Kwestin From Reader

Long 1 Peter 4:3, iumi readim hao samfala Christian wantaem share insaed “wei for worshipim olketa idol wea againstim law.” Waswe, no evri wei for worshipim olketa idol hem againstim law, wea God tok strong againstim and stopem?

Yes, long tingting bilong God, evri wei for worshipim idol hem againstim law. Olketa wea laekem God for hapi long olketa no savve worshipim idol.—1 Corinthians 5:11; Revelation 21:8.

Bat luk olsem aposol Peter hem tingim difren wei for worshipim idol. Bikos, midolwan planti nation bifor, wei for worshipim idol hem big tumas and gavman no stopem. Hem minim, law bilong datfala ples no tambuim wei for worshipim idol olsem. Nomata samfala wei for worshipim idol tu hem part bilong plan bilong gavman. Long datfala wei, samfala share insaed ‘wei for worshipim idol wea law no tambuim’ bifor olketa kamap Christian. (New World Translation, 1950 edition) Olsem example, iumi lukim hao King Nebuchadnezzar bilong Babylon standimap wanfala idol image bilong gold, bat olketa servant bilong Jehovah Shadrach, Meshach, and Abednego nating willing for worshipim datwan.—Daniel 3:1-12.

Followim narafala tingting, planti wei for worshipim olketa idol hem ova tumas and no fitim law or stretfala tingting wea kamaot from conscience wea man born kam witim. (Romans 2:14, 15) Aposol Paul hem raet abaotem olketa nogud wei wea olketa duim “wea no fitim” and “barava dirty fasin,” and planti taem diswan kamap insaed olketa religion. (Romans 1:26, 27) Olketa man and woman wea share insaed wei for worshipim idol wea againstim law no followim samting wea conscience shud stopem olketa for duim. Hem barava fitim for olketa wea kamap Christian for lusim olketa nogud wei olsem.

For join witim olketa samting hia, wei for worshipim idol olsem wea kamap evritaem midolwan olketa wea no Jew hem samting wea Jehovah God tok strong againstim. So olketa againstim law.a—Colossians 3:5-7.

[Footnote]