Report Bilong Olketa wea Talemaot Kingdom

God Aotem Wata Long Eye Bilong Hem

PIPOL wea changem laef bilong olketa for fitim olketa law and principle bilong Jehovah kasem bigfala blessing. Nomata hem no isi evritaem for mekem olketa important change, help and encouragement hem stap. (Psalm 84:11) Experience hia from Southeast Asia hem showimaot diswan.

Taem hem long holiday wanfala Witness woman from France story long Kim,a wanfala woman wea ownim stoa, abaotem purpose bilong Jehovah for disfala earth. Hem givim tu wanfala copy bilong disfala buk You Savvy Stop All-the-way long Paradise long Earth. Taem hem lukluk insaed long datfala buk Kim readim olketa toktok hia, “hem bae aotem evri wata from eye bilong olketa.” (Revelation. 21:4) “Disfala verse hem barava muvim mi,” Kim hem sei. “Taem pipol lukim mi smile and story long stoa full day, no eniwan savve hao taem mi kasem haos long evening mi savve krae gogo mi sleep.” Taem hem talemaot why nao hem sorre, hem sei: “Mi bin stap witim wanfala man for 18 year bat mi barava no hapi from hem les for maritim mi. Mi laek for lusim kaen living olsem, bat from mi stap witim hem for longtaem finis, mi no strong for duim datwan.”

No longtaem bihaen, Kim acceptim wanfala Bible study witim wanfala Jehovah’s Witness wea nem bilong hem Linh. “Mi barava want for go ahed for duim samting wea Bible teachim,” Kim hem sei. “Olsem Example, mi stop for worshipim olketa laendadi bilong mi nomata diswan lead go long wei wea famili againstim mi. And tu, mi trae for stretem marit bilong mitufala saed long law, bat partner bilong mi hem les. Nomata insaed disfala hard taem, datfala Witness from France hem go ahed for sendem kam olketa Bible pablikeson and Linh hem barava encouragem mi. Patient fasin and wei wea tufala sista hia showimaot love and saport helpem mi for no givap go kasem taem wea mi luksavve long barava tru fasin bilong partner bilong mi. Mi faendaot hao hem garem 5-fala ‘waef’ and 25 pikinini finis! Diswan hem givim mi strong for lusim hem.

“For lusim wanfala naes big haos for wanfala smol rum nomoa hem no isi samting. And tu, partner bilong mi bifor putim hevi long mi for go stap bak witim hem, hem barava tok strong and sei bae hem torowem acid for bonem mi sapos mi no go bak and stap witim hem. Witim help bilong Jehovah, mi fit for duim samting wea stret.” Kim muv ahed and long April 1998 hem baptaes. For join witim datwan, tufala sista bilong hem and teenage son bilong hem start for studyim Bible witim Olketa Jehovah’s Witness.

“Bifor mi ting laef bilong mi bae iusles nomoa,” Kim hem sei. “Bat distaem mi hapi and no savve krae long naet. Jehovah hem aotem finis wata long eye bilong mi.”

[Footnote]