Trufala Worship Mekem Pipol Garem Wan Mind
NOMATA planti taem religion divaedem olketa man, worship bilong only tru God garem paoa for mekem pipol garem wan mind. Taem Israel hem nation wea God chusim, staka honest Gentile kam long tru worship. Olsem example, Ruth lusim olketa god bilong ples bilong hem Moab and sei long Naomi: “Pipol bilong iu bae kamap pipol bilong mi, and God bilong iu bae kamap God bilong mi.” (Ruth 1:16) Kam kasem first century C.E., wanfala big sekson bilong olketa Gentile kamap pipol wea worshipim tru God. (Acts 13:48; 17:4) Bihaen taem olketa disaepol bilong Jesus start for gogo long olketa farawe ples witim gud nius, olketa nara honest pipol join insaed worship bilong tru God. Aposol Paul hem raet: “Iufala tan go long God and lusim olketa idol for slave for wanfala God wea laef and tru.” (1 Thessalonians 1:9) Waswe, worship bilong tru God distaem garem paoa olsem for mekem pipol garem wan mind?
Olketa man wea daot strong for sei disfala toktok “olketa tru worshiper” or “tru God” hem rong. Olketa maet garem diskaen tingting bikos olketa no savve long eni samting wea givim truth. Bat pipol from difren kaen living wea lukaotem truth luksavve hao wei for worship hem no samting wea man seleva nao chusim. Wan wea iumi fit for worshipim nomoa hem Man wea wakem evri samting—Jehovah God. (Revelation 4:11) Hem nao tru God, and hem garem raet for disaedem hao pipol bae worshipim hem.
For helpem iumi for minim wanem iumi mas duim, Jehovah story long iumi thru long Word bilong hem, Bible. Klosap evriwan long earth distaem savve kasem full Bible or part bilong hem. And tu, Son bilong God hem sei: “Sapos iufala keepim word bilong mi, . . . iufala bae savve long truth.” (John 8:31, 32) So, man fit for savve long truth. And staka million pipol from difren kaen religion wea garem honest heart go ahed for acceptim disfala truth and join tugeta long tru worship.—Matthew 28:19, 20; Revelation 7:9, 10.
Wan Mind Evriwea Long World Distaem!
Wanfala spesol profesi insaed Bible buk bilong Zephaniah storyim wei wea pipol from difren kaen living hipap tugeta. Hem sei: “Then mi [Jehovah God] bae givim long olketa pipol wanfala change go long wanfala klinfala languis, for mekem evriwan singaot long nem bilong Jehovah, wea mekem olketa for servem hem olsem wanfala team.” (Zephaniah 3:9) Diswan hem naesfala wei for storyim pipol wea change and servem God witim wan mind!
Wanem taem nao diswan bae happen? Zephaniah 3:8 sei: “ ‘Iufala go ahed long wei for lukluk for mi evritaem,’ hem nao toktok bilong Jehovah, ‘go kasem taem day bilong mi kam for pei bak, from judicial disison bilong mi hem for hipimap olketa nation, for mi bae hipimap olketa kingdom, mekem mi kapsaetem kros bilong mi antap long olketa, evri hotfala kros bilong mi; from strong wea olsem fire bilong mi bae kaikaim full earth.’ ” Tru nao, long taem wea Jehovah go ahed for hipimap olketa nation bat bifor hem pourimaot hotfala kros bilong hem antap long olketa, hem givim long olketa wea garem kwaet fasin long earth wanfala change go long klin languis. Datfala taem hem distaem, bikos wei for hipimap evri nation for war bilong bigfala day bilong Olmaeti God long Armageddon hem go ahed distaem.—Revelation 16:14, 16.
For mekem pipol bilong hem garem wan mind, Jehovah givim long olketa wanfala klin languis. Insaed niu languis hia hem stretfala wei for minim truth bilong Bible abaotem God and olketa purpose bilong hem. For tok long klin languis hem minim tu wei for bilivim truth, teachim long narafala pipol, and live followim olketa law and principle bilong God. Hem needim wei for barava stap klia from politik wea divaedem pipol and aotem from heart bilong iumi olketa selfish tingting, olsem wei for heitim man from difren ples and wei for mekhae long kantri, wea hem fasin bilong disfala world. (John 17:14; Acts 10:34, 35) Evriwan wea garem honest heart and wea lovem truth savve lanem disfala languis. Tingim hao faevfala pipol wea iumi storyim long firstfala article—wea bifor olketa separate saed long religion—distaem garem wan mind long worship bilong tru God, Jehovah.
Olketa Garem Wan Mind Insaed Tru Worship
Taem Fidelia, datfala woman wea strong long Roman Catholic church, baem wanfala Bible for dota bilong hem iusim long skul, hem askem priest bilong hem for explainim from datfala Bible wanem nao happen long faevfala pikinini bilong hem wea dae. “Mi no satisfae long datwan!” hem sei. So taem Olketa Jehovah’s Witness kasem hem, hem askem sem kwestin long olketa. Taem hem readim long Bible bilong hem truth abaotem olketa wea dae finis, hem luksavve hao church giamanim hem. Hem lanem hao olketa wea dae finis nating savve long eni samting, wea minim olketa no safa long Limbo or eni ples. (Psalm 146:4; Ecclesiastes 9:5) Fidelia torowem evri image bilong religion, lusim datfala religion, and start for studyim Bible. (1 John 5:21) For tenfala year finis, hem enjoyim wei for teachim truth from Bible long nara pipol.
Tara from Kathmandu muv go long wanfala kantri wea tu-thri temple bilong Hindu nomoa stap. So hem visitim wanfala Methodist church from hem hope for satisfaem olketa spiritual need bilong hem. Bat hem nating faendem eni ansa for kwestin bilong hem abaotem wei wea olketa man safa. Then Olketa Jehovah’s Witness meetim hem and invaetem hem for studyim Bible witim olketa. Tara hem sei: “Gogo mi luksavve hao wanfala God bilong love no garem blame long wei for safa wea stap long world . . . Mi hapi tumas long hope for wanfala niu world bilong peace and wan mind.” (Revelation 21:3, 4) Tara aotem evribit olketa Hindu image bilong hem, finis for followim kastom bilong religion long ples bilong hem, and faendem trufala hapi taem hem help for satisfaem spiritual need bilong nara pipol olsem wanfala Witness bilong Jehovah.
Panya, datfala Buddhist, hem wanfala man for talem future taem Olketa Jehovah’s Witness first kam long hem long Bangkok, so olketa profesi long Bible mekem hem interest tumas. Panya hem sei: “Taem mi kasem savve long why living distaem hem difren from purpose bilong Creator firstaem and hao hem arrange for stretem bak olketa nogud samting wea pipol wea rejectim hem and olmaeti rul bilong hem kosim, hem olsem eye bilong mi just open. Evri samting abaotem message bilong Bible hem barava wan mind. Mi start for lovem Jehovah olsem wanfala person; diswan muvim mi for duim samting wea mi savve hem stret. Mi barava want for helpem narafala pipol for luksavve wei wea wisdom bilong man hem difren from wisdom bilong God. Trufala wisdom hem barava changem laef bilong mi.”
Gogo, Virgil hem start for barava daotem olketa biliv bilong hem. Winim wei for prea long God for helpem blak pipol and for samting wea hem tingim olsem wanfala organization for heitim man from difren ples wea luk olsem mekem fasin for heitim white pipol kamap, hem prea for kasem truth, nomata hem wanem, or wea nao datwan. Virgil hem ting go bak: “Taem mi wekap nextfala day bihaen mi prea strong long God, mi faendem wanfala Wastaoa magasin insaed haos. . . . Maet samwan pushim kam andanit long door.” No longtaem bihaen hem studyim Bible witim Olketa Jehovah’s Witness. Hem go ahed for sei: “Firstaem long laef bilong mi, mi feel satisfae. . . . Mi start for feelim hope insaed long mi.” Gogo Virgil joinim olketa wea offerim long pipol only trufala hope wea stap insaed Word bilong God, Bible.
Charo from Latin America hem sapraes tumas taem wanfala Witness wea nem bilong hem Gladys, wea lukim hao hem hard waka for lukaftarem olketa pikinini bilong hem, helpem hem for kasem market. Gogo, Charo acceptim samting wea Gladys offerim long hem—wanfala free hom Bible study. Taem Charo faendaot from Bible bilong hem hao no evri gud pipol go long heven bat Jehovah bae blessim tu olketa man long earth witim laef olowe, hem sapraes fogud. (Psalm 37:11, 29) Charo sharem disfala hope long nara pipol insaed 15 year wea go pas.
Tingim full earth hem fulap witim honest pipol wea garem wan mind long worship bilong Jehovah, datfala only tru God! Diswan hem no story nomoa. Hem promis bilong Jehovah. Thru long profet bilong hem Zephaniah, God talemaot: “Mi bae letem stap midolwan long iu wanfala pipol wea hambol and garem kwaet fasin, and olketa bae stap sef insaed long nem bilong Jehovah. . . . Olketa bae no followim wei wea no raeteous, or talem laea samting, and mouth bilong olketa bae no garem giaman toktok; . . . and no eniwan bae mekem olketa fraet.” (Zephaniah 3:12, 13) Sapos iu laekem tumas disfala promis, ting strong long encouragement bilong Bible hia: “Lukaotem Jehovah, iufala evriwan wea garem kwaet fasin long earth, wea duim olketa law bilong Hem. Lukaotem raeteous fasin, lukaotem kwaet fasin. Maet iufala savve haed long day bilong kros bilong Jehovah.”—Zephaniah 2:3.