Report Bilong Olketa wea Talemaot Kingdom
Kasem Olketa wea Hard for Kasem
OLKETA Jehovah’s Witness trae hard for visitim evriwan wea olketa fit for kasem witim datfala Kingdom message. Samfala taem man need for barava trae hard for kasem olketa wea staka taem no stap long haos bilong olketa. (Mark 13:10) Abaotem diswan, wanfala spesol pioneer minister long wanfala kantri long South America talem disfala experience.
“Wanday mi faendaot hao governor bilong state bae visit long territory wea mitufala waef bilong mi kasem assignment. From hem luk olsem kaen man wea staka taem no stap long haos bilong hem, mi raetem wanfala leta go long hem and putim samfala pablikeson insaed, midolwan olketa hem disfala brochure Wanem Nao God Mas Kasem From Iumi? and olketa buk Mankind’s Search for God and Savvy Wea Lead Go long Laef Olawe. Leta bilong mi hem explainim purpose bilong each pablikeson.
“Bikos mi interest for faendem wanem nao tingting bilong hem abaotem olketa literature hia, mi ask for meetim hem. Samfala week bihaen olketa letem mi meetim hem, and mi tekem go wanfala copy bilong datfala video Jehovah’s Witnesses—The Organization Behind the Name. Meeting bilong mitufala go ahed for tu hour. Bihaen mi lukluk long video hia witim datfala governor, mi askem hem wanem nao tingting bilong hem abaotem datwan. Hem sei: ‘No eni nara organization long earth hem olsem bilong iufala. Mi laekem tumas sapos pipol olsem iufala savve helpem mi finisim samfala project bilong mi for gavman!’ Then hem ask sapos enitaem mi kasem world headquarters bilong organization bilong iumi. Mi talem hem hao nomata hem bin goal bilong mi from taem wea mi 14 year, mi no kasem yet eni chance for go visitim world headquarters bilong iumi long Brooklyn, New York. Hem kaen goal wea mi hard for kasem. Hem lukluk strong long mi for lelebet taem. Then hem sei hem laekem mi for kasem datfala chance. Hem stretem kam olketa legal permit bilong mitufala and givim ticket olsem present for mitufala go long aeroplane!
“Disfala governor distaem savve kasem olowe olketa Wastaoa and Wekap! magasin. Mifala hope for klosap startim wanfala Bible study witim hem.”