Hem “Go Ahed Strong Kasem End”
LONG wanfala video wea olketa wakem long 1993 for showim long olketa niu member bilong headquarters bilong Olketa Jehovah’s Witness, Lyman Alexander Swingle talemaot feeling bilong hem for service bilong Jehovah: “Dae taem iu werem olketa boot bilong iu!”a
Brata Swingle wea kasem naenti year hem barava duim samting wea hem encouragem nara pipol for duim. Hem “go ahed strong kasem end.” (Matthew 24:13) Nomata hem garem pain long body, long Wednesday, March 7, hem attendim wanfala meeting bilong Governing Body bilong Olketa Jehovah’s Witness from hem wanfala member. Tuesday bihaen datwan, hem kamap moa worse, and long 4:26 a.m., March 14, doctor talemaot hao hem dae nao.
Lyman Swingle start for serve long world headquarters bilong Olketa Jehovah’s Witness long Brooklyn, New York, long April 5, 1930. Hem serve long there for klosap 71 year. First assignment bilong Lyman hem long ples for wakem olketa buk, then long ples for print, and hem help tu for wakem ink. Brata Swingle waka for samting olsem 25 year long ink rum. Hem serve tu for 20 year olsem member bilong raeting department long headquarters. For lastfala 17 year long laef bilong hem, hem waka long Office Bilong Treasurer.
Lyman hem wanfala strong pablisa bilong Kingdom bilong God. Long olketa firstfala year bilong hem long Brooklyn, hem witim brata wea sharem rum bilong hem, Arthur Worsley, tekem wanfala sailing boat bilong olketa Witness go long Hudson River. Planti weekend tufala iusim saond system for talemaot Kingdom message long olketa community wea stap saed long datfala river.
Brata Swingle hem born long November 6, 1910, long Lincoln, Nebraska, bat no longtaem bihaen famili bilong hem muv go long Salt Lake City, Utah. There, long 1913, parents bilong hem kamap Olketa Bible Student, diswan nao nem bilong Olketa Jehovah’s Witness long datfala taem. Long olketa year wea go pas, famili bilong Swingle welkamim planti visiting speaker from headquarters bilong Olketa Witness long Brooklyn, and olketa man hia barava encouragem Lyman. Long 1923, taem hem 12 year, hem baptaes for showimaot dedication bilong hem long God.
Bihaen hem serve for winim 26 year long Brooklyn olsem singol man, laef bilong Lyman hem kamap moabeta long bigfala wei taem hem maritim Crystal Zircher long June 8, 1956. Tufala barava klos, and evritaem share tugeta long ministry go kasem taem Crystal hem dae long 1998. Samting olsem thrifala year bifor, Crystal kasem wanfala stroke wea mekem hem disable. Wei wea Lyman evriday lukaftarem hem, hem showimaot loyal fasin wea muvim evriwan wea savve long tufala, especially olketa wea lukim Lyman showimaot love taem hem pushim wheelchair bilong Crystal mekem hem savve offerim Wastaoa and Wekap! long street.
Brata Swingle hem man for tok stret bat hem kaen and evriwan wea savve gud long hem laekem hem tumas. Olsem dadi and mami bilong hem, hem tu garem hope from Bible for laef witim Jesus Christ long datfala Kingdom long heven, wanfala hope wea mifala sure hem kasem distaem.—1 Thessalonians 4:15-18; Revelation 14:13.
[Footnote]
a Mining hia hem for dae taem iu busy yet long waka.
[Piksa long page 31]
Brata Swingle serve for samting olsem 25 year long ink rum
[Piksa long page 31]
Lyman and Crystal barava klos