Kwestin From Reader

Hao long nao Job hem safa?

Samfala pipol tingse olketa test bilong Job go ahed for planti year, bat buk bilong Job no showimaot hem safa for longfala taem.

Luk olsem first part bilong olketa test bilong Job, wei wea hem lusim olketa famili member and olketa material samting bilong hem short nomoa. Iumi readim: “Nao hem day wea olketa son and dota bilong [Job] kaikai and drinkim wine long haos bilong firstborn brata bilong olketa.” Job kasem olketa report hao hem lusim olketa buluka, olketa donkey, olketa sheep, olketa camel bilong hem and tu olketa servant bilong hem wea lukaftarem olketa animal hia. Luk olsem, no long taem bihaen diswan Job hem faendaot abaotem dae bilong olketa son and dota bilong hem, wea “kaikai and drinkim wine long haos bilong firstborn brata bilong olketa.” Hem luk olsem evri samting hia happen insaed wanfala day nomoa.—Job 1:13-19.

Next part bilong olketa test bilong Job tekem lelebet longtaem. Satan kam long Jehovah and talem hao Job bae foldaon sapos wei for safa kasem hem—long body. Then Job kasem “wanfala nogud boela start from leg bilong hem go kasem hed bilong hem.” Hem maet tek-taem lelebet for disfala sik for go kasem evri part bilong body. And maet bae hem tek-taem for disfala nius bilong “evri bigfala trabol” for kasem olketa man wea sei olketa givim comfort, wea gogo olketa kam long hem.—Job 2:3-11.

Eliphaz hem kam from Teman long land bilong Edom, and Zophar hem from wanfala area long northwest Arabia, so hom bilong olketa hem no farawe from hom bilong Job long Uz, wea luk olsem stap long north Arabia. Bat, Bildad hem wanfala Shuhite, and pipol bilong hem stap saed long Euphrates. Sapos Bildad hem stap long hom bilong hem long datfala taem, maet bae hem tek staka week or month for herem story abaotem Job and for travel kam long Uz. Bat, maet thrifala hia stap klosap nomoa long area bilong Job taem hem start for kasem wei for safa. Nomata olsem, taem thrifala fren bilong hem kam, olketa “go ahed for sidaon witim hem long graon sevenfala day and sevenfala naet” and no toktok.—Job 2: 12, 13.

Then iumi kam long last part bilong olketa test bilong Job, wea information bilong hem fulimap planti chapter bilong disfala buk. Insaed diswan hem samfala wei for argue and toktok wea kamap from olketa wea shud givim comfort, and planti taem Job ansarem olketa. Bihaen datwan, disfala young man Elihu givim repruv, and Jehovah stretem Job from heven.—Job 32:1-6; 38:1; 40:1-6; 42:1.

So, full taem wea Job safa maet happen insaed samfala month nomoa, maet no kasem wan year. Iu maet savve from samting iu kasem finis, hao olketa hard test feel olsem hem no savve garem end. Bat, iumi mas no forgetim hao olketa samting hia savve end, olsem test bilong Job. Nomata hao long nao olketa test hia go ahed, iumi mas tingim saport bilong God, olsem toktok wea spirit muvim Paul for raetem hem showim: “Nomata olketa hardfala taem hem for lelebet taem nomoa, diswan hem mekem hapi kamap for iumi wea hem barava winim eni samting moa and hem for olowe.” (2  Cor. 4:17) Aposol Peter raet olsem: “Bihaen iufala safa for lelebet taem, God bilong evri kaeness wea man no fit for kasem, wea kolem iufala long glory bilong hem for olowe wea wan mind witim Christ, bae hemseleva finisim training bilong iufala, hem bae mekem iufala strong, hem bae strongim iufala.”—1 Peter 5:10.