Why Studyim Bible?
BILL hem young, man bilong sport, hem skul gud, and garem staka selen. Nomata olsem, hem no hapi. Laef bilong hem no garem purpose, and diswan mekem hem wari tumas. From hem trae for faendem purpose long laef, hem lukluk gud long olketa difren kaen religion, bat hem nating faendem samting wea hem lukluk for hem. Long 1991 hem meetim wanfala Jehovah’s Witness wea givim hem wanfala buk wea storyim wanem nao Bible talem abaotem mining bilong laef. Olketa arrangem wanfala Bible study mekem Bill savve lukluk long disfala subject and olketa nara subject moa.
Bill hem sei: “Mifala duim firstfala study, and bikos mifala luk long Bible evritaem, mi savve hao diswan nao hem samting wea mi bin lukaotem. Olketa ansa insaed Bible hem barava spesol. Bihaen datfala study, mi draev go ap long maunten, go aot from trak bilong mi, and singaot laod witim bigfala hapi. Mi hapi tumas from mi faendem ansa for olketa kwestin bilong mi.”
Tru, no evriwan wea faendem Bible truth singaot witim hapi long really wei. Nomata olsem, wei for faendem ansa for olketa important kwestin bilong laef hem wanfala barava hapi experience for planti pipol. Olketa feel olsem datfala man long tokpiksa bilong Jesus wea faendem wanfala treasure wea olketa haedem long wanfala field. Jesus hem sei: “From hem hapi tumas hem go and sellim evri samting wea hem garem and baem datfala field.”—Matthew 13:44.
Key for Laef wea Garem Mining
Bill ting raonem wanfala important kwestin, Wanem nao purpose bilong laef? Olketa savveman, savveman bilong religion, and scientist barava trae hard for faendem ansa for datfala kwestin for planti thousand year finis. Olketa man wanwan raetem finis staka buk for trae ansarem diswan. Hard waka bilong olketa hem iusles nomoa, and gogo planti sei no eniwan savve ansarem datfala kwestin. Bat, ansa hem stap. Nomata datfala ansa hem deep, hem no hard tumas. Bible nao explainim. Key for wanfala hapi laef, wea garem mining hem: Iumi mas garem stretfala wei for fren witim Jehovah, Creator and Father bilong iumi long heven. Hao nao iumi savve kasem datwan?
Tufala wei stap for kam klosap long God, wea luk olsem tufala againstim each other. Olketa wea kam klosap long God fraet long hem and lovem hem. Letem iumi ting raonem tufala scripture wea saportim datfala toktok. Longtaem bifor, wise King Solomon study abaotem olketa man long careful wei and raetem wanem hem lanem insaed long Bible buk bilong Ecclesiastes. For talem moa olketa samting wea hem lanem, hem raet olsem: “Main point bilong diswan, from iumi herem finis evri samting, hem: Fraet long trufala God and obeyim olketa komandment bilong hem. From diswan nao full responsibility bilong man.” (Ecclesiastes 12:13) Planti handred year bihaen, taem olketa askem hem wanem nao barava bigfala komandment long Law wea God givim long Moses, Jesus ansa olsem: “Iu mas lovem Jehovah God bilong iu witim full heart bilong iu and witim full soul bilong iu and witim full mind bilong iu.” (Matthew 22:37) Waswe, diswan hem here stret long iu hao iumi shud fraet long God and lovem hem long semtaem? Letem iumi lukluk gud long wei wea fraet and love hem important and hao tufala waka tugeta for helpem man fren witim God.
Mining Bilong Wei for Fraet Long God
Wei for fraet wea showimaot respect hem barava important for iumi worshipim God long wei wea hem acceptim. Bible hem sei: “Wei for fraet long Jehovah hem start bilong wisdom.” (Psalm 111:10) Aposol Paul hem raet olsem: “Letem iumi go ahed for garem kaeness wea man no fit for kasem, wea thru long diswan iumi savve givim holy service wea God acceptim witim fasin for fraet long hem and respect.” (Hebrews 12:28) Long sem wei, wanfala angel long midol heven wea aposol John lukim long vision hem startim toktok bilong hem for talemaot gud nius, olsem: “Fraet long God and givim hem glory.”—Revelation 14:6, 7.
Disfala wei for fraet long God, wea important tumas for laef wea garem mining, hem no semsem witim nogud wei for fraet. Iumi maet fraet tumas sapos wanfala raf criminal sei for spoelem iumi. Bat wei for fraet long God hem wei for showimaot bigfala respect long Creator. Hem minim tu stretfala wei for fraet for mekem God no hapi from hem nao Bigfala Judge and Olmaeti, wea garem strong and paoa for panisim olketa wea no obey.
Fraet and Love Waka Tugeta
Nomata olsem, Jehovah no wantem pipol for servem hem from olketa fraetem hem nomoa. Jehovah hem barava wanfala God bilong love. Holy spirit muvim aposol John for raet olsem: “God hem love.” (1 John 4:8) Jehovah God hem deal long barava loving wei witim olketa man, and hem wantem pipol for lovem hem tu. Bat hao nao kaen love olsem savve waka tugeta witim wei for fraet long God? Tufala barava join tugeta. Man wea raetem psalm hem sei: “Klos wei for fren witim Jehovah hem bilong olketa wea fraet long hem.”—Psalm 25:14.
Tingim feeling bilong respect wea pikinini garem for wanfala strong and wisefala dadi. Long semtaem, pikinini hia bae feelim love bilong dadi. Pikinini hia bae trustim dadi and luk long hem for direction, and hem trustim hao hem bae kasem gud samting from disfala direction. Long sem wei, sapos iumi lovem and fraet long Jehovah, iumi bae obeyim direction bilong hem, and diswan bae helpem iumi. Lukim samting wea Jehovah talem abaotem olketa Israelite: “Sapos olketa mekem grow insaed long heart bilong olketa wei for fraet long mi and for keepim evri komandment bilong mi evritaem, mekem olketa and olketa son bilong olketa savve kasem gudfala samting for olowe!”—Deuteronomy 5:29.
Tru nao, wei for fraet long God lead go, no long wei for olsem prisoner bat long freedom, no long sorre bat long hapi. Isaiah talem profesi abaotem Jesus: “Hem bae hapi from hem fraet long Jehovah.” (Isaiah 11:3) And man wea raetem psalm hem sei: “Hapi nao man wea fraet long Jehovah, wea hapi tumas long komandment bilong hem.”—Psalm 112:1.
Hem klia, iumi no savve fraet long God or lovem hem sapos iumi no savve long hem. Dastawe wei for studyim Bible hem barava important. Study olsem helpem iumi for minim olketa fasin bilong God and for tinghae long wei wea hem wise for followim direction bilong hem. Taem iumi kam klosap long God, iumi want for duim will bilong hem and diswan muvim iumi for keepim olketa komandment bilong hem, from iumi savve olketa bae helpem iumi.—1 John 5:3.
Hem hapi samting for savve iumi followim stretfala wei long laef. Diswan hem tru long Bill, wea iumi story abaotem firstaem. Hem sei olsem no longtaem go nomoa: “Insaed naenfala year wea go pas start from firstaem wea mi studyim Bible, wei wea mi fren witim Jehovah hem grow. Bigfala hapi wea mi feelim firstaem hem grow for kamap trufala hapi wei long laef. Mi garem nambawan samting for luk for hem long laef. Olketa day bilong mi hem fulap witim nambawan waka, no witim iusles wei for aftarem hapi. Jehovah kamap wanfala really person long mi, and mi savve hao hem interest long wanem nao hem best samting long living bilong mi.”
Long nextfala article, iumi bae ting raonem hao savve bilong Jehovah hem givim kam hapi and gud samting long olketa wea followim insaed living bilong olketa.
[Blurb long page 5]
Wei for kam klosap long god minim iumi lovem hem and fraet long hem
[Piksa long page 6]
Jesus hem hapi from hem fraet long Jehovah