Certificate Bilong Barava Nambawan Samting

HEM nao samting wea Association of Congolese and African Journalists for the Development (AJOCAD) long Democratic Republic of Congo hem givim for “rewardim olketa man wanwan or organization wea help for mekem grow olketa gudfala samting [long Congo].”

Long November 17, 2000, olketa givim datfala Certificate bilong Barava Nambawan Samting long Olketa Jehovah’s Witness for “gud samting wea olketa duim for pipol bilong Congo [thru] long education and teaching wea stap insaed olketa buk bilong olketa.”

Taem hem story abaotem disfala reward, Kinshasa niuspepa Le Phare hem sei: “Hem hard for faendem eniwan long Congo wea no readim yet Wastaoa and Wekap! or olketa narafala buk wea Olketa Jehovah’s Witness pablisim! Olketa magasin hia [storyim] evri difren kaen part bilong living.” Disfala article talem tu hao olketa buk hia showimaot “hao for deal witim olketa problem bilong distaem” and showimaot “trufala mining bilong olketa samting wea happen.” Each issue bilong Wekap! “no teksaed long politik and no mekhae long wanfala color skin winim narawan.” And tu, olketa magasin hia “mekem grow trust long promis bilong Creator for wanfala sef niu world wea garem peace wea bae changem disfala wicked system wea brekem law.”

Olsem AJOCAD talem, olketa buk bilong Olketa Jehovah’s Witness barava helpem staka pipol long Congo. From olketa stap long planti handred languis, message bilong olketa wea givim hope savve helpem iu tu.

Plis readim information long daon for lukim hao iu savve kasem help from diswan.