Wata wea Givim Laef Ran Long Andes
Olketa Andes Maunten wea stap long midol bilong Peru, divaedem datfala kantri long tufala sekson, sekson long saedsea long west hem olsem desert and barava naes bush long east saed. Smol haf bilong 27 million pipol bilong Peru stap long olketa maunten hia. Samfala stap barava antap long olketa maunten and samfala stap long saed bilong olketa maunten wea steep fogud or long olketa barava low valley wea staka samting savve grow long there.
FROM olketa maunten hia hae tumas, diswan mekem hem hard for pipol kasem. From diswan, planti million pipol wea stap long there stap seleva nomoa, and olketa samting wea go ahed long olketa nara ples no barava affectim olketa.
Pipol mekem olketa smol vilij saed long olketa river mekem olketa savve tekem wata for garden and olketa Ilama, alpaca, vicuña, and sheep. Bat, narakaen wata wea important tumas hem ran thru long Andes—spiritual wata wea strongim man and wea kam from Jehovah, “man wea givim living wata.” (Jeremiah 2:13) God iusim olketa witness bilong hem for helpem pipol long olketa vilij hia wea stap hae ap long Andes for kasem stretfala savve abaotem hem and olketa purpose bilong hem.—Isaiah 12:3; John 17:3.
From hem will bilong God for “evri difren kaen man mas sev and kasem stretfala savve bilong truth,” olketa minister hia barava strong for tekem go message from Bible wea givim laef long olketa community hia wea hard for kasem. (1 Timothy 2:4) Disfala message wea kam from Bible hem givim spiritual laet and hem nambawan. Hem mekem pipol long there wea garem honest heart for kamap free from olketa kastom biliv, and olketa biliv wea mekem olketa fraetem olketa wea dae finis, olketa wicked spirit, and paoa bilong nature. Samting wea moa important nao, disfala message givim olketa nambawan hope for laef olowe long wanfala paradaes earth.
Willing for Waka
Olketa wea preachim Kingdom wea visitim olketa farawe ples hia mas mekem samfala change. For kasem heart bilong pipol long there witim Bible message, olketa wea teachim Bible need for savve lelebet long Quechua or Aymara, tufala languis long datfala ples.
For kasem olketa vilij long Andes hem no isi. Tu-thri train nomoa go long olketa ples hia. From olketa big rain and olketa steep part bilong road mekem hem danger tumas for travel long olketa transport. So, hao nao olketa Witness savve tekem go disfala message bilong Kingdom long pipol hia?
Olketa hia wea preachim disfala gud nius, olketa no fraet and olketa acceptim datfala challenge witim sem spirit wea profet Isaiah showimaot: “Mi long hia! Sendem mi.” (Isaiah 6:8) Olketa iusim thrifala trak wea olsem smol haos for kasem olketa area long north, midol, and long south. Olketa strongfala pioneer hia, or full-taem minister, tekem go staka box wea fulap witim olketa Bible and Bible literature, and plantim olketa seed bilong truth insaed Bible midolwan long pipol long there wea kaen, garem fasin for welkamim man and honest.
Olketa kona long olketa road long maunten barava danger tumas. For tan long samfala kona hia, olketa trak mas iusim reverse. Taem wanfala bas hem reverse olsem, wanfala missionary wea sidaon long bak bilong bas hem luk go aot long window and lukim wheel bilong bas hem barava kasem saed bilong maunten wea hem drop daon winim 190 meter! Hem satem eye bilong hem go kasem taem bas hem muv awe from saed bilong maunten.
Samfala road barava nogud nao and no garem mas spes. Wanfala taem wea olketa draev daon long wanfala road wea no garem mas spes olketa meetim narafala trak. Olketa mas reversim datfala trak wea olsem smol haos go bak ap long hill kasem ples wea narafala trak savve isisi go pas long olketa.
Nomata olsem, samting wea kamaot from wei wea olketa no givap hem barava gud tumas. Waswe, iu laek for savve long wanem hem kamaot from hard waka bilong olketa hia?
“Watarem” Lake Titicaca
Lake Titicaca wea stap long wanfala basin long olketa Andes Maunten wea hem 3,800 meter hae, hem lake wea hae winim evri nara lake olsem long world. Wata from olketa hae maunten wea garem snow and wea samfala long olketa winim 6,400 meter hae, mekem 25 river wea fulimap Titicaca. From datfala ples hem hae tumas, hem cold, wea savve mekem pipol wea no getius for stap long there sik.
Wanfala taem bifor, wanfala grup bilong olketa pioneer wea savve long Quechua and Aymara languis gogo long Amantani and Taquile, tufala island long Lake Titicaca. Olketa givim wanfala tok wea iusim olketa piksa and wea garem title “Lukluk Moa Klos Long Olketa Church,” wea hem storyim olketa laea wea Christendom talem. Olketa pipol barava enjoyim. Wanfala man hem welkamim olketa brata and offerim long olketa wanfala bigfala rum long haos bilong hem wea olketa savve stap long hem and teachim pipol abaotem Bible.
Namba bilong olketa wea attendim firstfala meeting long Amantani hem 100 pipol; and 140 attendim meeting long Taquile. Olketa givim tok long Quechua languis. Wanfala hasband and waef wea bifor olketa stap long mainland sei: “Hem taem nao for iufala Olketa Jehovah’s Witness rememberim mifala. Mifala prea finis for iufala kam.”
Olketa preachim gud nius no long tufala bigfala island bilong Lake Titicaca nomoa, bat tu, long nara 40 island bilong hem wea “float.” Olketa island wea float? Yes, olketa mekem olketa island hia from olketa totora, longfala grass wea grow long olketa area bilong lake wea hem no deep. Olketa totora grow hae winim top bilong wata. For mekem wanfala island, olketa no aotem grass hia bat bendim nomoa and taemap for mekem wanfala floor. Then olketa putim mud long grass hia and iusim grass wea olketa katem for mekem hem strong. Pipol stap long olketa grass haos wea olketa buildim antap long hem.
Olketa Jehovah’s Witness iusim wanfala boat for preach long pipol long olketa island bilong Lake Titicaca. Disfala boat savve karem 16-fala pipol insaed. Bihaen olketa Witness kasem wanfala island wea float, olketa wakabaot antap long grass floor for kasem each haos. Olketa talem hao planti taem olketa feelim island hem muv lelebet taem olketa wakabaot long hem. Kaen ples olsem hem no fitim man wea savve nogud for gogo long sea!
Pipol wea iusim Aymara languis stap long planti community and vilij long olketa bigfala point insaed long datfala lake. Boat hem only wei for kasem evri vilij hia. Samting olsem 400,000 pipol stap long datfala area wea olketa boat hia go long hem witim Kingdom message. Olketa boat bae go ahed busy for longfala taem.
Satisfaem Spiritual Wei for Thirsty
Flavio stap long Santa Lucía vilij, klosap long Juliaca, long Andes. Evangelical church bilong hem teachim hellfire long hem. For planti year hem fraet nogud hem kasem panis for olowe long fire. Planti taem hem trae for minim why nao wanfala God bilong love savve panisim pipol for olowe long fire. Taem Tito, wanfala full-taem minister bilong Olketa Jehovah’s Witness, visitim datfala area, hem visitim Flavio.
Wanfala first kwestin wea Flavio askem nao hem, Waswe, religion bilong iu teachim hao God panisim pipol long hellfire?” Tito talem hao kaen teaching olsem barava mekem Creator feel nogud, and hem mekem nem bilong Jehovah, datfala God bilong love kasem shame. Tito iusim Bible bilong Flavio for showim hem hao olketa wea dae finis no savve long eni samting and olketa weit for kasem resurrection anda long Kingdom bilong God. (Ecclesiastes 9:5; John 5:28, 29) Diswan barava openem eye bilong Flavio. Stretawe hem acceptim wanfala Bible study and no longtaem bihaen hem baptaes olsem wanfala Christian.
Wanfala Vilij wea Tinghae
Tingim bigfala hapi wea olketa kasem taem olketa showim olketa scripture long pipol long vilij wea no enitaem bin lukim Bible or for preach long olketa vilij wea pipol nating savve long Olketa Jehovah’s Witness or long gud nius wea olketa preachim! Hem nao samting wea thrifala pioneer sista—Rosa, Alicia, and Cecilia experiencem—wea preach long Izcuchaca and Conayca vilij, wea stap winim 3,600 meter hae ap long midol long Peru.
Taem olketa kasem firstfala vilij, olketa no garem eni haos for stap long hem. Olketa story long police komanda, and explainim long hem why nao olketa visit kam. Wanem nao kamaot from diswan? Hem letem olketa for sleep long police station. Then long next day, olketa pioneer faendem wanfala haos wea kamap ples for organizem waka bilong olketa.
No longtaem bihaen, hem kamap taem for Memorial bilong dae bilong Christ. Olketa pioneer visitim finis evri haos long Izcuchaca vilij, offerim planti Bible, and startim planti Bible study. Bifor Memorial, olketa givimaot olketa invitation wea explainim purpose bilong disfala celebration and mining bilong bred and wine wea insaed disfala celebration for remember. Olketa invaetem samfala brata for kam help witim disfala meeting, and wanfala hem givim tok. Hem barava hapi samting for lukim 50 pipol from datfala smol vilij kam long datfala spesol hipap! Hem firstaem for olketa savve long really mining bilong Evening Kaikai bilong Lord. And hem barava spesol samting long olketa for holem Word bilong God long hand bilong olketa!
Kamap Free From Olketa Hevi
For tekem truth bilong Bible long olketa wea prisoner insaed giaman religion hem evritaem samting wea givim hapi. Pisac hem wanfala strongfala taon bilong Inca Rul bilong bifor. Klosap evriwan wea stap long there kasem teaching bilong hellfire wea no kam from Bible. Olketa priest talem olketa hao only wei for kasem heven hem for olketa priest prea for olketa.
Hem isi for minim hao kaen pipol olsem barava thirsty for kasem wata bilong truth from Bible. Taem hem preach from haos tu haos, Santiago, wanfala full-taem minister bilong Olketa Jehovah’s Witness, kasem chance for explainim long wanfala man hao olketa raeteous wan bae stap long paradaes earth. (Psalm 37:11) Santiago showim from Bible hao olketa wea dae finis bae kasem resurrection and hao evriwan bae kasem instruction long olketa wei bilong Jehovah and garem hope for laef olowe. (Isaiah 11:9) Kam kasem datfala taem, datfala man hem wanfala strongfala Catholic, duim spiritism, and hem savve drunk evritaem. Distaem hem garem hope wea kam from Bible—for stap long Paradaes. Hem bonem olketa samting saed long spiritism and hem lusim wei for drunk. Hem hipimap famili bilong hem and acceptim wanfala Bible study. Gogo, evriwan long datfala famili dedicate long Jehovah God and baptaes.
Hapi Long Fasin for Welkamim Man
Pipol wea stap long olketa maunten barava showimaot fasin for welkamim man. Nomata olketa poor and stap long olketa simpol haos, olketa givim wanem olketa garem long olketa visitor. Bifor hem lanem olketa hae standard bilong Bible, maet man long haos givim olketa coca leaf for man wea hem story long hem for kaikaim. Bat taem hem kamap wanfala Witness, maet hem givim wanfala spoon sugar wea kost bilong hem semsem witim coca leaf long olketa province wea stap farawe.
Wanfala brata askem wanfala missionary for go witim hem long wanfala return visit. Bihaen olketa klaemap long wanfala steep maunten, olketa klapim hand bilong olketa for mekem man long haos savve olketa arrive. Man hia invaetem olketa for go insaed datfala haos wea garem grass ruf and olketa mas bendaon for go thru long door. Olketa wakabaot isisi raonem midol long rum wea waef hem digim wanfala hol long floor and putim baby insaed long hem long wanfala kaleko. From hem no savve klaem aot from hol hem hapi nomoa for mekem olketa noise bilong baby wea hapi taem olketa bigman go ahed for story. Bihaen olketa enjoyim naesfala story abaotem olketa blessing bilong Kingdom, datfala woman tekem kam wanfala bigfala botol wea fulap long wanfala drink wea pipol long there laekem tumas. No longtaem bihaen, tufala brata hia go bak daon long maunten for visitim samfala pipol moa.
Wanfala Bigfala Harvest
Distaem, long disfala area, samting olsem wan handred grup stap wea garem winim wan thousand pipol wea studyim Bible witim Olketa Jehovah’s Witness. Olketa sendem olketa wea kasem training long Ministerial Training Skul long Lima for mekem olketa grup hia for kamap olketa kongregeson. Olketa wea garem gudfala heart and wea bin prisoner long olketa giaman religion and kastom biliv for longfala taem faendem freedom thru long gud nius bilong Kingdom! (John 8:32) Wei wea olketa thirsty for olketa wata bilong truth hem kasem wei for satisfae.
[Piksa long page 10]
Witness long olketa island wea “float” bilong Lake Titicaca