Kwestin From Reader
Wanem nao hem minim for worshipim Jehovah “witim spirit”?
Taem hem witness long wanfala woman bilong Samaria, wea go for kasem wata from well bilong Jacob klosap long taon bilong Sychar, Jesus Christ sei: “God hem wanfala Spirit, and olketa wea worshipim hem mas worship witim spirit and truth.” (John 4:24) Wei for worship ‘witim truth’ minim tru worship mas followim wanem Jehovah God hem showimaot insaed Bible abaotem hemseleva and olketa purpose bilong hem. Service bilong iumi long God mas witim spirit long wei wea iumi duim witim strong, wea kam from heart wea fulap witim love and faith. (Titus 2:14) Bat, olketa toktok wea stap raonem datfala scripture showimaot hao toktok bilong Jesus, ‘worshipim God witim spirit and truth,’ hem minim moa samting winim tingting bilong iumi for servem Jehovah.
Story bilong Jesus witim datfala woman long well hem no abaotem wei for garem or no garem strong for worship. Nomata long false worship, pipol savve loyal and duim witim strong. Bat, bihaen hem sei Father bae kasem worship no long maunten long Samaria or long temple long Jerusalem—tufala really ples wea stap—Jesus point go long niu wei for worship wea garem faondeson long wanem kaen God nao man worshipim. (John 4:21) Hem sei: “God hem wanfala spirit.” (John 4:24, Charles B. Williams) Tru God hem no physical and man kanduit lukim or tasim hem. Wei for worshipim hem no depend long wanfala really temple or maunten. So, Jesus hem story abaotem wanfala part bilong worship wea minim moa samting winim samting wea eye savve lukim.
Witim truth, worship wea God acceptim bae need for followim lead bilong holy spirit—paoa bilong God wea man no lukim. Aposol Paul sei: “[Holy] spirit hem lukluk gud insaed long evri samting, nomata olketa deep samting bilong God.” Hem sei moa: “Iumi kasem, no spirit bilong world, bat spirit wea kam from God, mekem iumi maet savve long olketa samting wea God hem kaen tumas for givim iumi.” (1 Corinthians 2:8-12) For worshipim God long wei wea hem acceptim, iumi mas garem spirit bilong hem and followim lead bilong hem. And tu, hem important for spirit bilong iumi, or tingting bilong iumi, for wan mind witim spirit bilong God thru long study and wei for followim Word bilong hem.
[Piksa long page 28]
Worshipim God “witim spirit and truth”