Showimaot Thankiu and Kasem Hapi

“WEI for showimaot thankiu hem wanfala important samting long laef bilong olketa man,” Calgary Herald, wanfala niuspepa bilong Canada hem sei. Datfala Herald talem moa toktok bilong samfala naen-year-old primary skul student wea teacher askem olketa for raet abaotem evri samting wea olketa thankiu tumas long hem. Wanfala young wan sei hem thankiu tumas for famili bilong hem ‘bikos olketa kea for hem.’ Wanfala young girl tu thankiu for famili bilong hem. Hem sei: “Olketa keepim mi sef, healthy, kea for mi, lovem mi, feedim mi, and from parents bilong mi nao mi stap long disfala earth.”

Wei for no showimaot thankiu savve lead go long bigfala wei for no satisfae. Olsem savveman J. I. Packer hem talem, “God wakem iumi witim wei for depend long hem and long each other.” Diswan mekem iumi rememberim wisefala kaonsel bilong Bible from samfala handred year go finis, wea sei: “Showimaot iufala barava thankiu.” (Colossians 3:15) Wei for showimaot thankiu from heart long nara pipol savve help for mekem grow wei for fren wea showimaot fasin for kea.

And tu, taem iumi hapi and tinghae long narawan, iumi showimaot iumi thankiu long Jehovah, and hem luksavve long diswan. Bible hem sei: “Eye bilong Jehovah muv raonem full earth for showim strong bilong hem for olketa wea givim full heart long hem.” (2 Chronicles 16:9) God promisim iumi hao hem rememberim and tinghae long love wea olketa man showimaot for nem bilong hem. (Hebrews 6:10) Tru nao, iumi garem gudfala reason for showimaot thankiu bikos disfala fasin bilong God, taem man showimaot evriday, savve mekem Jehovah hapi and givim iumi hapi. Olsem Proverbs 15:13 hem sei: “Heart wea hapi hem affectim man long gudfala wei.”