“Wanem Nao Kakamap Long France?”

“Freedom, nambawan freedom,” hem nao toktok bilong “La Marseillaise,” national anthem bilong France. Tru tumas, freedom hem spesol samting. Nomata olsem, olketa samting wea gogo ahed long France kosim staka for warim wei wea pipol no respectim olketa main freedom. Dastawe, long Friday, November 3, 2000, planti thousand Jehovah’s Witness givimaot total bilong 12 million copy bilong wanfala spesol tract wea garem title “Wanem Nao Kakamap Long France? Waswe, Freedom Savve Tan Bak?”

FOR samfala year, Olketa Jehovah’s Witness long France kasem attak from olketa difren man bilong politik and sekson wea againstim olketa sect. Diswan kosim hard taem for olketa Witness wanwan, for olketa kongregeson, and for evri Witness long France. Bat, long June 23, 2000, datfala Conseil d’État, barava hae kot bilong France givim disison wea markem bigfala change, wea hem saportim disison bilong 31-fala kot long winim 1,100 case. Disfala hae kot talem hao worship bilong Olketa Jehovah’s Witness hem wan mind witim law bilong France and olketa Kingdom Hall bilong olketa fit for free from tax olsem olketa nara religion.

Nomata olsem, French Ministry bilong Finance barava ting nating long disfala disison and go ahed for putim tax long Olketa Jehovah’s Witness wea law sei olketa organization bilong religion free from hem. Ministry putim 60-percent tax long contribution bilong olketa Witness and olketa wea kaban witim olketa insaed 1,500 kongregeson long France. Disfala case go ahed yet saed long law.

Goal bilong waka wea iumi bin storyim hem for showimaot wei wea diswan hem no stret saed long law and for showimaot danger bilong diskaen wei wea law no garem paoa ovarem olketa wea askem tax and danger bilong olketa law wea no luksavve long freedom bilong religion for evri pipol.a

Wanfala Longfala Day

Long tu klok long morning, olketa Witness long samfala kongregeson start for givimaot tract long olketa train station and factory and then long olketa airport. Long six klok, Paris start for laef. Samting olsem 6,000 volunteer stap nao long olketa ples olketa markem finis for kasem pipol wea gogo for waka. Wanfala young woman sei: “Wanem iufala duim for freedom saed long religion hem gud. No Olketa Jehovah’s Witness nomoa insaed diswan.” Long Marseilles, winim 350 Witness givimaot disfala tract long olketa train station and long street. Insaed wan hour, olketa radio storyim disfala waka and talem pipol for no sapraes sapos Olketa Jehovah’s Witness kasem olketa. Long Strasbourg, ples wea European Court of Human Rights stap long hem, pipol long central station laen ap for kasem copy bilong olketa. Wanfala lawyer sei hao, nomata hem no biliv olsem iumi, hem interest tumas long case bilong iumi, from wanem iumi faet for hem hem important and fitim justice.

Long eit klok, nomata big rain, 507 Witness long taon bilong Grenoble kasem evri street or putim tract insaed olketa box for leta. From olketa lukim samting hem go ahed, olketa draeva bilong car and tram stop and ask for wanfala tract. Long taon long west, Poitiers, olketa wea kam long train long naen klok kasem finis tract bilong olketa from ples olketa kam from. Long Mulhouse, klosap long border bilong Germany, olketa givimaot 40,000 copy finis.

Kasem ten klok, staka kongregeson givimaot finis winim haf long olketa tract. Taem morning gogo for finis, lelebet pipol nomoa les for tekem tract, and samfala interesting story kamap. Long Besançon, winim 50 mile from border bilong Switzerland, wanfala young man showaot interest long Bible and ask why nao God letem wei for safa go ahed. Datfala Witness invaetem hem for go ahed witim disfala story long wanfala Kingdom Hall klosap, and stretawe hem kasem wanfala Bible study insaed brochure Wanem Nao God Mas Kasem From Iumi?

Long aftanun staka Witness iusim lunch taem bilong olketa for preach for wan or tu hour. Insaed full aftanun, olketa go ahed moa, and staka kongregeson finis long thri or foa klok. Long taon bilong Reims, samfala wea bin study or kaban witim Olketa Jehovah’s Witness talemaot wei wea olketa laek for joinim kongregeson moa. Long Bordeaux thrifala hom Bible study hem start. Long disfala sem taon, wanfala Witness go insaed wanfala stoa for baem niuspepa and lukim wanfala hip tract. Woman wea ownim stoa wea hem wanfala Witness bifor, hem kasem datfala tract and, from hem luksavve diswan barava important, hem mekem olketa photocopy for hemseleva givimaot.

Long Le Havre, Normandy, wanfala woman bilong Protestant religion hem seke tumas for herem long radio hao olketa taxim contribution bilong Olketa Jehovah’s Witness. Hem hapi tumas for acceptim tract and praisem olketa Witness for wei wea olketa tokaot againstim wei olsem wea no followim justice. Long 7:20 p.m., television nius long Lyons tok olsem abaotem datfala wei for givimaot tract: “Hem moa isi for missim raindrop winim wei for missim tract bilong Olketa Jehovah’s Witness.” Olketa interviewim tufala Witness wea explainim reason for disfala waka.

Olketa Witness wea want for tekpart bihaen olketa waka givim tract long olketa wea kam bak from waka and putim insaed olketa box for leta. Long olketa taon olsem Brest and Limoges—wea pipol savve long hem from porcelain bilong hem—pipol wea lusim ples for luk movie long 11:00 klok long naet nao insaed last sekson for kasem tract. Olketa kolektem olketa leftova tract and givimaot long nextfala morning.

Olketa Samting wea Kamaot

Wanfala Witness hem raet: “Enemy bilong iumi tingse olketa mekem iumi kamap wik. Really samting, opposite nao go ahed for happen.” Long staka kongregeson, winim 75 percent long olketa Witness share long datfala day, samfala iusim 10, 12, or 14 hour long disfala waka. Long taon wea olketa kolem Hem, north long France, wanfala Witness wea bin waka long naet givimaot tract from faev klok long morning go kasem thri long aftanun. Klosap, long Denain, wea wanfala kongregeson bin stap long hem start kam from 1906, 75-fala Witness iusim 200 hour for givimaot tract long Friday. Olketa narawan, nomata olketa olo, cripple, and kasem nogud weather, olketa laek for mas tekpart. Olsem example, long Le Mans, thrifala woman wea winim 80 year iusim tufala hour for putim tract insaed olketa box for leta, and wanfala Witness wea insaed wheelchair givimaot tract front long train station. And hem barava encouragem iumi for lukim hao staka Witness wea no duim preaching for longtaem finis, tekpart long disfala waka!

Tru nao, disfala waka givim bigfala witness. Evri difren kaen pipol, wea staka long olketa no kasem olketa Witness evritaem long haos, kasem copy bilong tract. Staka feel olsem disfala waka duim moa samting winim wei for protectim waka bilong olketa Witness. Staka ting long hem olsem wei for defendim freedom bilong conscience and worship for evri pipol bilong France. Olsem pruv bilong diswan, pipol ask for moa copy for givim long olketa fren, skulfren, or olketa relative.

Yes, Olketa Jehovah’s Witness long France praod for talemaot nem bilong Jehovah and for defendim Kingdom waka. (1 Peter 3:15) Olketa barava hope olketa savve “go ahed for garem living wea kwaet witim wei for worshipim God evribit and wei for tinghevi” and for staka thousand moa joinim olketa for praisem Dadi bilong olketa long heven, Jehovah.—1 Timothy 2:2.

[Footnote]