. (2 Timothy 3:16) Midolwan olketa nara samting, Bible showimaot wea nao iumi kam from, why nao iumi long hia, and wanem nao future bilong iumi. Iumi sure hem wanfala buk wea fitim for iumi luk insaed!
Maet iu traem finis for readim Bible bat iu faendem hard for minim. Maet iu no savve wea nao for lukluk for faendem ansa for olketa kwestin bilong iu. Sapos olsem, no iuseleva nomoa olsem. Iu olsem wanfala man wea stap long first century. Hem gogo insaed wanfala chariot, from Jerusalem go long hom kantri bilong hem, Ethiopia. Disfala bigman bilong Ethiopia hem read laod from Bible buk bilong Isaiah, wea olketa raetem winim seven handred year bifor.
Seknomoa, wanfala man wea ran klosap long chariot hem sei hello long hem. Disfala man hem Philip, wanfala disaepol bilong Jesus, and hem askem datfala man from Ethiopia: “Waswe, iu minim samting wea iu readim?” Datfala man ansa olsem: “For tok stret, hao nao mi savve duim olsem, sapos no eniwan leadim mi?” So hem invaetem Philip for kam insaed datfala chariot. Philip explainim mining bilong datfala part wea man hia bin readim and hem go ahed for talem hem “gud nius abaotem Jesus.”—Acts 8:30-35.
Long sem wei olsem Philip helpem datfala man from Ethiopia for minim Word bilong God longtaem bifor, Olketa Jehovah’s Witness helpem pipol for minim Bible distaem. Olketa bae hapi for helpem iu tu. Klosap evritaem, hem gud for studyim Bible followim order, start long olketa main teaching bilong Bible. (Hebrews 6:1) Taem iu go ahed, iu bae fit for kasem samting wea aposol Paul kolem “strongfala kaikai”—hem nao, truth wea moa deep. (Hebrews 5:14) Nomata Bible nao iu studyim, olketa nara buk—olketa buk for helpem Bible study—savve helpem iu for faendem and minim part long Bible abaotem olketa difren kaen subject.
Klosap evritaem olketa savve arrangem wanfala study long taem and ples wea fitim iu. Samfala iusim telephone tu for study. Olketa no duim disfala study olsem long classrum; hem wanfala private arrangement wea olketa mekem for fitim iu, and living and education wea iu garem. Iu no need for pei for Bible study olsem. (Matthew 10:8) No eni exam, and iu bae no feel shame. Iu bae kasem ansa for olketa kwestin bilong iu, and iu bae lane hao for kam klosap long God. Bat why nao iu mas studyim Bible? Tingim samfala reason why wei for studyim Bible savve mekem moa hapi kamap long laef bilong iu.